Tuesday, 14 May 2013

(၇) ရက်သားသမီးအပေါင်းတို့၏ ကူးတို့ယဉ်အလှူ



ကျော်သူ (နာရေးကူညီမှုအသင်း – ရန်ကုန်)
မေ ၁၄၊ ၂၀၁၃
 

ဗုဒ္ဓဘာသာမြန်မာလူမျိုးတို့သည် ကံ-ကံ၏အကျိုးကို လက်ခံယုံကြည်ကြသူများဖြစ်သလို အလှူဒါန တွင်လည်း မွေးရာပါသဒ္ဒါတရားကြောင့် ရက်ရောစွာ ပေးကမ်းလှူဒါန်း တက်ကြသူများဖြစ်ကြသည်။ ထိုကဲ့သို့ နေ့စဉ်ပြုလုပ်နေကြဖြစ်သော အလှူဒါနကောင်းမှုတို့အပြင် အခါကြီးရက်ကြီးများနှင့် မိမိတို့၏ မွေးနေ့များ၊ မင်္ဂလာနှစ်ပတ်လည်၊ ကွယ်လွန်သွားရှာပြီဖြစ်သော မိမိတို့၏ ဆွေမျိုးမိဘ၊ ညီအစ်ကို မောင် နှမ စသည့်တို့၏ ရက်လည်၊ လလည်၊ နှစ်လည် အစရှိသည့်နေ့ရက်များတွင် ထူးထူးခြာခြား အလှူဒါနကို ပိုမိုပြုလုပ်လေ့ရှိကြသည်ကို တွေ့မြင်နိုင်ကြသည်။

