~
ညီပုလေး ~
 |
သြဇာလေးလည်း ရွာနဲ့ ရွာဝန်းကျင်မှာ အတော် ရှိတယ်လေ။ ပိုက်ဆံနဲ့ သြဇာတွဲလျက်ရှိနေတဲ့ ဘကြီးကိုပေါ့။
အရင်ကတော့ ပိန္နဲကုန်းမှာ ဘကြီးကိုကို ဟေ့ကောင် မောင်ကို၊ ဟေ့ ဖိုးကိုလို့ ခေါ်တဲ့သူတွေရှိတယ်။ သက်တူ ရွယ်တူ မတိမ်းမယိမ်း သူငယ်ချင်းတွေပေါ့။ တချို့ အသက်ဉာဏ်မစောင့်တာပဲ ထင်ပါရဲ့။
ဘကြီးကိုရဲ့ ခေတ်ပြိုင်တွေ တစ်နှစ် တစ်ယောက်နှစ်ယောက် ပြုတ်ပြုတ်ကုန်ကြတယ်လေ။
အများစုက ဘကြီးကိုနဲ့ သောက်ဖော်စားဖက်တွေ။ တချို့လည်း ပုလင်းမဖက်၊ တရားဖက်ကြတာပဲ။ ဒါပေမဲ့ သူ့ကံနဲ့သူ လာကြထင်ရဲ့။ ဘုန်းကြီးပြီး သက်မရှည်ကြဘူး။
ဦးထွန်းပေါ်တို့ ဦးဘခွေးတို့ဆိုရင် ဘုန်းလည်း မကြီးဘူး။ အသက်လည်း မရှည်ကြဘူး။
ဘကြီးကိုက အသက် ဉဏ်စောင့်တဲ့အထဲမှာပါ တယ်။ အသက်ခြောက်ဆယ် သာ ကျော်လာရော။ ခပ် ပျော်ပျော်ပဲနေတယ်။ သူ့မှာ နာမည်ကျော် ကဗျာဆရာကြီး လို ရန်သူမရှိ၊ မိတ်ဆွေသာရှိ ဆိုတဲ့ လူမျိုး။
အသက်ဘယ် လို ဉာဏ်စောင့်သလဲဆိုတော့ သူဖတ်ဖူးတဲ့အထဲမှာ ပါတယ်။ ဆရာကြီး ရွှေဥဒေါင်းစာထင်ရဲ့။ အရက်ကို လူကြီး လူကောင်းသောက်သလိုသောက်တယ်။ သူ့မှာလစ်မစ်ရှိတယ်။ နေ့တိုင်း သောက်တာပဲ။
ဒါပေမဲ့ သူ့လစ်မစ် သုံးပက်ထက် မကျော်ဘူး။ ဘယ်သူ နဲ့ တွဲသောက်လို့မှ သုံးပက်ထက် မပိုဘူး။ ချော့တိုက်လည်း မသောက်၊ မြှောက်ပင့် ပြောလည်း မသောက်ရေးချ မသောက်ပဲ။
ဘကြီးကိုက မုဆိုးဖို။ ဇနီးသည် ဒေါ်ပျော့ဆုံးသွား တော့ ဒေါ်ပျော့ဘက်ကပါတဲ့ လယ်လေးယာလေး သူရလိုက် တယ်။ သူ့မှာလည်း ယာလေးလယ်လေးက ရှိပြီးသား။ ဒေါ်ပျော့ဆုံးတော့ ဒေါ်ပျော့လည်း အရွယ်ကောင်း၊ ဘကြီးကိုလည်းအရွယ်ကောင်း လေးဆယ် သာသာတွေ။ နွား တွေ၊ ကျွဲတွေ၊ ဆိတ်အုပ်တွေ နဲ့။ ပိန်္နဲကုန်းသာမက ရှောက် တောတို့ ပိတောက်စုတို့ ရွာနီးချုပ်စပ်က အပျိုကြီးတွေ တစ်လင်ကွာတွေ မုဆိုးမတွေ ဘကြီးကို ကို ပြစ်မှားမယ်ဆို ပြစ်မှားစရာပေါ့။
