Thursday, 8 August 2013

(ခရစ္စတိုဖာဂန်းနက်စ်နှင့် တွေ့ဆုံခြင်း)

အမှန်တရားကို မဖော်ထုတ်ဘဲ ဖုံးအုပ်ထားရင် ပြုပြင်ပြောင်းလဲရေး လမ်းကြောင်းကို ထိခိုက်နိုင်ပါတယ်" (ခရစ္စတိုဖာဂန်းနက်စ်နှင့် တွေ့ဆုံခြင်း)


၁၉၈၈ ခုနှစ် ရှစ်လေးလုံး ဒီမိုကရေစီ အရေးတော်ပုံ ကာလက ဘီဘီစီ သတင်းထောက်အဖြစ် သမိုင်းတွင်သော သတင်းပေးပို့ချက်များကို ပေးပို့ခဲ့သူ ခရစ္စတိုဖာဂန်းနက်သည် ရှစ်လေးလုံး ဒီမိုကရေစီ အရေးတော်ပုံ ငွေရတု အခမ်းအနား တက်ရောက်ရန် သြဂုတ် ၆ ရက်နေ့ ညပိုင်းက မြန်မာနိုင်ငံသို့ ရောက်ရှိလာခဲ့ပါသည်။ ခရစ္စတိုဖာ ဂန်းနက်နှင့် သြဂုတ် ၇ ရက်တွင် ခေတ္တတွေ့ဆုံ ခဲ့ပါသည်။ ထိုသို့တွေ့ဆုံချိန်အတွင်း မေးမြန်းခဲ့သည်များကို ဖော်ပြလိုက်ပါသည်။


မေး။ နှစ်ပေါင်း ၂၅ နှစ်ကြာ ပြည်ဝင်ခွင့် ပိတ်ပင်ခံထားရပြီးတဲ့နောက် မြန်မာနိုင်ငံကို ပထမဆုံး ပြန်ရောက်လာခဲ့ပါပြီ။ မြန်မာနိုင်ငံကို ခြေချပြီးတဲ့ အချိန်မှာ ဘယ်လိုစိတ်ခံစားချက် ဖြစ်ပေါ်ခဲ့ပါသလဲ။
ဖြေ။ အတိအကျတော့ မသိပါဘူး။ ဒါပေမယ့် သံသယဖြစ်မိတဲ့ အရာက မြန်မာနိုင်ငံမှာရှိတဲ့ ဆင်းရဲချမ်းသာ ကွာဟမှု သိသိသာသာကြီး ပိုမိုကွာဟလာတယ်လို့ ထင်မိပါတယ်။ ဒါဟာ မြို့တွေရဲ့ ရုပ်ပိုင်းဆိုင်ရာ အနေအထားကို ကြည့်ပြီးပြောတာပါ။ အရမ်းကို ဆိုးဝါးတဲ့ နေရာတွေ ရှိနေပါတယ်။ နိုင်ငံရေးအရ အရင်ထက်ပိုပြီး လွတ်လပ်တဲ့သဘော ရှိပါတယ်။ ကျွန်တော်အခု မြန်မာနိုင်ငံကို ရောက်နေတယ်ဆိုတာ ပိုပြီးလွတ်လပ်တဲ့ ပြောင်းလဲမှုတွေကြောင့်ပါပဲ။ ဒါပေမယ့် ဒီပြောင်းလဲမှုတွေကို ဆက်ပြီးလုပ်ဆောင်ဖို့ လိုပါတယ်။ ဆက်လက်ပြောင်းလဲစရာတွေ အများကြီး ရှိနေပါသေးတယ်။ မီဒီယာနဲ့ လွတ်လပ်စွာ ထုတ်ဖော်ခွင့်ကို ဖိနှိပ်ထားတဲ့ ဥပဒေတွေ ရှိနေပါသေးတယ်။ ပြည့်ဝတဲ့ ဒီမိုကရေစီ နိုင်ငံတစ်ခုဖြစ်ဖို့ ဒါတွေကို ပြောင်းလဲရပါမယ်။

