Saturday 5 January 2013

အညတြသူရဲကောင်း ကိုဖြိုးဝေအောင်ကိုအလေးပြုခြင်း

ကိုဖြိုးဝေအောင်




ကိုဖြိုးဝေအောင်ဆုံးပြီတဲ့ ။ အဲဒီသတင်းဆိုးကိုဖတ်မိလိုက်တာနဲ့ ကျနော်မျက်ရည်ကျတယ် ။ ဖြတ်သန်းခဲ့ပြီးတဲ့ တော်လှန်ရေးခရီး ၂၄နှစ်ကျော်ကာလအတွင်းမှာ ရဲဘော်ရဲဘက်တွေ သေဆုံး-ကျဆုံးကြတာ အကြိမ်ကြိမ်ကြုံဘူး ၊ ဒီ လိုပဲ မျက်ရည်အကြိမ်ကြိမ်ကျဘူးခဲ့ပြီဆိုပေမဲ့ စိတ်ခံစားမှုက မရင့်ကျက်နိုင်သေးဘူး ။ နာကျင်ကြေကွဲမှုတွေနဲ့ နာကျည်းဒေါသဖြစ်ရမှုတွေဟာ အချိန်ကာလကြောင့်အနည်ထိုင်မသွားပဲ ထပ်ထပ်ပဲတိုးလာနေရတယ် ။


တကယ်ဆိုရင် ပညာတတ်အင်ဂျင်နီယာတစ်ယောက်ဖြစ်တဲ့ ကိုဖြိုးဝေအောင်ရဲ့ ၃၃နှစ်ဆိုတဲ့ အသက်အရွယ်ဟာ လူ့ ဘဝမှာ အကျန်းမာဆုံး ၊ မိသားစုဘဝကို အတည်ဆောက်နိုင်ဆုံး ဖြစ်ရမဲ့ အရွယ်ကောင်းပါ ။ မိဘ ၊ သားသမီးနဲ့ဇနီး ၊ အပေါင်းအသင်းမိတ်ဆွေတွေနဲ့ လူသားပီသစွာ ချမ်းမြေ့ပျော်ရွှင်နေနိုင်ရမဲ့ အရွယ်ကောင်းပါ ။ ခုလိုဝေဒနာဆိုးတွေခံ စားပြီး လူ့လောကကိုစွန့်ခွာသွားရမဲ့အချိန် မဟုတ်သေးပါဘူး ။ ခုတော့ သူ့အမေလည်း ငိုကြွေးနေရပြီ ။ သူ့ဇနီးလည်း ခိုကိုးရာမဲ့ပြီ ။ လူမမယ် သူ့သားနဲ့သမီးလေးနှစ်ယောက်လည်း အဖေခေါ်စရာမဲ့ခဲ့ရပြီ ။

ကိုဖြိုးဝေအောင်ကွယ်လွန်ခြင်းဟာ သာမန်သေဆုံးမှုမဟုတ်ဘူး ။ ဒီမိုကရေစီရေး ၊ လူ့အခွင့်အရေးနဲ့ ပြည်တွင်းငြိမ်း ချမ်းရေးတွေအတွက် စစ်အာဏာရှင်စနစ်ဆိုးတိုက်ဖျက်ရေးမှာ တစ်တပ်တစ်အားပါဝင်ရင်း တော်လှန်ရေးခရီးတစ်နေ ရာမှာ သူရဲကောင်းပီသစွာကျဆုံးခဲ့တာပဲဖြစ်တယ် ။

ဟုတ်တယ် ။ စစ်အာဏာရှင်တွေရဲ့စစ်ကြောရေးစခန်းက မတရားညှင်းပန်းနှိပ်စက်မှုမျိုးစုံတွေကြောင့်နဲ့ လူသားဖြစ် တည်မှုကိုတန်ဖိုးမထားတဲ့ အကျဉ်းထောင်ထဲကကျန်းမာရေးဥပေက္ခာပြုမှုတွေကြောင့် ကိုဖြိုးဝေအောင်ဟာ အချိန်မ တန်ခင်ကြွေလွင့်ခဲ့ရတာဖြစ်တယ် ။ ကိုဖြိုးဝေအောင်ကို စစ်အာဏာရှင်စနစ်က သတ်လိုက်တာပဲဖြစ်တယ် ။