ပြီးတော့ ဘကြီးကိုတို့မှာ သားထောက် သမီးခံ မရှိဘဲ။ တချို့က သူ့ပိုင်ဆိုင်တာတွေ တိမ်သလ္လာခံပြီး မုဆိုးဖိုလို့တောင် မအောက်မေ့ကြဘူး။
ဒေါ်ပျော့ဆုံးလို့ အရက် တွေ နေ့တိုင်းသောက်နေတာ မဟုတ်ပါဘူး။ မဆုံးခင်က တည်းက သောက်ခဲ့တဲ့ သူလေ။
နိုင်ငံခြားအရက်၊ ကောင်း ပေ့ဆိုတဲ့ ၀ီစကီဝယ်ပြီး အိမ်မှာ သောက်နိုင်တယ်။ သောက် နိုင်တဲ့ အခြေအနေရှိတယ်။တားမယ့်သူ၊ ကြောက်ရမယ့် သူမှ မရှိတာ။ ဒါပေမဲ့ မသောက်ဘူး။ ဆိုင်မှာ သောက်တယ်။ ပြီးတော့ ကိုယ်တိုင်ချက်သောက်မယ် ဆိုရင်လည်း သူကောင်းကောင်း ချက်တတ်တယ်။ ထန်းလျက်တွေ၊ ထနောင်းခေါက်တွေ၊ ကောက်ညှင်းတွေ သူအလှမ်း မီတယ်။ ကူညီချက်ပေးကြမယ့် တပည့်လက်သားတွေလည်းရှိတယ်။ အရက်ကို လက်ညှိုးနဲ့တို့၊ စားပွဲပေါ်မှာ ကကြီး အက္ခရာရေး၊ ပြီးရင် မီးခြစ်နဲ့ခြစ်လိုက်။ ကကြီး မီးတောက်လေးရရော။ ဒါမျိုး ချက်သောက်ချင်သလား။ ဖြစ်တယ်။
အရင်ကတော့ ရွာထဲက ဆိုင်တွေလှည့်ပြီး ကြုံရင် ကြုံသလို သောက်တာပါပဲ။ နောက်တော့ ဘကြီးကို မူပြင်လိုက်တယ်။ လူခင်လို့ မူပြင်လိုက်တာ။ အိမ်မှာ ၀ယ်သောက် လည်းရတယ်။ ဘယ်သူ့မှ လည်း ဂရုစိုက်စရာ မလိုတဲ့ ဘကြီးကို။ နှစ်နှစ်ကျော်ကျော် လောက်ရှိပြီ။ တစ်ဆိုင်တည်းပဲ သတ်သတ်မှတ်မှတ် သောက်တော့တယ်။ ရွာအရှေ့ပိုင်း ကျော့ကျော့ခင်ရဲ့ဆိုင်ပေါ့။ နေပူပူ မိုးရွာရွာ ကျော့ကျော့ခင်ဆိုင်မှာသွားထိုင်မယ်။
“ငါ့ အတွက် ပေးစမ်းဟေ့၊ ကောင်မလေး အမြည်း ဘာရှိသတုံး”။ ဒါ ဘကြီးကို နေ့စဉ် ပြောနေကျစကား။
ကျော့ကျော့ခင်က လည်း ဘကြီးကို မခိုင်းပေမဲ့ ဘကြီးကို သောက်နေကျ သီးသန့်ခွက်ထဲ သုံးပက် ထည့်ပေးမယ်။ ရွာက ကာလသားတွေ ကရော၊ ဘကြီးကိုထက် နည်း နည်းငယ်ကြတဲ့ ငါးဆယ်ကျော် ခြောက်ဆယ်တွင်းတွေကရော မြွေမြွေချင်းခြေမြင်ကြတယ်။ ဘကြီးကို ကျော့ကျော့ခင်ကို သမာဓိပိုး ပိုးနေတယ် ဆိုတာ ရိပ်မိကြတယ်။ တချို့က ဗေဒင်မေးဆန်ကုန်သတဲ့။ အတပ်သိတာပေါ့ တဲ့။
