by မင်းလူ၏ ၀တ္တုတိုများ on Saturday, September 8, 2012 at 2:19pm ·
လှထုံနှင့် အတိတ်မေ့ခြင်း
--------------------------
လှထုံကိုကြည့်ရတာ ခုတစ်လောမှာ တစ်မျိုးဖြစ်နေသည်ဟု ကျော်ကွန့်ထင်သည်။ သိပ်ရွှင်ရွှင်လန်းလန်းမရှိ။ ခါတိုင်းလို တက်တက်ကြွကြွ သွက်သွက်လက်လက်မဟုတ်ဘဲဖြစ်နေသည်။ တစ်ခါ တစ်ခါ ငိုင်တိုင်တိုင်နဲ့ တစ်နေရာကို ငေးချင် ငေးနေတတ်သည်။ တစ်ခုခုကို တွေးနေသလိုလည်း ထင်ရ၏။
ထိုအခါ ကျော်ကွန့်မှာ အီလည်လည်ကြီးခံစားရသည်။ မောင်ကျော်လှကို ကိုယ်ဝန်ရှိခါစတုန်းကလည်း လှထုံ ဒါမျိုးဖြစ်ဖူးသည်။ ခုလည်း ကလေးရှိနေပြီလားမသိ။ မောင်ကျော်လှလေးတောင် လေးတန်းရောက်နေပြီဆိုတော့ ဒီလောက်အချိန်တွေခြားပြီးဖြစ်နိုင်ပါ့မလား။ ပြောလို့မရ။ တချို့ဆို ဆယ့်လေးငါနှစ်ခြားပြီးမှတောင် မွေးတတ်တာပဲ။
ကျော်ကွန့်သည် သမီးလေးတစ်ယောက် ထပ်လိုချင်နေတာတော့အမှန်ပဲဖြစ်၏။ ထို့ကြောင့် လှထုံသာ တကယ်ဟိုဒင်းဖြစ်ရိုးမှန်ရင် ၀မ်းသာရမှာပေါ့။ တစ်ဖက်က ပြန်စဉ်းစားကြည့်တော့လည်း မောင်ကျော်လှတစ်ယောက်ကို ကျွေးမွေးစောင့်ရှောက်ဖို့ တော်တော်ရုန်းနေရတာ။ မုန့်ဖိုး၊ ကျောင်းစရိတ်(စာအုပ် စာရေး ကိရိယာဖိုး စသည် အပါအ၀င်) ကုန်ကျမှုက မနည်းလှ။ မောင်ကျော်လှမှာ ငယ်ငယ်ကတည်းက ချူချာသဖြင့် ဆေးခန်းလည်း မကြာခဏ သွားရသေးသည်။
ကလေးနောက်တစ်ယောက်သာ ထပ်ရလို့ကတော့ မီးဖွားစရိတ်၊ မီးနေစရိတ်၊ ဆေးဖိုးဝါးခ စသည် အတော် ကုန်ကျမှာ။ ထို့ကြောင့် ၀မ်းသာရမလား၊ စိတ်ရှုပ်ရမလား ဝေခွဲမရဘဲ အီလည်လည်ကြီးဖြစ်နေတယ်လို့ ပြောတာ။
ဘာပဲဖြစ်ဖြစ် မေးတော့ မေးကြည့်ရမှာပဲ။ မေးလိုက်လို့အဖြေတစ်ခုခုထွက်လာတာကိုလည်း ရင်ဆိုင်ဖို့ မ၀ံ့မရဲဖြစ်နေပြန်သည်။ ဒီလိုနဲ့ တုံ့ဆိုင်းနေစဉ်မှာ လှထုံကပဲ အရင်စပြောလေသည်။
"ကိုကျော်ကွန့်...ခုတစ်လော ကျွန်မကိုကြည့်ရတာ တစ်မျိုးဖြစ်မနေဘူးလား"
"အေးဟ..ငါလည်း အဲဒါမေးမလို့၊ နင်ဘာဖြစ်နေတာလဲ၊ ဟိုဟာများလား..."
"ဘယ်ဟာလဲ"
"ဟိုလေ..နင့်မှာ ကလေးများရှိနေပြီလားလို့"
"အို..ဒါများ အဆန်းလုပ်လို့ရှိတာပေါ့"
"ဟင်... ဟုတ်လား"
"ကိုကျော်ကွန့်ဟာလေ ကျွန်မကျတော့ ထုံသလေး အသလေးနဲ့ သူလည်း အူကြောင်ကြောင်ပဲ"
"ဒါဆို... ဒါဆို ဘယ်နှလရှိပြီလဲ"
"၁၀နှစ်လေ... ဒါတောင် မသိတော့ဘူးလား"
"၁၀နှစ်... ဟာ.. တစ်ခါမှ မကြားဖူးဘူး"
"ဟာ ဘာဖြစ်နေတာလဲ မောင်ကျော်လှ ၁၀နှစ်ပြည့်တော့မယ်လေ"
ဒီတော့မှ နားလည်မှု လွဲချော်နေတာကို ရိပ်မိတော့သည်။ ကလေးရှိနေပြီလားလို့ ကျော်ကွန့်က မေးတာကို လှထုံက မောင်ကျော်လှအကြောင်း မေးတယ်မှတ်သွားတာကိုး။
"ငါက မောင်ကျော်လှကိုမေးတာမဟုတ်ဘူး။ နင့်မှာ ကိုယ်ဝန်ရှိနေပြီလားလို့"
"ဒါ...ကိုကျော်ကွန့်အသိဆုံးဖြစ်မှာပေါ့"
"ဘာ... ငါက ဘယ်လိုလုပ်သိရမှာလဲ။ ဒါမျိုးဆိုတာ မိန်းမကသာ သိရတာလေ"
"အဲ... ဟုတ်သားပဲ"
လှထုံနဲ့တော့ ဒီလို အူလည်လည်ဖြစ်နေကျမို့ ကျော်ကွန့်က လိုရင်းကိုသာ တိုက်ရိုက်မေးလိုက်သည်။
"ဘယ်လိုလဲ ကိုယ်ဝန်ရှိနေပြီလား"
"အို... ပေါက်ပေါက်ရှာရှာ မဟုတ်ပါဘူး"
"ဒါဖြင့် ဘာကြောင့် ငူတူတူ ငိုင်တိုင်တိုင်ဖြစ်နေရတာလဲ"
"မသိပါဘူး၊ ခုတစ်လောမှာ စိတ်တွေကလည်း ကယောက်ကယက်နဲ့ စိတ်ညစ်သလိုလို၊ လွမ်းသလိုလို ဆွေးသလိုလိုနဲ့ အဲဒါ.."