မေး။ မြန်မာနိုင်ငံကို ဘာကြောင့် ရောက်လာခဲ့တာပါလဲ။
ဖြေ။ ၈၈ မျိုးဆက် ကျောင်းသားတွေကနေ ရှစ်လေးလုံး ငွေရတုပွဲ တက်ရောက်ဖို့အတွက် ဖိတ်ကြားခံရတာကြောင့် မြန်မာနိုင်ငံကို ပြန်လာဖြစ်တာပါ။ ပြီးတော့ ဒီမှာရှစ်လေးလုံး လူထုအုံကြွမှုနဲ့ ပတ်သတ်တဲ့ မှတ်တမ်းတင် ရုပ်ရှင်တစ်ခု ရိုက်ဖို့လည်း စီစဉ်နေပါတယ်။ ဘယ်ကနေပြီးတော့ ဒီရုပ်ရှင်ကို ထုတ်လွှင့်ဖြစ်မလဲတော့ မသိသေးပါဘူး။ ဒီရုပ်ရှင်ကို ကိုယ်ပိုင်မှတ်တမ်း တစ်ခုအနေနဲ့ လုပ်နေတာပါ။ ကျွန်တော်က ၈၈ မှာ ဖြတ်ခဲ့တာတွေကို အမှန်အတိုင်း ပြောပြချင်ပါတယ်။ ၁၉၈၈ ခုနှစ်မှာ ဖြစ်ပွားခဲ့တဲ့ အမှန်တရား ပေါ်ထွက်ဖို့ဆိုတာ အရေးကြီးပါတယ်။ ၈၈ ကျောင်းသားတွေ အတွက်လည်း တရားမျှတမှု ရှိနိုင်တာပေါ့။ အမှန်တရားကတစ်ဆင့် တရားမျှတမှုဆိုတာ ပေါ်ပေါက်နိုင်ပါတယ်။ အမှန်တရား ထွက်ပေါ်လာပြီ ဆိုတာနဲ့ လူ့အဖွဲ့အစည်းတစ်ရပ်၊ မိသားစုတစ်စု ဒါမှမဟုတ် လူတစ်ဦးတစ်ယောက် အနေနဲ့ ဒီအမှန်တရားနဲ့ ပတ်သတ်ပြီး ဘာဆက်လုပ်မယ်ဆိုတာကို ဆုံးဖြတ်နိုင်ပါတယ်။

မေး။ ရှစ်လေးလုံး ဒီမိုကရေစီ အရေးတော်ပုံ ဘာကြောင့်ဖြစ်ပေါ် ခဲ့ရသလဲ ဆိုတာကို ခင်ဗျားရဲ့ အတွေ့အကြုံအရ ဘယ်လိုပြောပြနိုင်မလဲ။
ဖြေ။ ကျွန်တော်ကတော့ နှစ်ပေါင်း ၂၆ နှစ်ကျော်ကြာ စစ်တပ်ကို အလွဲသုံးစားလုပ်ပြီး အုပ်ချုပ်ခဲ့တဲ့ ဗိုလ်နေ၀င်းရဲ့ အုပ်ချုပ်မှုလို့ပဲ ထင်ပါတယ်။ ၁၉၈၆ ခုနှစ်ကတည်းက ဘီဘီစီ သတင်းထောက်အဖြစ် မြန်မာနိုင်ငံရဲ့ နိုင်ငံရေးအခြေအနေကို လေ့လာနေတာပါ။ ၁၉၈၇ ခုနှစ်မှာ မြန်မာနိုင်ငံမှာ ငွေကြေးအချို့ကို ဖျက်သိမ်းခဲ့ပါတယ်။ အကျိုးဆက်အနေနဲ့ ဘဏ်လုပ်ငန်းတွေ လဲပြိုကုန်တယ်။ မိသားစုတွေ အနေနဲ့ တစ်သက်လုံး စုဆောင်းထားတဲ့ ပိုက်ဆံတွေ အကုန်လုံး သုံးမရဘဲ ဖြစ်ကုန်တယ်။ ရုတ်တရက် ပိုက်ဆံမရှိတဲ့ ဘ၀တွေကို ရောက်ကုန်ကြတယ်။ ဒါတွေက မြန်မာ့ဆိုရှယ်လစ်လမ်းစဉ် ပါတီအပေါ်ကို မကျေနပ်မှုတွေ စတင်ဖြစ်ပေါ် လာစေပါတယ်။ အဲဒီ့နောက်ပိုင်းမှာ နေ၀င်းရဲ့ ဓာတ်ပုံကို မီးရှို့တာတွေ၊ လက်ဖက်ရည်ဆိုင်တွေမှာ မကျေမနပ် ပြောဆိုတာတွေ တွေ့လာရပါတယ်။ ဒါတွေကို အစိုးရက ကိုင်တွယ်တဲ့အနေနဲ့ ပါတီအကြီးတန်း အရာရှိ တစ်ယောက်ကို ဖမ်းတယ်။ ပြီးတော့ ပြန်လွှတ်ပေးလိုက်တယ်။ ဒါကို လူတွေက မကျေနပ်ဘဲ ဆန္ဒဆက်ပြတော့ ပစ်သတ်တာတွေ ဖြစ်ကုန်တယ်။ တကယ်တော့ ၁၉၆၂ ခုနှစ်ကတည်းက ရှိခဲ့တဲ့ မကျေနပ်မှုတွေ ရှိခဲ့တာ ၈၇ မှာလုပ်တဲ့ ရက်စက်မှုတွေကြောင့် ယမ်းပုံမီးကျ ဖြစ်ခဲ့ရတာပါ။ ကျွန်တော် ရန်ကုန်ကို ရောက်လာတဲ့အချိန်မှာ တွေ့ခဲ့ရတဲ့ ကျောင်းသားတွေက ၈ ရက် ၈ လ ၈၈ ၈ နာရီ ၈ မိနစ်မှာ ဆန္ဒပြပွဲတစ်ခုလုပ်ဖို့ စီစဉ်ထားတယ်လို့ ပြောကြတယ်။ ကျွန်တော်ကလည်း အဲဒါတွေ ဘီဘီစီကနေ လွှင့်ပေးလိုက်တယ်။ အဲဒီ့မှာ ဘီဘီစီ နားထောင်တဲ့လူတွေ အကုန်လုံးက တော်လှန်ရေး ဖြစ်တော့မယ်ဆိုတာကို သိသွားကြတယ်။ ၀မ်းနည်းစရာ ကောင်းတာကတော့ စက်တင်ဘာ ၁၈ ရက်မှာ ဒီတော်လှန်ရေးကို စစ်တပ်ကနေ ရက်ရက်စက်စက် ဖြိုခွင်းခဲ့ပါတယ်။ ဒါကြောင့် တော်လှန်ရေးတစ်ခုလုံး ရပ်တန့်ခဲ့ပါတယ်။ ဘာဖြစ်လို့လဲဆိုတော့ ရွေးကောက်ခံ မဟုတ်တဲ့ ရက်စက်တဲ့ စစ်တပ်ကနေ အာဏာသိမ်းခဲ့လို့ပါပဲ။ အစိုးရကနေ ပြည်သူတွေကိုပြန်ပြီး စွပ်စွဲချက်တွေ လုပ်ခဲ့ပါတယ်။