ရန်ကုန်တိုင်းစစ်ဒေသမှုး ဗိုလ်မှုးကြီးအုန်းချို ၊ ဗိုလ်ကြီးသန့်စင်သိန်း ၊ ကြံ့ဖွတ်ဦးမောင်လေးတို့အပါအဝင် အာဏာပိုင် အသိုင်းအဝိုင်းတွေ သေဆုံးအထိအခိုက်များခဲ့တဲ့ ၂၀၁၀ခုနှစ် သင်္ကြန်မဏ္ဍပ်ဗုံးကွဲမှုမှာ ကိုယ်တိုင်ပါဝင်သူတစ်ယောက် ဖြစ်တယ်လို့ ၊ ရဲချုပ်ခင်ရီက သတင်းစာရှင်းပွဲမှာ ကမ္ဘာသိ တဘက်သတ်စွတ်စွဲပြောဆိုပြီး ခုခံချေပခွင့်မဲ့ မတရား သေဒါဏ်ချမှတ်ခံခဲ့ရတယ် ။ ထောင်ထဲမှာ တိုက်ပိတ်အကျဉ်းသားအဖြစ် တစ်ယောက်ထဲနေခဲ့ရတဲ့ ၂ နှစ်ကျော်ကာလ မှာ အသည်းရောဂါ ဖြစ်လာခဲ့တယ် ။ ထောင်ကို ဖိနှိပ်ရေးယန္တယားနဲ့ ၊ အနိုင်ကျင့်နှိပ်စက်ရေးဌာနအဖြစ်သာအသုံး ပြုတဲ့ စစ်အာဏာရှင်ခေတ်မှာ ထောင်ထဲမှာရောဂါဖြစ်ရင် ဘယ်အကျဉ်းသားမှ ဖြစ်လာတဲ့ရောဂါအတွက် လုံလောက် တဲ့ကျန်းမာရေးကုသမှု မရဘူး ။ အထူးသဖြင့် နိုင်ငံရေးသမားတွေကိုဆိုရင် နောင်ကျဉ်သွားအောင် ၊ မှတ်သွား အောင်ဆိုတာမျိုး ရည်ရွယ်ချက်ရှိရှိနဲ့ ဆေးကုသမှုမပေးပဲ ပစ်ထားတာမျိုးတွေ ပိုလုပ်တတ်တယ် ။ အဲဒီဒါဏ်ကို ကိုဖြိုးဝေအောင် အလူးအလဲခံခဲ့ရတယ် ။ သာမန် အသည်းရောဂါကနေ အသည်းကင်ဆာအဆင့်ဖြစ်လာခဲ့တယ် ။ နှိပ်စက်ခံထားရတာတွေ ၊ တိုက်ပိတ်ခံထားရတာတွေနဲ့ အသည်းကင်ဆာရောဂါတွေပေါင်းပြီး အောက်ပိုင်းသေဝေဒနာ သည်ဘဝကို ရောက်ခဲ့ရတယ် ။ ဆေးရုံတင်မကုရင် မဖြစ်တော့တဲ့အခြေအနေဆိုးကိုရောက်လို့ အင်းစိန်ဆေးရုံမှာ ဆေးကုသခွင့်ရပေမဲ့ အောက်ပိုင်းသေနေတဲ့လူတယောက်ရဲ့ခြေကို သံခြေကျင်းခတ်ပြီး ကုတင်တိုင်နဲ့သံကြိုးတွဲချည် နှောင်ထားတာမျိုး လူ့အခွင့်အရေးချိုးဖေါက်မှုတွေကို ခံခဲ့ရတယ် ။ မကျူးလွန်ခဲ့တဲ့အကြောင်းအရာအတွက် မတရား ချမှတ်ခံခဲ့ရတဲ့သေဒါဏ်အမိန့်ကို သမ္မတရဲ့လွတ်ငြိမ်းချမ်းသာခွင့်နဲ့လွှတ်ပေးလိုက်တယ်ဆိုပေမဲ့ ၊ ကိုဖြိုးဝေအောင် ထောင်ကလွတ်မြောက်လာတဲ့အချိန်မှာ အသည်းကင်ဆာရောဂါက တားဆီးမရနိုင်တော့အောင်ကျွမ်းနေပြီဖြစ်တယ် ။ ဒါကြောင့် ကျွန်တော် ခိုင်ခိုင်မာမာပြောရဲတယ် ။ နာနာကျည်းကျည်းပြောမယ် ။ ကိုဖြိုးဝေအောင်ကို စစ်အာဏာရှင်တွေ သတ်တာ…။ ဒါ..အသေအချာပဲ ။