"ဟင်..ဘာလဲ"
"ကျွန်မ အတိတ်မေ့ရောဂါများဖြစ်နေပြီလားမသိဘူး ကိုကျော်ကွန့်ရယ်"
"နင့်နှယ်ဟာ အခုပဲ ငါ့ကို ကိုကျော်ကွန့်လို့တောင် ခေါ်နေသေးတာ ဘယ်လိုလုပ် အတိတ်မေ့ရမှာလဲ"
"မသိဘူးလေ... ခုတစ်လော သိပ်မေ့တတ်တာ။ ပစ္စည်းတစ်ခု တစ်နေရာချထားပြီး ဘယ်ရောက်နေမှန်း မသိလို့ ရှာရတာအမောပဲ။ ပြီးတော့ မနေ့က ဘာဟင်းနဲ့ထမင်းစားခဲ့တယ်ဆိုတာမျိုးတွေကို မေ့မေ့နေတတ်တယ်"
"ဒါမျိုးကတော့ ငါလည်း ဖြစ်တတ်တာပါပဲ။ အတိတ်မေတယ်ဆိုတာက ကိုယ့်ကိုယ်ကိုယ်တောင် ဘယ်သူမှန်း မမှတ်မိတော့လောက်အောင် ဖြစ်သွားတာကိုပြောတာ။ ဗီဒီယိုကားတွေထဲမှာ မကြည့်ဖူးဘူးလား"
ဒီလိုပြောလိုက်တော့မှ ပိုဆိုးသွားသည်။
"ဟုတ်မယ် ဟုတ်မယ်.. ကားတိုက်ခံရပြီး အတိတ်မေ့သွားတာတို့၊ လူဆိုးတွေ ၀ိုင်းရိုက်တာခံရလို့ ဘာမှ မမှတ်မိတော့တာတို့ ကြည့်ဖူးတယ်။ ကျွန်မလည်း ဟိုတစ်ရက်က တိုင်နဲ့နဖူးနဲ့ဆောင့်မိပြီး မူးနောက်နောက် ဖြစ်သွားရာကစပြီး ခုလို မေ့တတ်လာတာပဲ။ ဟုတ်ပြီ.. ဟုတ်ပြီ နဖူးနဲ့တိုင်နဲ့ပြန်ဆောင့်လိုက်ရင် ကောင်းသွားမယ် ထင်တယ်။ အင်း..ကိုယ့်ဟာကိုယ်ကျတော့လည်း မလုပ်ရဲဘူး။ ကိုကျော်ကွန့် ကျွန်မဟိုဘက် လှည့်ပေးမယ်။ နောက်ကနေ ခေါင်းကို တစ်ခုခုနဲ့ရိုက်ပေးပါလား။ ကွဲအောင်တော့ မရိုက်နဲ့နော်၊ မူးသွားရုံလောက်ပဲ"
"မဟုတ်တာကွာ..ဟိုဟာက ရုပ်ရှင်ကွ။ ကြည့်လို့ကောင်းအောင် စိတ်ကူးယဉ်ပြီးရိုက်ထားတာ။ အဟုတ်မှတ်ပြီး လျှောက်လုပ်မနေနဲ့"
ဟု တားမြစ်ထားရသည်။ လှထုံက ယုံရတာမဟုတ်။ တော်ကြာ မောင်ကျော်လှကို
"သား..အမေ့ကို နောက်ကနေရိုက်ပေးစမ်း"
ဆိုတာမျိုး လုပ်ချင်လုပ်နေမှာ။ မောင်ကျော်လှဆိုတဲ့ကောင်ကလည်း သူ့အမေလိုပဲ ခပ်အူအူရယ်။ ဒီကောင့်ကိုလည်း စိတ်မချရသဖြင့်
"မင်းအမေ ဘာခိုင်းခိုင်းလုပ်မပေးရဘူး"
ဟု မှာထားမိ၏။ ဒီမှာတင်ပဲ မောင်ကျော်လှခမျာ အချောင်ခံရတော့သည်။
လှထုံက ဟင်းချက်နေရင်း ဆားကုန်သွားသဖြင့်
"သားရေ ဆားတစ်ထုပ်လောက် သွားဝယ်ပေးစမ်းပါ"
ဟု ခိုင်းသည်။ မောင်ကျော်လှကလည်း သူ့အဖေ ကျော်ကွန့်မှာထားတဲ့အတိုင်း လုပ်မပေးနိုင်ဘူးဟု ငြင်းလိုက်သည်။ လှထုံက စိတ်ဆိုးပြီး
"ဟင်..နင်က ငါ့ကို အာခံတယ်ပေါ့ ဟုတ်လား"
ဆိုပြီး ခေါင်းတစ်ချက်ခေါက်သည်။
"နင် သွားဝယ်မလား...မ၀ယ်ဘူးလား"
"မ၀ယ်ဘူး"
"မအေကို ခံပက်တဲ့ကောင်..သေပေတော့"
ဆိုပြီး လှထုံက သံယောက်မနှင့်ရွယ်သည်။ မောင်ကျော်လှထွက်ပြေးသည်။ လှထုံနောက်က ပြေးလိုက်သည်။
ခုလိုဖြစ်သွားတာလည်း ခပ်ကောင်းကောင်းပဲ။ ညနေ ကျော်ကွန့်အလုပ်မှ ပြန်လာသောအခါ လှထုံက ၀မ်းသာအားရဆီး၍ပြောလေသည်။
"ကိုကျော်ကွန့်ရေ... ကျွန်မအတိတ်မေ့နေတာ ပြန်ကောင်းသွားပြီ သိလား"
"ဟေ...ဘယ်လို"
"ဟုတ်တယ်.. မနက်က ရှင့်သားနောက်ကို ပြေးလိုက်ရင်း ခြေချော်လဲလို့ ခါးပန်းနဲ့ နဖူးနဲ့ ဆောင့်မိတယ်လေ... အဲဒီကစပြီး ကောင်းသွားတာပဲ။ ခုဆိုရင် ပြီးခဲ့တဲ့တနင်္ဂနွေက ဘာဟင်းနဲ့စားခဲ့တယ်ဆိုတာတောင် ပြန်မှတ်မိနေပြီ။ အဲဒီနေ့က အမဲသားရင်ဒူးရိုးချက်တယ်လေ။ ဟိုငေး ဒီငိုင်လုပ်နေမိလို့ နည်းနည်းတောင် တူးသွားပါရောလား။ ကဲ..အကုန်မှတ်မိပြီ တွေ့လား"