မေး။ မြန်မာနိုင်ငံကို ပြန်မလာခင် ပဲ့တင်သံဂျာနယ်နဲ့ တွေ့ဆုံခဲ့တဲ့ အင်တာဗျူးမှာ ခင်ဗျားပြောခဲ့တာ ရှိပါတယ်။ ၁၉၈၈ ခုနှစ်က အဖြစ်အပျက်တွေကို မြန်မာလူထုက သူ့နည်းသူ့ဟန်နဲ့ ကိုင်တွယ်ဖြေရှင်း လိမ့်မယ်လို့ ပြောခဲ့တာပါ။ ဒီစကားရပ်က ဘာကိုရည်ရွယ်ပြီး ပြောဆိုခဲ့တာပါလဲ။
ဖြေ။ ၁၉၈၈ ခုနှစ်မှာ ဖြစ်ခဲ့တာတွေကို သေချာနားလည်ဖို့ဆိုတာ မြန်မာလူထုတွေအတွက် အရေးကြီးတယ်လို့ ထင်ပါတယ်။ စစ်အေးခေတ် ပြီးဆုံးကတည်းက အစိုးရတွေဟာ အာဏာရှင် စနစ်ကနေ ဒီမိုကရေစီကို ပြောင်းလဲလာကြပါတယ်။ ယခင် ယူဂိုစလားဗီးလားတို့၊ တောင်အာဖရိကတို့၊ တောင်အမေရိကတို့မှာ ဒီလိုမျိုးပြောင်းလဲတဲ့ ဥပမာတွေ ရှိပါတယ်။ ဒီနိုင်ငံတွေမှာ ဖြစ်ခဲ့တာတွေကို ပြန်ပြီးစုံစမ်းဖို့အတွက် စစ်ခုံရုံးတွေ ဖွဲ့ခဲ့ပါတယ်။ အမှန်ကို ဖော်ထုတ်ပြီးတဲ့ အချိန်မှာ ဖိနှိပ်သူတွေ အနေနဲ့ ဒါကိုဖြစ်ခဲ့ကြောင်း ၀န်ခံပေးရပါတယ်။ ဘာပဲဖြစ်ခဲ့ဖြစ်ခဲ့ အမှန်ကို အရင်ဆုံး ဖော်ထုတ်ပေးရပါတယ်။ ပြီးတော့ဒါကို အသိအမှတ် ပြုပေးရတယ်။ တည်ငြိမ်တဲ့ လူ့အဖွဲ့အစည်း တစ်ခုဖြစ်ဖို့ အမှန်တရားကို လစ်လျူရှုထားပြီး နေလို့မရပါဘူး။ လူတွေအနေနဲ့ ဒီလိုပြစ်မှု ကျူးလွန်ခဲ့သူတွေကို ခွင့်လွှတ်ပေးတာက တစ်ပိုင်းပါ။ ဒါပေမယ့် အမှန်တရားကို မဖော်ထုတ်ဘဲ ဖုံးအုပ်ထားရင် ပြုပြင်ပြောင်းလဲရေး လမ်းကြောင်းကို ထိခိုက်နိုင်ပါတယ်။ ဒီပြစ်မှုတွေကို အရေးယူတာတွေဘာတွေ မလုပ်ဘဲ ထားလို့လဲ ရတယ်။ အမှန်ကိုတော့ မဖော်ထုတ်ဘဲ ထားလို့မရပါဘူး။ လူ့အဖွဲ့အစည်းကနေ ဖြစ်ရပ်မှန်နဲ့ ပတ်သက်ပြီး ဘာဆက်လုပ်မလဲ ဆိုတာကတော့ အဲဒီ့လူ့အဖွဲ့အစည်းနဲ့ပဲ သက်ဆိုင်ပါတယ်။