တချို့မိတ်ဆွေ အပေါင်းအသင်းတွေကလည်း ဘာရယ် မဟုတ်ပါဘူး။ စကား အဖြစ် ပြောတတ်ကြတယ်။ ရာသီဥတုလည်းပူပါဘိနဲ့။ ကျွန်တော်သာ ဘကြီးကိုနေ ရာမှာဆို အိမ်မှာတင် ၀ီစကီ နေ့တိုင်း သောက်နေမှာ။ ဘရန် ဒီတွေ နေ့တိုင်းသောက်မှာ။ ဘကြီးကိုမို့ခြေအညောင်းခံလို့။ ဟိုနှယ်၊ ဒီနှယ်ပြောကြတယ်။
ပြောကြတဲ့လူတွေ ငေါ့ ကြတဲ့ လူတွေ ဘယ်လို ပြော ကြ ငေါ့ကြပစေ။ မမှုဘူး။ ဂရုမစိုက်ဘူး။ ဘကြီးရဲ့မူကို ပြင်လောက်အောင်လည်း လူက ခင်စရာကောင်းနေ တယ် ဟုတ်လား။ ကျော့ကျော့ခင်ဟာ ရှိရင် သူ့သမီးအငယ်ဆုံး လောက်ရှိမှာ။ နှစ်ဆယ် ကျော်ကျော်၊ အစိတ်တောင် မပြည့်တတ်သေးဘူး။ ဆံပင် အုံကောင်းကောင်း၊ မျက် တောင်ကော့ကော့နဲ့၊ အလုံး အဖန်ဖွံ့ဖွံ့၊ အရပ် ငါးပေ ငါး လက်မဆိုတာ မြန်မာမထဲမှာ မြင့်တဲ့ အထဲပါတယ်။ ရွှေဘိုသူ ၀င်စားသလား၊ မွန်အမျိုး သမီးတစ်ယောက် ၀င်စား သလား တစ်ခုခုပဲ။
အဖေရော အမေရော မရှိကြတော့ ဦးလေးနဲ့ အဒေါ် ဆိုင်မှာ ကူညီလုပ်ကိုင်ပေး နေတာ။ ကျော့ကျော့ခင် ကြောင့် သူတို့စားသောက် ဆိုင်လေး ရောင်းရပါရဲ့။ ဒါ ပေမဲ့ ဘကြီးကိုကြောင့် သိပ် မရောင်းရတာ၊ နို့မိုရင် ဒီ ထက်ရောင်းရမှာလို့ အပြစ် တင်ကြသူတွေလည်းရှိရဲ့။ မနာလိုလို့ပြောကြတာတွေပေါ့။
ဘကြီးကို ဒီဆိုင်ကိုလာ ရင် သူထိုင်နေကျနေရာမှာပဲ ထိုင်တယ်။ ဆိုင်ရှင်တွေက လည်း အချိန်တန်ရင် ဘကြီး ကို နေရာမှာ ဘယ်သူမှ မထိုင်ရအောင် ရှင်းပေးထား ကြတယ်။ နေ့စဉ် ပုံမှန်လာ သောက်တဲ့ ဖောက်သည် လေ။ ပြီးတော့ ဒီဖောက်သည် က နှစ်ချီပြီးသောက်တဲ့ ဖောက်သည်။ ကျော့ကျော့ခင် ဦးလေးနဲ့ အဒေါ်တို့ကလည်း ဘကြီးကို ဘာလို့လာသောက် နေတယ်ဆိုတာရိပ်မိကြတယ်။ ပြောကြစို့။ လာမသောက်မှာကို စိုးနေတာ။ ပြောပြီကော။ ပိန်္နဲကုန်းက တချို့အပျိုကြီး တွေ ဘကြီးကိုကို စိတ်ကူးနဲ့ ဘူကြီး ရိုက်နေကြတာ။ လက်တွေ့ ရိုက်ကြည့်ရင် သူတို့ ဘူကျကုန်မှာ။