"အေး. အေး.. ကောင်းပါလေ့ကွာ"
ဟု ကျော်ကွန့်က အလိုက်အထိုက်ပြောလိုက်သည်။ လှထုံမှာ ၀မ်းသာနေသဖြင့် ခါးပန်းနှင့်ဆောင့်မိပြီး နဖူးမှာ ညိုမည်းသွားတာတောင် ဂရုမစိုက်နိုင်တော့။
* * * * *
လှထုံနှင့်သံသယ
--------------------
ဆိုက်ကားဆရာဒေ၀ါနန်း စိတ်ကူးတည့်ရာ စွတ်ရွတ်ပြောသဖြင့် ကျော်ကွန်နှင့်လှထုံတို့ ပြဿနာတက်ရသည်။
တစ်ရက်မှာ မောင်ကျော်လှလေး ကျောင်းကအပြန် လမ်းကြုံသဖြင့် ဒေ၀ါနန်းက ဆိုက်ကားနှင့် တင်ခေါ်သွားသည်။ အိမ်ရောက်လို့ လှထုံနှင့်တွေ့တော့။
"ဟဲ့ လှထုံ၊ နင့်သားကို ခုမှ သေသေချာချာကြည့်မိတယ်။ မောင်ကျော်လှလေးဟာ ကျော်ကွန့်နဲ့လည်းမတူပါလား။ ဘယ်လိုလဲဟ၊ ဟုတ်မှဟုတ်သေးရဲ့လား"
ဟုပြောပြီး ထွက်သွားသည်။ သူက ပြောချင်ရာစွတ်ပြောသွားသလို လှထုံကလည်း ထင်ချင်ရာ စွတ်ထင်သည်။ လှထုံမှာ အကျိုးသင့်အကြောင်းသင့် ဆက်စပ်တွေးတတ်သူမဟုတ်သဖြင့် ကျော်ကွန့်လည်း အလုပ်ကပြန်လာရော ဆီးပြီး ပြဿနာ ရှာတော့သည်။
"ဒီမှာ ကိုကျော်ကွန့်၊ မောင်ကျော်လှလေးဟာ ရှင်နဲ့မတူဘူးလို့ သူများတွေက ပြောနေကြတယ်။ ဒါကြောင့် ဒီကလေးဟာ ရှင်နဲ့ရတဲ့ကလေးမှ ဟုတ်ရဲ့လားလို့ ကျွန်မ သံသယဖြစ်လာပြီ"
"ဟာကွာ၊ နင်ကလည်း"
"ရှင်..ကျွန်မကို ဆက်ပြီးလှည့်စားဖို့ မကြိုးစားနဲ့ အမှန်အတိုင်းသာ ၀န်ခံလိုက်စမ်းပါ"
လှထုံသည် သူ့စကားက ဘယ်အဓိပ္ပါယ်ရောက်လို့ရောက်သွားမှန်းမသိ။ ထို့အတူ ကျော်ကွန့်ဆိုတဲ့ကောင်ကလည်း ကြောင်တောင်တောင်ဆိုတော့ ခြေခြေမြစ်မြစ်မစဉ်းစားဘဲ
"ငါ့ကို ယုံပါဟာ။ ဘုရားပေးပေး ကျမ်းပေးပေးပါ။ မောင်ကျော်လှဟာ ငါ့သားမှ ငါ့သားအစစ်ပါ"
ဟု ပျာပျာသလဲ တောင်းပန်နေသည်။
လှထုံက မကျေနပ်။ နောက်ဆုံးတော့ ဒေါက်တာတုတ်ခိုင်ဆီသွားပြီး ဆေးစစ်ရမယ်ဆိုပြီး အတင်းဆွဲခေါ်သဖြင့် ကျော်ကွန့်မှာ တွန့်ဆုတ် တွန့်ဆုတ်နှင့်ပါသွားသည်။
လှထုံ၏စွပ်စွဲချက်ကို နားထောင်ပြီးနောက် ဒေါက်တာတုတ်ခိုင်ပင် ရုတ်တရက်ကြောင်သွားရသေးသည်။ ပြီးမှ မရယ်မိအောင် ဣနြေ္ဒဆယ်ရင်း
"မလှထုံက ကျော်ကွန့်ကို သံသယဖြစ်တယ်ဟုတ်လား။ နေစမ်းပါဦး။ ဒီကလေးဟာ ဘယ်သူနဲ့ရတဲ့ကလေးဆိုတာ ကိုယ်တိုင်မွေးထုတ်လိုက်တဲ့ မလှထုံ အသိဆုံးဖြစ်ရမှာပေါ့။ တကယ်ဆို သံသယဖြစ်ချင်းဖြစ်ရင် ကျော်ကွန့်ကသာ မလှထုံအပေါ်မှာ ဖြစ်ရမှာလေ။ သေသေချာချာလည်း စဉ်းစားပါဦး"
လှထုံသည် အတန်ကြာတွေဝေစဉ်းစားပြီးမှ
"ဟာ...ဟုတ်သားပဲ။ ဟီး ဟီး"
ဒီတော့မှ ကျော်ကွန့်ကလည်း
"ဟင် ဟုတ်တာပေါ့၊ ကျွန်တော်ကသာ သံသယဖြစ်ရမှာ"
ထိုအခါကျတော့လည်း လှထုံမှာ မျက်နှာလေးငယ်သွားပြီး
"ကိုကျော်ကွန့် ကျွန်မကိုတော့ ယုံပါနော်။ ကိုကျော်ကွန့်အပေါ်မှာ ကျွန်မ ဘယ်တုန်းကမှ သစ္စာမဖောက်ခဲ့ဖူးပါဘူး။ မောင်ကျော်လှလေးဟာ ရှင်နဲ့ရတဲ့ကလေးအစစ်ပါ ကိုကျော်ကွန့်ရယ်"
ဟု အသံတုန်တုန်လေးနှင့် ပြောနေသေးသည်။ ကျော်ကွန့်ကလည်း ဘုမသိ ဘမသိ။