မေး။ မြန်မာနိုင်ငံဟာ ဒီမိုကရေစီ လမ်းကြောင်းပေါ် ရောက်နေပြီလို့ ပြောကြပါတယ်။ ဒါပေမယ့် ပြဿနာများစွာ ရှိနေပါတယ်။ နိုင်ငံရေး ပြဿနာတွေ ရှိနေသေးလို တိုင်းရင်းသား ပြဿနာတွေလည်း ရှိနေပါတယ်။ ခင်ဗျားကရော ဘယ်လိုယူဆပါသလဲ။
ဖြေ။ အရင်ဆုံး ပြောချင်တာကတော့ နိုင်ငံရေး ပုံသဏ္ဍာန်တစ်ခုလုံး ပြောင်းလဲလာတာကို ယုံစားလို့ မရပါဘူး။ ဒီမိုကရေစီ နည်းကျတဲ့ တာဝန်ယူမှုရှိဖို့ လိုပါတယ်။ လက်ရှိ ဆင်းရဲမွဲတေမှုတွေ၊ ဆင်းရဲချမ်းသာ ကွာဟမှုတွေကို ကြည့်လိုက်ပါ။ တိုင်းပြည်ရဲ့ ကြွယ်ဝချမ်းသာမှုတွေဟာ တကယ်လိုအပ်တဲ့ သူတွေဆီကို ရောက်သလား။ စီးပွားရေး၊ လူမှုရေး တန်းတူညီတူရှိမှု ရှိရဲ့လား။ ဖျက်သိမ်းပေးရမယ့် ဥပဒေတွေလည်း ရှိနေတယ်။ ပြောင်းလဲစရာတွေအ များကြီး ကျန်ပါသေးတယ်။ ဒါပေမယ့် မြန်မာနိုင်ငံဟာ လမ်းကြောင်းမှန်ပေါ်ကို ရောက်နေပြီလို့တော့ ထင်ပါတယ်။ လမ်းကြောင်းမှန်တယ် ဆိုပေမယ့် သွားနေရင်းကနေ ရပ်သွားပြီး လမ်းကြောင်းပြောင်းတာမျိုး ဖြစ်တတ်ပါတယ်။ ဒီတော့ လက်ရှိလမ်းကြောင်း မပြောင်းအောင် ဖိအားပေးမှုတွေ ထားရှိဖို့ လိုပါတယ်။ ပြီးတော့ ၁၉၈၈ ခုနှစ်က အနစ်နာခံမှုတွေရဲ့ ကောင်းကွက်တွေ၊ ရည်ရွယ်ချက်တွေကို မမေ့ရပါဘူး။

Eleven Media Group
Created on Wednesday, 07 August 2013 23:57
Written by နေထွန်းနိုင်၊ ဇွဲဝေယံ

No comments:

Post a Comment