Thursday, June 20, 2013
လက်ပံတောင်းတောင်အရေးတွင် မီဒီယာများသို့ ပြောကြားခဲ့သော စကားများနှင့် ပတ်သက်ပြီး ဖမ်းဝရမ်းထုတ်ခံထားရကြောင်း အထင်ကရ လှုပ်ရှားတက်ကြွသူများက ပြောသည်။
(ဓာတ်ပုံ - ဧရာဝတီ)
ရန်ကုန်တိုင်းဒေသကြီး ရဲတပ်ဖွဲ့က ဖမ်းဆီးရန် ယနေ့ စတင်ဆောင်ရွက်နေပြီဖြစ်ကြောင်း ပြည်သူ့အကျိုးဆောင်ကွန်ယက်မှ ကိုဝေဠုနှင့် ကိုဝေမှူးသွင်၊ မျိုးဆက်သစ်လူငယ်များအစည်းအရုံးမှ ကိုမိုးသွေးတို့က ပြောပြသည်။
“ကျနော်တို့ကို ဖမ်းဖို့ ဒီမနက်ပဲ သတင်းရောက်လာတယ်။ မုံရွာမြို့နယ်တရားရုံးက ကျနော်တို့ကို ဒီလ အစောပိုင်းက ဖမ်းဝရမ်း ထုတ်ထားတာကိုလည်း မုံရွာမြို့ အမှတ် ၁ ရဲစခန်းက အတည်ပြုတယ်။ ကျနော်တို့က မုံရွာကိုလာပြီး တရားရင်ဆိုင်မလား၊ ရန်ကုန်မှာ လာခေါ်ရမလားဆိုတာကို ရဲအုပ် ခင်ဇော်လတ်က ဆက်သွယ်ပြီး မေးတယ်။ ၀ရမ်းထုတ်ထားတာကတော့ နိုင်ငံတော် အကြည်အညိုပျက်စေမှု ပုဒ်မ ၅၀၅(ခ) နဲ့” ဟု ၈၈ မျိုးဆက်ကျောင်း သားများ အဖွဲ့ရုံးခန်း၌ ယနေ့ ကျင်းပသော သတင်းစာရှင်းလင်းပွဲတွင် ကိုဝေဠုက ပြောသည်။
စာနယ်ဇင်းသားများနှင့် တွေ့ဆုံစဉ် ပြောကြားခဲ့သော စကားများတွင် နိုင်ငံ တော်ကို အကြည်အညိုပျက်စေသော ပြောဆိုချက်များပါဝင်သည်ဟု ဆိုကြောင်း၊ ရဲတပ်ဖွဲ့က အထောက်အထား များဖြင့် တရားရုံးသို့ တရားစွဲဆိုရန် တင်ပြခဲ့ပြီး ဖမ်းဝရမ်းထုတ်ခဲ့ခြင်းဖြစ်ကြောင်း ကိုမိုးသွေးက ဆိုသည်။
၎င်းတို့အပေါ် အရေးယူခြင်းသည် ဒေသဆိုင်ရာ အာဏာပိုင်များက လွဲမှားစွာပြုမူဆောင်ရွက်ခြင်း ဖြစ်သောကြောင့် နိုင်ငံတော်အတွက်လည်း သိက္ခာကျစရာ လုပ်ရပ်များဟု မိမိခံစားမိကြောင်း ၎င်းက ဆက်ပြောသည်။
“မီဒီယာတွေမှာ ပြောတဲ့စကားအရ တဲ့။ အခုက ဒီမိုကရေစီအသွင်ကူးပြောင်းနေချိန်မှာ ဒီလို မီဒီ ယာတွေမှာ ပြောတာကြောင့်ဖမ်းတယ်ဆိုတာ တကယ်တော့ ၂၀၁၀ ခုနှစ် အရှေ့ပိုင်းက အစိုးရအဖွဲ့မှာသာ ရှိခဲ့တာ။ အခု ဒီအစိုးရလက်ထက်မှာပါ ဒါမျိုး လုပ်လာတယ်ဆိုတော့ နောက်ပြန်ဆွဲတဲ့လုပ်ရပ်တစ်ခုလို ဖြစ်လာတယ်” ဟု ကိုဝေဠုက ဆိုသည်။
ကိုဝေမှူးသွင်က ...