"ယုံပါတယ် လှထုံရယ်၊ ယုံပါတယ်"
ဟု လှိုက်လှဲသောလေသံဖြင့် ပြန်ပြောသည်။ ထို့နောက် ဒေါက်တာတုတ်ခိုင်ကို နှုတ်ဆက်ပြီး လင်မယားနှစ်ယောက် လက်ချင်းတွဲ၍ ထွက်သွားကြ၏။ ဒီတော့မှ ဒေါက်တာတုတ်ခိုင်လည်း မချုပ်တည်းနိုင်တော့ဘဲ တခွီးခွီးရယ်မိလေတော့သည်။
***********************************
လှထုံနှင့် ဘီဝမ်း၊ ဘီတူး
--------------------------
လှထုံသည် တစ်ရက်တွင် သူ့သားလေး မောင်ကျော်လှကို ဆေးခန်းလာပြသည်။ ရှေကမှာ ဟိုဘက်ရပ်ကွက်က မိန်းမတစ်ယောက်၏ သားလာပြနေသဖြင့် စောင့်နေရ၏။ ထိုမိန်းမမှာ ခုတလော ဘယ်ကဘယ်လို စီးပွားရေး အဆင်ပြေနေသလဲ မသိ။ ရွှေတွဲလွဲ၊ ငွေတွဲလွဲဖြစ်နေ၏။ လမ်းသွားလျှင်လည်း မော့မော့မော့မော့ စကားပြောတာလည်း နည်းနည်းကြီးကျယ်ချင်သည်။ စမ်းသပ်ခန်းထဲမှာ ဒေါက်တာတုတ်ခိုင်နှင့် အချီအချပြောနေကြတာ အတိုင်းသားကြားနေရ၏။
"အစ်မကြီးသားက ၀မ်းထဲမှာ အပူအပုပ်များနေတယ်။ ကျွန်တော်တို့ မြန်မာလိုတော့ ကျီးကန်းပါးစပ်နာဖြစ်နေတယ် လို့ခေါ်တာပေါ့။ အနောက်တိုင်းဆေးပညာအရတော့ ရီဗိုဖလေဗင်ဆိုတဲ့ ဗီတာမင်ဓာတ် ချို့တဲ့နေတယ်လို့ ဆိုရမယ်"
"အားနည်းလို့ဖြစ်တာပေါ့နော် ဆရာ"
"ဒီလိုလည်း ပြောလို့ရတယ်။ ကိုယ်ခံအားနည်းလည်းဖြစ်တတ်တာပဲ"
"ဒါဆို ဟိုအားဆေးတိုက်လို့မရဘူးလား"
"ဘယ်အားဆေးလဲ"
"ဟို လိုင်စင်နဲ့ထုတ်တဲ့အားဆေးလေ"
"ဆေးဝါအများစုဟာ တရားဝင်မှတ်ပုံတင်လိုင်စင်ယူပြီးမှ ထုတ်ကြတာပဲ"
"မဟုတ်ဘူးလေ။ ဟို တီဗီထဲမှာကြော်ငြာတဲ့ လိုင်စင်နဲ့အားဆေးဆိုတာလေ"
ဒေါက်တာတုတ်ခိုင် ခဏတွေသွားပြီးမှ ပြုံးလိုက်ပြီး
"သြော် အဲ့ဒါ လိုင်စင်ကိုပြောတာမဟုတ်ဘူး။ လိုင်ဆင်းဆိုတဲ့ဓာတ်တစ်မျိုးကိုပြောတာပါ။ အဲဒီဓာတ်က အစာစားချင်စိတ် ဖြစ်ပေါ်အောင် လှုံ့ဆော်တတ်တယ်။ မစားချင် မသောက်ချင်ဖြစ်နေတဲ့ကလေးတွေ၊ သက်ကြီးရွယ်အိုတွေ၊ နာလန်ထစလူနာတွေအတွက် သင့်တော်တယ်။ ပုံမှန်အစားကောင်းကောင်းစားနိုင်တဲ့လူအတွက်တော့ မလိုအပ်ပါဘူး"
"အဲဒီအားဆေး ကျွန်မသားလေးကို တိုက်လို့ရလား"
"အင်း ဒီကောင်က နည်းနည်းပိန်နေတယ်ဆိုတော့ ရပါတယ်။ တိုက်ပါ။ အရေးကြီးတာက အာဟာရဖြစ်တဲ့ အစားအစာတွေ ကျွေးဖို့ပဲ။ အသီးအနှံတွေလည်း များများကျွေးပါ"
"ပန်းသီးကျွေးရင် ကောင်းလားဆရာ"
"ကောင်းပါတယ်။ ငှက်ပျောသီးတို့ ဘာတို့လည်းကျွေးပေါ့။ အခုလောလောဆယ် သူ့အတွက် အဓိကလိုအပ်နေတာက ဗိုက်တာမင်ဘီတူးပဲ။ အဲဒီဆေးပြားလေးတွေ ပေးလိုက်မယ် ဟုတ်လား"
ခဏအကြာတွင် ထိုမိန်းမသည် သူ့သားကို လက်ဆွဲလျက် အပြင်ပြန်ထွက်လာသည်။ နောက်ကစောင့်ရတဲ့လူကို အားမနာ လေတွေရှည်ပြီး ကြွားလုံးတွေ ထုတ်ခဲ့သဖြင့် လှထုံမှာ မကြည်မလင်ဖြစ်နေ၏။ ဟိုမိန်းမကလည်း လှထုံတို့ရှေ့က ဖြတ်အလျှောက်မှာ ၀တ်ထားသည့်လက်ကောင်တွေ အသံမြည်အောင် တမင်လှုပ်ပြသွားသေးသည်။
လှထုံလည်း မျက်စောင်းတစ်ချက် လှမ်းခဲလိုက်ပြီးမှ စမ်းသပ်ခန်းထဲဝင်သည်။