ကိုဖြိုးဝေအောင်ဟာ နိုင်ငံရေးနယ်ပယ်ထဲမှာ ထင်ရှားသူတစ်ယောက်တော့ မဟုတ်ခဲ့ပါဘူး ။ ဒါပေမဲ့သူဟာ စစ်အာ ဏာရှင်ဆန့်ကျင်ရေးတိုက်ပွဲတွေမှာ ပါဝင်ခဲ့တယ် ။ အစ္စလာမ်ဘာသာဝင်တစ်ယောက်ဖြစ်ပေမဲ့ ဗုဒ္ဓဘာသာဘုန်းကြီး တွေရဲ့ ရွှေဝါရောင်တော်လှန်ရေးကို ထောက်ခံအားပေးပြီး ကိုယ်တိုင်ပါဝင်ခဲ့တယ် ။ မတရားစွတ်စွဲပြီး အမှုဆင်ဖမ်းဆီး ခံရချိန်မှာလည်း ကြောက်ရွံ့မနေခဲ့ဘူး ။ စစ်အာဏာရှင်တွေရဲ့အနိုင်ကျင့်နှိပ်စက်မှုတွေကို ရဲရဲဝံ့ဝံ့ဖေါ်ထုတ်ပြောကြားခဲ့ တယ် ။ အာဏာပိုင်တွေအသင့်ရေးထားပေးတဲ့ ညွှန်ကြားချက်စာရွက်ကိုလာဖတ်ပြယုံပဲဆိုရင် ဘယ်လိုအမှန်တရား ဖြစ်မှာလည်းလို့ တရားသူကြီးတွေကိုပြန်ပြောလို့ တရားရုံးကိုမထေမဲ့မြင်ပြုမှုဆိုတာမျိုးအရေးယူခံခဲ့ရတယ် ။ ထောင် ထဲမှာ တိုက်ပိတ်ခံထားရပေမဲ့လည်း အာဏာပိုင်တွေရဲ့မတရားမှု ၊ အကျဉ်းသားတွေရဲ့လူ့အခွင့်အရေးချိုးဖေါက်ခံနေရ မှုတွေကို လေ့လာမှတ်သားပြီး တစ်ချိန်မှာစာတမ်းပြုစုမယ်ဆိုတာမျိုးထိ ရည်မှန်းထားခဲ့တယ် ။ အဲဒီအချက်တွေကို မစ္စတာကင်တားနားနဲ့တွေ့ခွင့်ရခဲ့တဲ့အချိန်မှာလည်း ဖေါ်ထုတ်ပြောပြခဲ့တယ် ။ သေဒါဏ်ကနေ လွတ်ငြိမ်းချမ်းသာ ခွင့်ရခဲ့ပေမဲ့လည်း မတရားအမှုဆင်ခံခဲ့ရတာဖြစ်တယ်ဆိုတာကို အယူခံတင်ဖို့နဲ့ သူုအဖမ်းခံရတာဟာ အာဏာ ရှင်စနစ်ဆိုးကြောင့်ဖြစ်တယ်ဆိုတာ သတင်းစာရှင်းလင်းပွဲလုပ်ဖို့ ကြိုးစားခဲ့တယ် ။ ဆိုးရွားလွန်းနေတဲ့ ကျန်းမာရေး အခြေအနေကြောင့်သာ မလုပ်ဖြစ်ခဲ့တာဖြစ်ပါတယ် ။ အဲဒီတော့ မြင်တွေ့ခဲ့ရတဲ့သမိုင်းတွေအရ ကိုဖြိုးဝေအောင်ဟာ အညတရသူရဲကောင်းတစ်ယောက်ဖြစ်တယ်လို့ ကျွန်တော် ဂုဏ်ပြုသတ်မှတ်ပါတယ် ။