ပိနဲ်္နကုန်းကတင် မကပါ ဘူး။ ရှောက်တောရော ပိတောက်စုက အပျိုတွေလည်းပါ၊ မုဆိုးမတွေ တစ်လင် ကွာတွေလည်း ပါတယ်။ ဒေါ်ပျော့ထားခဲ့တဲ့ စတိ လက်ကောက်တွေ ပြစ်မှား ကြ၊ ဘကြီးကိုနဲ့ ဒေါ်ပျော့ အိပ်ခဲ့ကြတဲ့ ကနုတ်တွေနဲ့ ထွင်းထားတဲ့ ကျွန်းသား ခုတင်ကြီးပေါ် စိတ်ကူးနဲ့ အိပ်ကြည့်ကြ။ စိတ်အားရှိ တိုင်း ဘကြီးကိုနဲ့ သုံးချပ် တစ်ထွေ၊ လေးချက်တစ် ထွေ ခင်းနေကြတာ။ သူတို့ ခမျာ သနားပါတယ်။ စိတ်ကူးနဲ့ ဘေးစိပ်ပြီး ရင်ခုန်နေကြတာ။
နေစောင်းရင် ရေမိုးချိုး ကြမယ်။ တပည့်ကျော်သာ အောင် ပြန့်နေအောင် တိုက် ပေးထားတဲ့ ရှပ်အင်္ကျီနဲ့၊ ပုဆိုး မီးပူကျဝတ်မယ်။ ချွေးနံ့ ပျောက်ဆေး နှစ်ချက်သုံး ချက်စီ ပွတ်မယ်။ ပြီးရင် ဆံပင်ကို ကျကျနန ဖြီးမယ်။ ကတီ်္တပါသဲကြိုးတွေကို တပည့်ကျော်က ဘရပ်နဲ့ကျ ကျနနတိုက်ထားတဲ့ ဖိနပ်ကို ကောက်စွပ်မယ်။ ပြီးရင် ရွာ ရှေ့ပိုင်းကို ချီတက်ပြီ။
သူထိုင်နေကျနေရာမှာ ထိုင်တယ်။ ဆိုင်ထဲမှာ ဘယ် သူတွေ ရှိသလဲ မသိမသာ အကဲခတ်မယ်။ လူစိမ်းရှိခဲ ပါတယ်။ စပါးပွဲစား၊ ပဲပွဲ စားတချို့ စပါးဝယ်၊ ပဲဝယ် လာရင်း ၀င်သောက်သူရှိ မယ်။ ဆိုင်နားမှာ ရပ်ထားတဲ့ လှည်းနဲ့နွား မြင်ကတည်းက မော်တော်ဆိုင်ကယ် မြင်က တည်းက ဧည့်သည်အစိမ်း အကျက် ဘကြီးကိုသိတယ်။ ချိုးသိမ်းများလိုပဲ ကိုယ့်ပိုင် နက်ထဲ ဒီပြင်ချိုးသိမ်းဝင်လာ ရင် သိတယ်ဆိုတာမျိုး။
သူထိုင်နေကျ နေရာက လက်ဖက်သုပ်တို့ ဟင်းပွဲ တို့ ပြင်တဲ့ ကျော့ကျော့ခင်ရဲ့ ကိုယ်လုံးကို ခြေဆုံးခေါင်း မြင်ရတဲ့နေရာ။ ပြီးရင် “ငါ့ အတွက်ပေးစမ်းဟေ့ ကောင် မလေး အမြည်းဘာရှိသတုံး”
ဒါဆိုရင် ဘိလပ်ရည် ပုလင်း ထဲမှာ အရက်သုံးပက်ထည့် ယူလာမယ်။ ပြီးရင် ကောင် မလေးက ဒီနေ့ရနိုင်တဲ့ အမြည်းတွေပြောမယ်။ ဘကြီးကို ခေါ်တောကျကျ မကြည့်ပါဘူး။ တစ်ချက် လှမ်းကြည့်ပြီး စိတ်မ၀င်စား သလို နေလိုက်တာပါပဲ။ ပြီးမှ ပဲလှော်ကြော်တစ်ပွဲလို့ မှာ ချင်မှာမယ်။ အမဲပုဆိုးကြမ်း တစ်ခွက်လို့ မှာချင်မှာမယ်။