"ဟော မလှထုံ လာ။ မောင်ကျော်လှ ဘာဖြစ်လို့လဲ"
"ခြေတွေ လက်တွေ ကျင်ကျင်နေတယ်လို့ ပြောတယ်ဆရာ"
"ဟုတ်လား ကြည့်ရအောင်"
ဆိုပြီး မောင်ကျော်လှ၏လက်များကို ကိုင်ကြည့်ဖိကြည့်သည်။ ခြေထောက်တွေကို နှိပ်ကြည့်သည်။ အရိုးအဆစ်တွေကို လှုပ်ကြည့်သည်။
"နာတာတို့၊ ကိုက်တာတို့ရှိလား"
"အဲဒါတော့မရှိဘူး။ တစ်ခါတစ်ခါ ထုံနေသလိုလိုပဲ"
"သြော်...သြော်.. ဟုတ်ပြီ။ သိပ်အရေးမကြီးပါဘူး။ အားဆေးလေး ဘာလေးသောက်လိုက်ရင် ကောင်းသွားမှာပါ။ ဒါနဲ့ မလှထုံတို့အိမ်မှာ ထမင်ကို ငှဲ့ချက်တယ်ထင်တယ်"
"ဟင်..ဆရာဘယ်တုန်းက လာကြည့်ထားလိုက်တာလဲ"
"လာကြည့်လို့မဟုတ်ပါဘူး။ ထင်လို့ မေးကြည့်တာပါ။ ဘာဖြစ်လို့ ရေခမ်းချက်မစားတာလဲ"
"ရေခမ်းချက်ရင် ပျော့စိစိနဲ့မို့လို့ပါ"
"အင်း..အဲဒါကြောင့် မောင်ကျော်လှမှာ ထုံသလို ကျင်သလိုဖြစ်နေတာပေါ့ဗျ။ ဒီလိုလုပ်လေ။ ထမင်းရည်ငှဲ့ပြီးရင် သွန်မပစ်နဲ့ ဆားလေးခတ်ပြီး မောင်ကျော်လှကို တိုက်ပေါ့။ သူ့မှာ အဲဒီဓာတ်တွေ လိုနေတာ"
လှထုံမှာ သိပ်တော့ ဘ၀င်မကျလှ။ စောစောကမိန်းမရဲ့ကလေးကျတော့ လိုင်စင်ပါတဲ့ အားဆေးတွေ သောက်ခိုင်းတာ ဘာသဘောလဲတွေးသည်။ ဒေါက်တာတုတ်ခိုင်က
"ဒီတော့ ကယ်လစီယမ်ဆေးပြားနဲ့ ဘီဝမ်းနဲ့ပေးလိုက်မယ်"
ဟု ပြောလိုက်ရာ လှထုံ ဆတ်ခနဲဖြစ်သွားပြီး
"ဒါမျိုးတော့ လုပ်ဖို့မကောင်းပါဘူးဆရာ"
ဟု ပြောလိုက်သည်။
"ဘာဖြစ်ရမလဲ။ စောစောကမိန်းမရဲ့သားကျတော့ ပိုပြီးအားပြင်းတဲ့ ဘီတူးအားဆေးပေးတယ်။ ကျွန်မသားကျတော့ ဘီဝမ်းပဲ ပေးတယ်။ ဒါ ဘာသဘောလဲ"
"ဟာ..မဟုတ်ဘူးလေ။ ဖြစ်ချင်တဲ့ရောဂါချင်းမှမတူဘဲ။ ပြီးတော့ ဘီဝမ်း၊ ဘီတူးဆိုတာ ဗိုက်တာမင်ဘီကို အုပ်စုခွဲထားတာ။ အားပြင်းတာ ပျော့တာနဲ့မဆိုင်ဘူး"
"လုပ်မနေပါနဲ့။ ကျွန်မကလည်း ခပ်ညံ့ညံ့ထဲကမဟုတ်ပါဘူး။ ဒီလောက်တော့ အကင်းပါးပါသေးတယ်။ ဟိုမိန်းမက ရွှေ တွဲလွဲ၊ ငွေတွဲလွဲမို့လို့ ပိုကောင်းတဲ့ဆေးကို ပေးတာမဟုတ်လား။ ဒီလို မျက်နှာမြင်ရာ ဟင်းဖတ်ပါတာမျိုးတော့ လှထုံတို့က သည်းမခံနိုင်ဘူး"
ဒေါက်တာတုတ်ခိုင်မှာ ဘယ်လို ဆက်ရှင်းပြရမှန်းမသိဘဲ ကြောင်တောင်တောင်ဖြစ်နေ၏။ ပြီးတော့ လှထုံက "မျက်နှာကြီးရာ ဟင်းဖတ်ပါ"ဆိုသောစကားပုံကို မှားပြောမိသည့်အတွက်လည်း ရယ်ချင်သလိုဖြစ်သွား၏။ ဒါကို လှထုံက သူ့ကို လှောင်တာပဲဆိုပြီး ပို၍မခံမရပ်နိုင်ဖြစ်သွားပြီး
"ဒီမှာ အထင်တော့မသေးလိုက်နဲ့နော်။ လှထုံတို့ကလည်း တတ်နိုင်ပါသေးတယ်ဆိုတာ ပြရမှာပေါ့။ နောက်ကို ဆရာနဲ့မကုတော့ဘူး။ ဆရာ့ထက်သာတဲ့ ဒေါက်တာဦးသုခနဲ့ပဲ ကုတော့မယ်။ ဒါပဲ"
ဟု ပြောပြီး မောင်ကျော်လှလက်ကိုဆွဲ၍ ဆောင့်ဆောင့်နှင့် ထွက်သွားသည်။ အိမ်ပြန်ရောက်တော့ ကျော်ကွန့်ကို ထိုအကြောင်းပြောပြပြီး
"ဘာရမလဲ ကျွန်မကလည်း ဒေါက်တာဦးသုခနဲ့ပြတော့မယ်လို့ ပြောခဲ့တာပေါ့။ မှတ်ကရော"
"နေစမ်းပါဦး။ နင်ပြောတဲ့ ဒေါက်တာဦးသုခဆိုတာ ဘယ်သူ့ကိုပြောတာလဲ"
ကျော်ကွန့်က မေးသည်။ လှထုံက ညံ့သေးတာပဲဆိုသောလေသံဖြင့်
