Wednesday 10 July 2013

ဟိုင်းကြီးကျွန်းတံတားဆောက်၊ အိမ် ၃ဝဝ ကျော် ရေထဲရောက်


Wednesday, July 10, 2013




  ဧရာဝတီတိုင်း ငပုတောမြို့နယ် ဟိုင်းကြီးကျွန်းမြို့နယ်ခွဲ ခမောက်မော်ကျေးရွာတွင်  အိမ်ခြေ ၃၀၀ ကျော် ရေနစ်မြုပ်သွားရခြင်းသည် ထိုဒေသတွင် တည်ဆောက်နေသည့် ဟိုင်းကြီးကျွန်းမြစ်ကူးတံတား စီမံကိန်းကြောင့် ဖြစ်သည်ဟု ဒေသခံတို့က ပြောသည်။



တံတားစီမံကိန်းအနီး ရေဘေးဒုက္ခ ရင်ဆိုင်နေရသည့် ခမောက်မော်ကျေးရွာ   (ဓာတ်ပုံများ - ဆလိုင်းသန့်စင်/ဧရာဝတီ)
 ဒီရေအတက်အကျဖြင့် ရေစီးနေသည့်ချောင်း ၂ ခုကို ပိတ်ဆို့ပြီး  မြစ်ကူးတံတား ချဉ်းကပ်လမ်း ဖောက်လုပ်ခဲ့သည့်အတွက်  ကျောက်ချောင်းကျေးရွာအုပ်စုအတွင်းရှိ ထိုရွာအတွင်းသို့ ချောင်းရေများ   ၀င်ရောက်ကာ နေအိမ်များ နစ်မြုပ်ခြင်း ဖြစ်ကြောင်း၊ လူပေါင်း ၁,၀၀၀ ကျော် ရေဘေးဒုက္ခခံစားနေရကြောင်း  ဒေသခံများက ပြောသည်။

 “လမ်းတံတား အထူးအဖွဲ့ ၂ က လမ်းနဲ့ချောင်းကိုပိတ်ဆို့ထားတယ်။ အဲဒီတော့ ကျေးရွာမှာ ရေတွေ လျှံနေတယ်။ အခုဆို ရေမြုပ်နေတာ ၂ လ နီးပါး လောက်ရှိနေပြီ။ ၀ပ်နေတဲ့ရေတွေကို ရေစုပ်စက်တွေနဲ့ ပင်လယ်ထဲကို စုပ်ထုတ်ပစ်တာလည်း ခဏပဲ ရတယ်။ အဆင်မပြေဘူး။
 မိုးရွာရင် ချောင်းရေကစီးစရာမရှိဘဲ ရွာထဲပြန်ဝင်တော့ ပိုဆိုးတယ်” ဟု ကျောက်ချောင်း  အုပ်ချုပ်ရေးမှူး ဦးနိုင်လွင်က ဧရာဝတီကိုပြောသည်။

 ဟိုင်းကြီးကျွန်းမြစ်ကူးတံတားသည် ရေလမ်းခရီးဖြင့်သာ သွားလာနိုင်သည့် ဟိုင်းကြီးကျွန်းမြို့နှင့် ပုသိမ်သို့ ဆက်သွယ်ပေးမည့် တခုတည်းသော ကားလမ်းဖြစ်ပြီး မြန်မာပြည်အနောက်တောင်ဘက်စွန်း ပင်လယ်ဝတွင် တည်ဆောက်နေသည့် တံတားတစင်းလည်း ဖြစ်သည်။

 တံတားချဉ်းကပ်လမ်းအား မူလက ကျောက်တိုင်များဖြင့်တည်ဆောက်ရန် ပုံကြမ်းဆွဲ၍ သတ်မှတ်ထားကြောင်း၊
နောက်ပိုင်းတွင် မြေသားလမ်းတည်ဆောက်ခဲ့ခြင်းဖြစ်ကြောင်း ဒေသခံများက ပြောသည်။

 “သူတို့ တံတားပုံကြမ်းမှာ ချဉ်းကပ်လမ်းကို တိုင် ၄ တိုင်နဲ့ ဆောက်ဖို့ဆွဲထားတာ တွေ့ရတယ်။ ဒါဆိုရင်တော့ ဘာမှ ပြဿနာ မရှိဘူး။ အားလုံး အဆင်ပြေမှာလို့တွက်ထားတာ။
တကယ်ဆောက်တော့ တိုင်တွေမဟုတ်ဘဲ ချောင်းတွေကို ကန့်လန့်ဖြတ်ပိတ်တဲ့ မြေသားလမ်းဖြစ်နေတယ်” ဟု အုပ်ချုပ်ရေးမှူးက ပြောသည်။