ထိုကဲ့သို့အခြားသော အလှူဒါနများနှင့်မတူ ထူးခြားသော မွေးနေ့အလှူတစ်ခုအား ၁ဝ.၄.၂ဝ၁၃  ရက်နေ့ မွန်းလွဲ (၁းဝဝ) နာရီအချိန်၌ နာရေးကူညီမှုအသင်း(ရန်ကုန်) ရုံးချုပ်တည်ရှိရာ အမှတ်(၁၃/က) ဗိုလ်မှူးဗထူးလမ်း၊ (၄၂) ရပ်ကွက်၊ မြောက်ဒဂုံမြို့နယ်တွင် ကျင်းပပြုလုပ်ခဲ့သည်။ အလှူရှင်ဖြစ်သော မွေးနေ့ရှင် ဒေါ်တင်တင်ထွေး၏ (၃၃) နှစ်မြောက်မွေးနေ့နှင့် (၇) ရက်သားသမီး အလှူရှင်အပေါင်းတို့မှ နာရေးကူညီမှုအသင်း(ရန်ကုန်)တွင် အသုံးပြုရန်အတွက် Nissan AD Van (2008 – Model) အမျိုးအစား ကားတစ်စီး လှူဒါန်းပေးအပ်ခြင်း အခမ်းအနားပြုလုပ်ခဲ့သည်။ အဆိုပါလှူဒါန်းပွဲ အခမ်းအနားသို့ အလှူရှင် ဒေါ်တင်တင်ထွေးမိသားစုနှင့် (၇) ရက်သားသမီး အလှူရှင်များ၊ နာရေးကူညီမှုအသင်း(ရန်ကုန်)မှ ဒု-ဥက္ကဌ ဒေါ်သန်းမြင့်အောင်နှင့် အုပ်ချုပ်ရေးမှူး၊ အလုပ်အမှုဆောင်များ တက်ရောက်ခဲ့ကြ ပြီး အလှူရှင်မှ “နာရေးကူညီမှုအသင်း(ရန်ကုန်)၏ လုပ်ဆောင်မှုများကို ကိုယ်တိုင်ပါဝင် ကူညီဆောင်ရွက်ချင်သော်လည်း  ပါဝင်ကူညီရန်မှာ မိမိတို့အတွက် မဖြစ်နိုင်သေးသဖြင့် ယခုလိုမွေးနေ့မှာ (၇) ရက် သားသမီးအလှူရှင် အပေါင်းတို့နှင့် လက်တွဲပြီး တစ်တပ်တစ်အား ပါဝင်သည့်အနေဖြင့် နာရေးကူညီမှုအသင်း (ရန်ကုန်)တွင် အကျိုးရှိစွာ အသုံးပြုနိုင်ရန်အတွက် AD Van ကားတစ်စီးအား လှူဒါန်းရခြင်းဖြစ်ပါကြောင်း” ဝမ်းမြောက် ဝမ်းသာ ပြောကြားသွားခဲ့သည်။  ထို့နောက် မော်တော်ယာဉ်လှူဒါန်းပေးခြင်းစာချုပ်အား အလှူရှင် ဒေါ်တင်တင်ထွေးနှင့် နာရေးကူညီမှုအသင်း(ရန်ကုန်)မှ အုပ်ချုပ်ရေးမှူး ဒေါ်ဧရာမောင်မောင် တို့မှ လက်မှတ်ရေးထိုးပေးခဲ့ကြပြီး မော်တော်ယာဉ်နှင့် ပတ်သက်သည့် စာရွတ်စာတမ်းများအား အလှူရှင်မှ ပေးအပ်ရာ ဒု-ဥက္ကဌ ဒေါ်သန်းမြင့်အောင်နှင့် အလုပ်အမှုဆောင်များတို့မှ လက်ခံရယူကြပြီး ဂုဏ်ပြုမှတ် တမ်းလွှာ ပြန်လည်ပေးအပ်ခဲ့ပြီးနောက် ဒု-ဥက္ကဌ ဒေါ်သန်းမြင့်အောင်မှ ကျေးဇူးတင်စကား ပြန်လည် ပြောကြားရာတွင် “နာရေးကူညီမှုအသင်း(ရန်ကုန်)၏ သက်တမ်း (၁၂) ကျော်ကာလသို့ ရောက်ရှိလာချိန် တွင် ယခုလို လူမှုရေးလုပ်ငန်းများ တဆင့်ပြီးတဆင့် ပိုမိုတိုးတက် လုပ်ဆောင်နိုင်ခဲ့ခြင်းမှာ အလှူရှင် အ ပေါင်းတို့၏ စေတနာသဒ္ဒါတရား ထက်သန်စွာ ပံ့ပိုးမှုတို့ကြောင့် ယခုကဲ့သို့ တိုးတက်လာခြင်းဖြစ်ကြောင်း၊ အသင်းအနေဖြင့် နေ့စဉ် နာရေးကူညီမှု (၃၅ – ၅ဝ) ဝန်းကျင်ခန့်အထိ ကူညီမှုပေးနေရပြီး ရာသီဥတု ပူပြင်းချိန်တွင် ရံဖန်ရံခါ (၇ဝ) ဦးကျော်ခန့်အထိ ကူညီပေးနေရကြောင်း ယခု အလှူရှင်များတို့မှ လှူဒါန်း လိုက်သော မော်တော်ယာဉ်သည် အသင်းအတွက်လွန်စွာမှ အသုံးဝင်မည်ဖြစ်ကြောင်းနှင့် ဖြူစင်လွန်းလှ သည့် အပြစ်မဲ့ကလေးသူငယ်လေးများ၏  ဈာပနများ သယ်ယူသင်္ဂြိုလ်ပေးရာတွင် အသုံးပြုသွားမည်ဖြစ် ကြောင်း” ကျေးဇူးတင်စကား ပြောကြားခဲ့သည်။
မွေးနေ့ရှင် (အလှူရှင်) ဒေါ်တင်တင်ထွေးနှင့် (၇) ရက်သားသမီးများမှ စုပေါင်းလှူဒါန်းသော နိဗ္ဗာယာဉ်ငယ်လေးသည် ရခဲလှစွာသော လူဘဝသို့ ခဏတာရောက်ရှိပြီး လူ့လောကတွင် အကုသိုလ်ဟူ၍ မြူမှုံငယ်လေးမျှပင် မပြုလုပ်ရပါပဲ ကံ-ကံ၏ အကျိုးဆက်တို့ကြောင့် လူ့လောကကြီးမှ ထွက်ခွာသွား ရရှာသော အပြစ်မဲ့ကလေးငယ်များ၏ တစ်ဘဝတာ ဖောင်ကူးတို့အား ဆောင်ပို့စရာ ကူးတို့ယာဉ်ကလေး လည်းဖြစ်သည်။ ထိုဖြူစင်လှသော အပြစ်မဲ့ကလေးငယ်များ၏ ဘဝနေဝင်ချိန် အပြန်ခရီးတွင် ချောမွေ့ လွယ်ကူစွာ ကူးတို့ပို့နိုင်စေရန် လွန်စွာမှပင် အသုံးဝင်လှသလို ကျန်ရစ်သူ မိဘဆွေမျိုး ညီအစ်ကို မောင်နှမများ၏ အပူမီးအားလည်း တစိတ်တဒေသ ပြေပျောက်ငြိမ်းအေးစေမည်ဖြစ်သည်။ နိဗ္ဗာန်ယာဉ် လှူဒါန်းရသော ကောင်းမှုအကျိုးဆက်တို့ကြောင့် ဤသံသရာတွင် ကျင်လည်နေသမျှ ကာလပါတ်လုံး ကျန်းမာခြင်းသုခ၊ ချမ်းသာခြင်းသုခတို့နှင့် ပြည့်စုံပြီးလျှင် နိဗ္ဗာန်ကူးတို့ ဆောင်ပို့ပေးစေနိုင်သော ကုသိုလ် အုတ်မြစ်အဟုန်တို့ကြောင့် သံသရာမှ ကျွတ်လွတ်ကြသည့် အချိန်တွင်လည်း နိဗ္ဗာန်ခေမာ သောင်ကမ်း သာသို့ လွယ်ကူလျှင်မြန်စွာ ကူးပြောင်းရောက်ရှိနိုင်ကြပါစေသားဟု ဆုမွန်ခြွေလိုက်ရပါတော့သည်။
အလှူရှင်အပေါင်းတို့နှင့် (၇) ရက်သားသမီးအပေါင်းတို့ ကိုယ်စိတ်နှစ်ဖြာ ကျန်းမာချမ်းသာနိုင်ကြပါစေ။

သတင်း မိုးမခမီဒီယာ ...

No comments:

Post a Comment