"ကိုကျော်ကွန့်ကလည်း သတင်းစာလေး ဘာလေးမဖတ်ဘူးလား။ ဘဘဦးသုခကို ဒေါက်တာဘွဲ့ပေးလိုက်ပြီလေ"
"ဟေ့ အဲ့ဒါ"
"အင်း..ဘဘဦးသုခဆိုတာ ပညာရှိ။ သူတော်ကောင်။ သူ့လိုဆရာဝန်ထက် အဆတစ်ရာလောက်သာတယ်"
ကျော်ကွန့်မှာ သူ့နဖူးသူရိုက်ပြီး
"လှထုံရယ် ဘာတွေ လျှောက်ပြောနေတာလဲ။ ဆရာကြီးဦးသုခရတဲ့ ဒေါက်တာဘွဲ့ဆိုတာက စာပေပါရဂူဘွဲ့ကို ပြောတာ။ ဆရာဝန်ဘွဲ့ထက် အများကြီး ပိုပြီးအဆင့်မြင့်တယ် သိရဲ့လား"
နောက်တစ်နေ့ကျတော့ ကျော်ကွန့်သည် ဒေါက်တာတုတ်ခိုင်ကို သွားတောင်းပန်ရ၏။ ဒေါက်တာတုတ်ခိုင်ကလည်း လှထုံအကြောင်း သိပြီးသားမို့ ခွင့်လွှတ်ပြီး ရယ်နေလိုက်ရသည်။
*************************************
လှထုံနှင့် လူဝင်စား
--------------------
ဝတ္ထုတွေ၊ ဆောင်းပါးတွေထဲမှာ လှထုံစိတ်အ၀င်စားဆုံး အကြောင်းအရာတစ်ခု ပါလာသည်။ လူဝင်စားကိစ္စပင်ဖြစ်၏။ လူဝင်စားဆိုတာ တကယ်ရှိကြောင်း အထောက်အထား အကိုးအကားများဖြင့် ရေးသားထားသည်။
“လူဝင်စားလေး မောင်ဇော်မောင်” အကြောင်းဆိုလျှင် ဟိုဘ၀တုန်းက တင်ပါးကို ငြောင့်ဆူးခဲ့ရာ ခုဘ၀မှာလည်း မွေးကတည်းက အနာရွတ်ကြီးပါလာတာကို တင်ပါးလှန်ပြထားသော ဓါတ်ပုံနှင့်တကွ အတိအလင်း ဖော်ပြထားသည်။
ဒါကိုဖတ်ပြီးနောက် လ
ှထုံလည်း လူဝင်စားရောဂါ တက်လေတော့သည်။ မောင်ကျော်လှ ကျောင်းကပြန်လာသောအခါ အနားကိုခေါ်ပြီး
“ဘောင်းဘီ ချွတ်စမ်း”
“ဟာ… ဘာလုပ်မလို့လဲ အမေရ”
“စကားမရှည်နဲ့… ဟိုဘက်လှည့်”
ဟုပြောပြီး ဘောင်းဘီကို ဆွဲချ၊ တင်ပါးကို စစ်ဆေးသည်။
“အင်း… ဟုတ်တော့ဟုတ်နေပြီ၊ ဒီမှာ အစင်းရာကြီးတွေ့တယ်၊ အရင်ဘ၀က နင် ဘာတွေဖြစ်ခဲ့သလဲ၊ ငါ့ကို မှန်မှန်ပြောစမ်း”
“ဘယ်က အရင်ဘ၀လဲ… သားမသိဘူး”
“မသိလို့ မရဘူး၊ ဒီမှာ အမှတ်ကြီး တစ်ခုလုံး ပါနေတာ”
“အဲဒါ အမှတ်မဟုတ်ပါဘူး၊ ကျောင်းမှာ စာမရလို့ ဆရာမရိုက်တဲ့ အရှိုးရာကြီးပါ အမေရာ”
မောင်ကျော်လှနှင့် မအောင်မြင်တော့ ကျော်ကွန့်ဘက်လှည့်လာသည်။
“ကိုကျော်ကွန့်… ရှင့်တင်ပါးလှန်ပြစမ်း”
“ဟင်… ဘာဖြစ်လို့လဲ”
“အို… ကြည့်ချင်လို့ပေါ့”
“ဟာ… ရှက်စရာကြီး”
“အမယ်… လင်မယားချင်းတောင် ရှက်နေရသေးတယ်၊ ကဲပါ… ပြစမ်းပါ”
ကျော်ကွန့်မှာ သူ့မိန်းမအကြောင်းသိသဖြင့် စကားရှည်မနေတော့ဘဲ ပြလိုက်ရသည်။ လှထုံက ကြည့်ပြီးနောက်
“အင်း… ဘာမှ မရှိဘူး”
“ဒါဆိုလည်း ပြီးတာပဲ”
ဟု ကျော်ကွန့်က ပြီးပြီးရော ပြောလိုက်သည်။ သို့ရာတွင် လှထုံက မပြီးသေးဘဲ
“ကျွန်မကိုလည်း ကြည့်ပေးအုံး”
“ဟာ… ဒါတော့ ငါမကြည့်ရဲ့ဘူး”
“ရှင်ဟာလေ… ယောက်ျားမဟုတ်တာကျနေတာပဲ၊ ဘယ်တော့မှ အားမကိုးရဘူး၊ ဒါကြောင့် ရှင်နဲ့ပေါင်းရတာ ၀မ်းရေစပ်တယ်လို့ ပြောတာ”
ကျော်ကွန့်လည်း ဇာတ်လမ်းမရှည်ချင်သဖြင့် ကြည့်ပါ့မယ်ဟု သဘောတူလိုက်ရသည်။
“ဘာတွေ့လဲဟင်”
ကျော်ကွန့်မှာ တကယ်တမ်းသေသေချာချာ မကြည့်သော်လည်း လှထုံကျေနပ်အောင်
“အညိုကွက် တစ်ခုတော့ တွေ့သလိုပဲ” ဟုပြောလိုက်သည်။
“ဟာ… ဟုတ်ပြီ ဟုတ်ပြီ်”
“ဘာဟုတ်တာလဲ”
“ကျွန်မက လူဝင်စားရှင့် သိရဲ့လား”