လက်ပံတောင်းတောင်ဒေသတ၀ိုက် ပုဒ်မ ၁၄၄ ထုတ်ပြန်ထားသောအချက်များကိုသာ အဓိက ပြောဆိုခဲ့ခြင်း ဖြစ်ကြောင်း၊ ၎င်းတို့ သွားသည့် ရည်ရွယ်ချက်က အကြမ်းဖက်မှုများ ထပ်မံမဖြစ်ပွားစေရေး အတွက် ညှိုနှိုင်းရန်ဖြစ်ကြောင်း၊ အစိုးရ တာဝန်ရှိသူများနှင့် တွေ့ဆုံရန် ကြိုးစားခဲ့သော်လည်း တွေ့ဆုံခွင့်မရခဲ့ကြောင်း
ပြောပြသည်။
ကိုဝေဠုက ရှင်းပြရာတွင် ...
ထိုနေရာတွင် ပုဒ်မ ၁၄၄ ထုတ်ပြန်ထားချက်မှာ ၂၀၀၈ ဖွဲ့စည်းပုံအခြေခံဥပဒေနှင့် ကိုက်ညီမှုမရှိဟုသာ ပြောဆိုခဲ့ခြင်း ဖြစ်ကြောင်း၊ ဝေဖန်ပုတ်ခတ်မှုများ၊ ဆူပူမှုများထပ်မံဖြစ်ပွား စေရန်သွေးထိုးလှုံ့ဆော်သော ပြောဆိုချက်များ မပါခဲ့ကြောင်း
စသည့် အချက်များ ပါဝင်သည်။
“လက်ပံတောင်းမှာ ကျနော့်ကို တရာခံပြေးဆိုပြီး ပစ်စာဆန်ဆန် စာတွေနဲ့ ကြေညာတယ်။ ဒီကြေညာချက်နဲ့ ပက်သက်ပြီး မြန်မာဂျာနယ်လစ်ကွန်ယက်ရုံးခန်းက သတင်းစာရှင်းလင်းပွဲမှာ ကျနော်က တရားခံပြေးလို့ ကြေညာတာ လက်မခံဘူး။ အမှုရင်ဆိုင်ဖို့အတွက် တရားခံပြေးစာရင်းက ရုတ်သိမ်းပြီး အမှုလာရင်ဆိုင်ဖို့ခေါ်ပါ ဆိုပြီး တရားဝင်ပြောတယ်။ အဲဒီနောက် ၃ ရက်ကျော်မှာ ဒေါ်မြင့်မြင့်အေးတို့ကို အစည်းအဝေးတက်ဖို့ စာနဲ့ခေါ်ပြီးမှ အာမခံပေးလို့မရတဲ့ ပုဒ်မနဲ့ နေ့ချင်းပြီး ဖမ်းဆီး ထောင်ထဲပို့တယ်။ နောက်ထပ် ၃ ရက်အကြာမှာ ကျနော်တို့ကို အာမခံပေးလို့မရတဲ့ ပုဒ်မနဲ့ ၀ရမ်းထုတ်တယ်” ဟု ကိုဝေဠုက ဆိုသည်။
ဝရမ်းထုတ်ပြီး ဖမ်းဆီးရန် ပြုမူနေခြင်းကို ၈၈ မျိုးဆက်ကျောင်းသားများအဖွဲ့က ကန့်ကွက်လိုက်သည်။
“ကျနော်တို့အားလုံး ၀ိုင်းဝန်းပြီး တိုင်းပြည်တိုးတက်ဖို့ ဆောင်ရွက်နေတယ်။ ကျနော်တို့ သွားခဲ့တာကလဲ လက်ပံတောင်း အစီရင်ခံစာအကောင်ထည်ဖော်ရေး ကော်မတီ၊ ဒေသဆိုင်ရာအာဏာပိုင်နဲ့ ဒေသခံများအကြားမှာ အကောင်းဆုံး ပြေလည်အောင် ဆောင်ရွက်နိုင်မယ့် နည်းလမ်းတွေကို ရှာဖို့ သွားခဲ့ကြတာ” ဟု ၀ရမ်းထုတ်ခံထားရသူ ၃ ဦးနှင့် အတူ လက်ပံတောင်းသို့ သွားခဲ့သော ၈၈ အဖွဲ့မှ ကိုအောင်သူက ပြောသည်။
ဧရာဝတီ
No comments:
Post a Comment