ဒီမိုကရေစီ တော်လှန်ရေးကြီးမှာ ပါဝင်ဆောင်ရွက်ခဲ့ကြတဲ့ ၊ ပါဝင်ဆောင်ရွက်နေဆဲဖြစ်တဲ့ ၊ ရဲဘော်ရဲဘက်အားလုံး ကလည်း ကိုဖြိုးဝေအောင်ကို စစ်အာဏာရှင်ဆန့်ကျင်ရေးတိုက်ပွဲဝင်ရင်း ကျဆုံးခဲ့ရတဲ့ အညတရသူရဲကောင်းတစ် ယောက်အဖြစ် အသိအမှတ်ပြုပေးကြဖို့ ၊ ပြည်တွင်းပြည်ပအင်အားစုအားလုံးအနေနဲ့ ကျန်ရစ်သူမိသားစုကို ကူညီပံပိုး အားပေးကြဖို့ တိုက်တွန်းနှိုးဆော်ပါတယ် ။

ကိုဖြိုးဝေအောင်ဟာ သူ့အတွက်အမှန်တရားမရရှိခင် ၊ သူ့ပြည်သူတွေအတွက် အမှန်တရားမရရှိခင် ကျဆုံးခဲ့ရတာ ဖြစ်တယ် ။ ကိုဖြိုးဝေအောင်ကို သတင်းစာရှင်းပွဲကနေ မတရားစွတ်စွဲခဲ့တဲ့ ရဲချုပ်ဗိုလ်မှုးချုပ်ခင်ရီက စစ်တပ်ကနေရဲ ၊ ရဲကနေ ဝန်ကြီးဘဝပြောင်းနေတယ် ။ အဲဒီအချိန်မှာ အမိန့်တွေပေးခဲ့တဲ့ နအဖစစ်အာဏာရှင်တွေက စစ်ယူနီဖေါင်း တွေချွတ်ပြီး လွှတ်တော်ထဲမှာ နေရာအမျိုးမျိုးယူထားကြတယ် ။ စစ်အာဏာရှင်တွေရဲ့ လုပ်နည်းလုပ်ဟန်မပျက် မတရားဖမ်းဆီးထောင်ချမှုတွေ ၊ လက်ပန်းတောင်သံဃာတွေကို မီးလောင်ဗုံးပစ်နှိမ်နှင်းမှုမျိုး အကြမ်းဖက်အနိုင်ကျင့် မှုတွေ ၊ ကချင်တိုင်းရင်းသားတွေနဲ့ ပြည်တွင်းစစ်မှာ တိုက်လေယာဉ်တွေသုံးထိုးစစ်ဆင်တာမျိုးတွေ ကျူးလွန်နေကြ ဆဲပါပဲ ။ ဒါကြောင့် စစ်အာဏာရှင်စနစ်ရှိနေဆဲပဲဖြစ်တယ် ။ ကိုဖြိုးဝေအောင်လို မကြွေသင့်ပဲကြွေခဲ့ရတဲ့ ၊ စစ်အာဏာ ရှင်စနစ်ရဲ့ဒါဏ်ကိုခံကြရတဲ့သူတွေ ၊ ကိုဖြိုးဝေအောင်လို အညတရသူရဲကောင်းတွေ အများကြီးကြုံတွေ့ကြရဦးမှာ ဖြစ်တယ် ။ ဒီအတွက် အသက်မသေရှင်ကျန်ရစ်နေသေးတဲ့ ကျွန်တော်တို့တတွေအနေနဲ့လည်း စစ်အာဏာရှင်စနစ် တည်ရှိနေသေးသမျှ တစ်ထောင့်တစ်နေရာကနေ တပ်စွမ်းသမျှ တိုက်ပွဲဝင်နေကြရဦးမှာပဲဖြစ်တယ် ။

“ ငါတို့သည် တိုက်ပွဲဝင်ရဲဘော်များနှင့် ကျဆုံးခဲ့သောရဲဘော်များအပေါ် သစ္စာရှိပါမည်” ဆိုတဲ့ အဓိဌာန်ကို ခိုင်ခိုင်မာမာ ဆက်လက်ရွတ်ဆိုရင်း ကိုဖြိုးဝေအောင်ကို အလေးပြုဦးညွတ်လိုက်ပါတယ် ။ စစ်အာဏာရှင်ဆန့်ကျင်ရေးတိုက်ပွဲကာ လတစ်လျှောက် ပုံသဏ္ဍာန်အမျိုးမျိုးဖြင့် သေဆုံး-ကျဆုံးခဲ့ကြရသော တိုက်ပွဲဝင်သူရဲကောင်းအပေါင်းကိုလည်း ထပ်တူ အလေးပြုအပ်ပါတယ် ။

မောင်ကျောင်းသား

No comments:

Post a Comment