“လူဝင်စား… ဟုတ်လား”
“ဟုတ်တယ်… လူဝင်စားမှ တခြားလူမဟုတ်ဘူး၊ ကျွန်မအမေကိုယ်တိုင် ၀င်စားတာ”
“နင်… နင်က နင့်အမေ၀င်စားတာ”
“အစစ်ပဲ… ဒီမှာ ကျွန်မမျက်နှာကို သေသေချာချာ ကြည့်စမ်း၊ အမေနဲ့ မတူဘူးလား”
“သားအမိပဲဟာ… တူမှာပေါ့”
“ဒါတင်မကသေးဘူးလေ… အမေ့တင်ပါးမှာလည်း ကျွန်မလိုပဲ အမှတ်ပါတယ်၊ ကဲ… ဒီလောက်တိုက်ဆိုင် နေတာ ဘာပြောချင်သေးလဲ”
“လှထုံရယ်… နဲနဲပါးပါးလည်း စဉ်းစားပါဦး၊ နင့်ကို မွေးတဲ့ အချိန်မှာ နင့်အမေက သက်ရှိထင်ရှားကြီး ရှိနေသေးတာပဲဟာ… ဖြစ်နိုင်ပါ့မလား”
“ဒါဆို ကျွန်မက ဘယ်သူဝင်စားတာလဲ”
“ဒါတော့ ငါလည်း ဘယ်သိပါ့မလဲ”
“လူဝင်စားဆိုတာ ရှိတယ် မဟုတ်လားဟင်”
“ကြားတော့ ကြားဖူးတာပဲ၊ ငါလည်း ကိုယ်တွေ့မဟုတ်တော့ မပြောတတ်ဘူး”
လှထုံကတွေပြီး စဉ်းစားနေသည်။ ကျော်ကွန့်မှာ ဘာများ လာဦးမလဲ မသိဘူးဆိုပြီး တထိတ်ထိတ် စောင့်စားနေစဉ် လှထုံက…
“ကိုကျော်ကွန့်… တစ်ခါလောက် ရှင် လူဝင်စားလုပ်ကြည့်ပါလား”
“ဟေ…”
“ဟုတ်တယ်… ကျွန်မစဉ်းစားနေတာ ဒီတစ်ခါ ကျွန်မကိုယ်ဝန်ရှိလာတဲ့အခါ ရှင် ကျွန်မ၀မ်းထဲ ၀င်စားပါလား ဟင်”
ကျော်ကွန့်မျက်လုံးပြူးသွားပြီး
…
“ဟာ… ဘယ်ဖြစ်မလဲ” ဟုတ်ရုတ်တရက် ပြောမိ၏၊ လှထုံမျက်နှာ တင်းခနဲ ဖြစ်သွားပြီး
“ဘာလဲ… ရှင်က ကျွန်မဗိုက်ထဲ ၀င်ရမှာ ရွံလို့လား”
“ဟာ… မဟုတ်ဘူးလေ၊ ဟိုဥစ္စာ… ၀င်စားတယ်ဆိုတာက…”
“သိပါတယ်… သိပါတယ်… ရှင်တို့ ယောက်ျားတွေဟာ ဒီအတိုင်းချည်းပါပဲ၊ မရခင်မှာတော့ ဖျာလိပ်နတ်လို ခေါင်းပေါ်တင်၊ နောက်တော့ ကျောခင်းပြီး အိပ်တော့တာပဲ၊ ဟင်း… ဟိုတုန်းကတော့ ညီမဟာ (၁၀)ရက်လောက် ရေမချိုးဘဲ နေရင်တောင် မွှေးနေမှာပါဆို၊ သကြားလုံးလေးသာဆိုရင် ငုံထားလိုက်ချင်တယ်ဆို…ခုတော့… ခုတော့…”
လှထုံသည် ငိုမဲ့မဲ့ ဖြစ်လာပြီ။ ကျော်ကွန့်ကလည်း လက်ဖက်ရည်ဆိုင် သွားချင်လှပြီ။ လိပ်ပတ်လည်အောင် ရှင်းပြဖို့က တော်တော်အချိန်ယူရမည်။ ထို့ကြောင့်
“ကဲပါ…လှထုံရယ်၊ ကလေးရှိလာတော့လည်း ကြည့်လုပ်ကြတာပေါ့၊ နင့်ဆန္ဒအတိုင်း ဖြစ်စေရမယ် ဟုတ်ပြီလား” ဟု ချော့မော့ပြောလိုက်ရသည်။
*******************************
(၂)
လှထုံနှင့် သိုက်ကြိုးဖြတ်ဆေး
------------------------------
လူဝင်စားကိစ္စပြီးပြီ အောက်မေ့တာ လှထုံက မကျေနပ်သေး။ အသုပ်ဆိုင်စကားဝိုင်းမှာ သူ့ကိုယ်သူ လူဝင်စားဖြစ်တယ် ထင်ကြောင်း ပြောသည်။ ထိုအခါ ဟုတ်နိုင်တယ်၊ မဟုတ်နိုင်ဘူး ၀ိုင်းပြီးဝေဖန်ကြသည်။ နောက်ဆုံးတော့ မပွေးက
"ဒါမျိုးဆိုတာ နားလည်တတ်ကျွမ်းတဲ့လူမှ ခွဲခြားပြောနိုင်မှာ"
ဟု ဆိုကြသည်။ ထို့ကြောင့် ဒေါ်အေးကြွယ်၏လမ်းညွှန်မှုအရ ဂိုဏ်းဆရာကြီးဆိုသူတစ်ဦးထံ ရောက်သွားသည်။ ဒါမျိုး လာလို့ကတော့ အဘတို့အကြိုက်ပေါ့။ စပြောကတည်းက လူဝင်စားဟုတ် မဟုတ်စစ်ပေးပါ ဆိုတော့ ဟဲ ဟဲ တချို့အထူးကု ဆေးခန်းကြီးတွေလိုပေါ့။