ရေပုပ်တွေဝင်လို့ ပျက်စီးသွားတဲ့  ခမောက်မော်ကျေးရွာက သောက်သုံးရေတွင်းတခု 
 ချဉ်းကပ်လမ်းဖောက်လုပ်စဉ်က ချောင်း ၂ ခုအား ပိတ်ဆို့မည့် ကိစ္စကို လမ်းတံတားအဖွဲ့က ကျေးရွာအုပ်ချုပ်ရေးအဖွဲ့နှင့် ကျေးရွာလူထုအား အသိပေးတိုင်ပင်ခြင်း
မရှိဘဲ ၎င်းတို့ သဘောထားဖြင့် ဖောက်လုပ်ခဲ့ခြင်းဖြစ်ကြောင်း၊
ရွာအတွင်းရေ၀င်၍ ရွာသားများ ဒုက္ခရောက်နေသော်လည်း ဟိုင်းကြီးကျွန်းမြို့နယ်ခွဲ အုပ်ချုပ်ရေးမှူးသာ လာရောက်ခဲ့ပြီး အဓိကတာဝန်ရှိသည့် လမ်းတံတားအဖွဲ့က လာရောက်ဖြေရှင်းပေးခြင်း မရှိကြောင်း  ဦးနိုင်လွင်က ဆိုသည်။

 တံတားကိစ္စနှင့်ပတ်သတ်၍ ဧရာဝတီက ငပုတောမြို့နယ် ထွေ/အုပ်ရုံးသို့ ဆက်သွယ်မေးမြန်းရာ အုပ်ချုပ်ရေးမှူး ဦးဝင်းကိုကိုက ...
 “ခမောက်မော်ရွာရေမြုပ်နေတဲ့ ကိစ္စကို အဆင်ပြေအောင် အမြန်ဆုံးလုပ်ပေးဖို့ ဟိုင်းကြီးကျွန်းမြို့နယ်ခွဲ အုပ်ချုပ်ရေးမှူးကို ကျနော်ညွှန်ကြားထားပါတယ်။ ၀ပ်နေတဲ့ရေတွေ ထုတ်ပစ်ဖို့ ရေနုတ်မြောင်းတခု ဖောက်လုပ်ဖို့လည်း စီစဉ်နေပါတယ်”ဟု ပြောသည်။


ကျေးရွာ၏ ၃ ပုံ ၂ ပုံ ရေနစ်မြုပ်သည့်အတွက် ရွာသားများအသုံးပြုနေသည့် ရေတွင်းများ၊ လမ်းများပျက်စီးခြင်း၊ ကလေးငယ်များတွင် ယားနာပေါက်ခြင်းနှင့် ၀မ်းဖောဝမ်းရောင်ရောဂါများ ဖြစ်ပွားနေကြောင်း သိရသည်။

 “ရေမြုပ်တော့ ကျမတို့ဈေးသည်တွေ ထိခိုက်တယ်။ အရောင်းအ၀ယ်လည်း မကောင်းဘူး။ ခြင်တွေကလည်း တအားကိုက်တယ်။ ရေတွေက စီးစရာမရှိဘဲ အိုင်နေတော့ ကြာလာတော့ပုပ်လာပြီးတော့ နံလည်းတအားနံတယ်။ အနံ့ဆိုးဒဏ်တွေကို တအားခံရတယ်။ ကျမတို့ရွာမှာ တခါမှဒီလိုမဖြစ်ဖူးဘူး”
ဟု ခမောက်မော်ရွာမှ ဈေးသည်တဦးက ပြောသည်။

 ခမောက်မော်ကျေးရွာသည် ၂၀၀၈ ခုနှစ်က တိုက်ခတ်ခဲ့သည့် နာဂစ်မုန်တိုင်းဒဏ်ခံခဲ့ရသည့် ကျေးရွာတခုဖြစ်ပြီး ပင်လယ်ဝတွင်တည်ရှိသည်။
လက်ရှိတွင် အိမ်ခြေ ၄၀၀ ကျော်ရှိကာ လူဦးရေ ၁,၇၀၀ ကျော် ရှိသည်။

 “ကျနော်တို့တောင်းဆိုချင်တာကတော့ လမ်းတံတား ကျွမ်းကျင်တဲ့သူတွေ အမြန်ဆုံး လာရောက်ပြီး နောက်နောင်အခုလို ရေမြုပ်တာတွေမဖြစ်ရအောင် စီမံဆောင်ရွက် ပေးစေလိုပါတယ်” ဟု ကျေးရွာအုပ်စုအုပ်ချုပ်ရေးမှူးက ပြောသည်။


သတင်း   ဧရာဝတီ

No comments:

Post a Comment