သူ့အသက်အရွယ် ဒိပြင် လူတွေ သွားမကောင်းကြ တော့လို့ ဒါမျိုး ဘယ်မြည်း ကြလိမ့်မလဲ။ ဒါပေမဲ့ ဘကြီး ကိုရဲ့ သွားတွေက သူများ တကာထက် ကောင်းတုန်း။ ဒါကြောင့် အရွယ်တင်တယ် လို့ ပြောကြတာပဲ။ တစ်ချက်လှမ်းကြည့် ပြီးအမြည်းလာချတဲ့အခါ မကျော့ နင် ဒီနေ့လှတယ်။ ဒီတစ်ခွန်း ပြောမယ်။ ဒါနေ့စဉ် ပြောတဲ့စကား။
ဘကြီးကို စကားရဲ့အတိမ်အနက်ကို အပြုံးလေးနဲ့ တုံ့ပြန်လေ့ရှိတဲ့ ကျော့ကျော့ခင်ကလည်း သိတယ်။
တစ်ခါတလေတော့ လည်း “မကျော့က ကျစ်ဆံမြီး အတုတ်ကြီးနဲ့ ကြည့် ကောင်းတယ်ဟေ့” ဆိုတာ မျိုး ပြောတတ်တယ်။
သုံးပက်ကို ရေစွက်ပြီး ဇိမ်ဆွဲတော့တာပဲ။ ပဲလှော် ကြော်ဇွန်းတစ်ဝက်နဲ့ ကျော့ကျော့ခင် အလှတစ်ဝက်နဲ့ ရောပြီး မြည်းတော့တာပဲ။ ဘကြီးကိုက ကျော့ကျော့ခင်လေးကို အေးမြတဲ့ သူ့ အရိပ် အောက်မှာပဲ ကျော့ကျော့ ရှင်းရှင်းလေး နေစေချင်တာ။ ညနေ မိုးချုပ်ခါနီးမှ ကျသင့် ဖိုးငွေ ပေးချေပြီး ပြန်တယ်။
လူကြီးစိတ်ဝင်တဲ့အခါ ပြန်ခါနီး ဘာမှမပြောပါဘူး။ ကာလသားစိတ်ဝင်တဲ့အခါ မူးကလည်း နည်းနည်းလေး မူးတော့ မကျော့ ခေါ်နေရာက မိကျော့ဖြစ်ရော။
“မိကျော့ ငမူးတွေကို အရောမ၀င်နဲ့နော် ကြားလား” ဆိုတာမျိုး မှာတတ်တယ်။
“မိကျော့ နင့် ဦးလေးနဲ့ အဒေါ်ကို ပြောထားဦး။ သိပ် သဘော မကောင်းကြနဲ့။ တော်တော် ဆိုင်မှာ အကြွေး ကျလိမ့်မယ်”
ဒီလိုစကားမျိုးလည်း တစ်ခါတလေ ပြောတတ်တယ်။ ချစ်သူကို ပိုးပန်းကြတဲ့ နည်း အမျိုးမျိုး ရှိလိမ့်မယ်။ လူပျိုလှည့်နည်း ဘယ်နှရာ ရှိပါလိမ့်။ နောက်ပိုးနည်း ဘယ်နှထောင်ရှိပါလိမ့်။
ဘကြီးကို လူပျိုလှည့်ပုံက အဆန်း။ ကျော့ကျော့ခင်ဆိုင် မှာ ရောင်းတဲ့ အရက်နဲ့ အမြည်းတွေအတွက် အရင်း အနှီးတွေ ဘကြီးကို ထုတ်ပေးထားတာ။ ပြီးမှ ကိုယ့် အရက်ကို ပြန်ဝယ်သောက်နေတာ။
ဘကြီးကို လူပျိုလှည့်ပုံက အဲဒီလိုမျိုး။ ~~~~~~~~~~~~~~~~~~~~~~~~~~~~~~~~~~~~~~~~
ကိုယ့်ရွာက ထုတ်တဲ့ လျှပ်စစ်မီးကို ကိုယ့်ဘာသာ ၀ယ်သုံးနေတဲ့ မိတ်ဆွေ ကိုဝင်း ထွန်း (ခ) ကိုဘိုလေးသို့။
No comments:
Post a Comment