ငွေကုန်ကြေးကျခံ စစ်ဆေးပြီးမှ ဘာရောဂါမှမတွေ့ဘူးဆိုရင် အားနာစရာကြီး။ ပြီးတော့ ဘာမှမလုပ်ဘဲ ငွေညာယူတာလား၊ ရောဂါရှာဖွေရေးပညာ ညံ့လို့လား အထင်သေးခံရနိုင်သည်။ ဒီတော့ နှလုံးနည်းနည်းကြီးနေတယ်။ အသည်း နည်းနည်းယောင်နေတယ်။ သွေကြော နည်းနည်းကျဉ်းနေတယ်။ ဆေးခန်းမှာ တစ်ပတ်လောက်နေပြီးမှ အနားယူ ကုသလိုက်ရင် ကောင်းသွားမယ်၊ လေအေးစက်၊ ရေခဲသေတ္တာ၊ ဂြိုဟ်တုစလောင်း တပ်ဆင်ထားတဲ့ အထူးစပယ်ရှယ်အခန်းမှာ တက်မယ်ဆိုရင် အိမ်သာ အခမဲ့အသုံးပြုခွင့်ရမယ်။ နောက်တစ်ကြိမ် ဆေးရုံတက်လာတဲ့အခါ အသုံးပြုနိုင်တဲ့ ဒစ္စကောင့်ကူပွန်လည်း ပေးပါတယ်ပေါ့။
ခုလည်း ဒီလိုပဲလေ ခမျာ လူဝင်စားများလားလို့ အရမ်းသိချင်နေတာ။ ဒီတော့ ဆန္ဒပြည့်ဝအောင် ကူညီရမှာပေါ့။
"ကဲ... ကလေးမ၊ တင်ပျဉ်ခွေထိုင်လိုက်၊ လက်နှစ်ဖက်ကို ဒူးပေါ်တင်၊ လက်ဖ၀ါးတွေကိုဖြန့်ထား၊ လက်ချောင်းတွေ ပူးထား" ထို့နောက် ဆရာကြီးက တစ်ပေလောက်ရှိသော ကြေးဝါချောင်းကြီးဖြင့် ကြမ်းပြင်ကို တဒေါက်ဒေါက်ခေါက်ရင်း..
"လူဝင်စားဆိုရင် လက်ချောင်းတွေကို ခွဲပြစမ်း၊ ခွဲပြစမ်း" ဟု အမိန့်ပေးသောလေသံဖြင့် ပြောသည်။
လှထုံမှာ နဂိုကတည်းက လူဝင်စားလို့ သူ့ကိုယ်သူထင်နေခဲ့ပြီးသားဖြစ်တာကတစ်ကြောင်း၊ ဆရာကြီးက အဟိတ် အဟန့် မှင်မောင်းကောင်းတာကတစ်ကြောင်း၊ တစ်ချက်တစ်ချက်မှာ စိတ်မရှည်နိုင်သလို ကြေးဝါချောင်းကြီးကို ကြမ်းပေါ်ကို ဒုန်းခနဲ ဒိုင်းခနဲ ဆောင့်ချလိုက်တာကလည်း အသည်းထိတ်စရာဖြစ်နေတာကတစ်ကြောင်းတို့ကြောင့်
၃မိနစ်အကြာမှာပဲ လက်ချောင်းများသည် တဖြည်းဖြည်းပြန့်ကားကွဲထွက်လာလေသည်။ ဆရာကြီးလည်း ခေါင်းတညိတ်ညိတ်လုပ်ရင်း
"ဟုတ်တော့ဟုတ်နေပြီ။ ကိုင်း.. ဘယ်ဘ၀ကလာသလဲ သိရအောင် အဘအာရုံယူကြည့်လိုက်ဦးမယ်"
ဆိုပြီး မျက်စိကိုမှိတ်၍ သမာဓိတည်ဆောက်သလို လုပ်နေ၏။ တစ်ချက်တစ်ချက်မှာ
"ဟင်... ဟင်.... ဘာတဲ့ ဟုတ်လား"
ဟု ရေရွတ်လိုက်သေးသည်။ ၅မိနစ်ခန့်အကြာတွင် မျက်စိပွင့်လာပြီး သူ မြင်တွေ့ရသောအချက်ကို ပြောပြလေ၏။
"တကယ်တော့ ကျွန်မဟာ သိုက်ကလာတာတဲ့ ကိုကျော်ကွန့်ရေ"
ဟု လှထုံက ပြောသောအခါ ကျော်ကွန့် ဟိုက်ခနဲဖြစ်သွား၏။ သူသည် ဒီလိုကိစ္စမျိုးတွေကို ယုံတယ်လည်းမဟုတ်။ မယုံဘူးလည်းမဟုတ်။ တစ်စုံတစ်ယောက်က ကိုယ်တွေ့လိုလို ဘာလိုလို အချက်ကျကျပြောလျှင် ဟုတ်နိုးနိုးထင်သည်။ သိပ္ပံ နည်းကျကျ ယုတ္တိနည်းကျကျပြတဲ့လူမျိုးနှင့်တွေ့ပြန်တော့လည်း ဟုတ်သားပဲ..ဒါတွေဟာ အယူသီးမှုတွေပါ ဆိုပြီး ဖြစ်သွားပြန်ရော။
အခုကိစ္စမှာတော့ လှထုံတစ်ယောက် စိတ်အစွဲအလမ်းဖြစ်နေတာပဲဆိုတာ ရိပ်မိသည်။ သို့ရာတွင် လှထုံကတော့
"မ၀ိုင်းစိန်သိုက်ကလာတာလို့ပြောတယာ်။ ညီအစ်မခုနစ်ယောက်ရှိရာမှာ မ၀ိုင်းစိန်က အကြီးဆုံး၊ ကျွန်မက အငယ်ဆုံး အထွေးဆုံး၊ နာမည်က မသက်ပန်တဲ့။ အဲဒါ လူ့ဘ၀ကို ခဏသွားလည်ချင်တယ်လို့ ကျွန်မက ပူဆာတာ။ အစ်မတွေက စိတ်မချလို့ မလွှတ်ချင်ဘူး။ ကျွန်မက မသွားရရင် အစာမစားတော့ဘူးလို့ အကျပ်ကိုင်တော့မှ လွှတ်လိုက်ရတာ။ ဒါပေမဲ့ ကတိဝန်ခံချက် တစ်ခုတော့ ပေးခဲ့ရတယ်။ အသက်၃၀ပြည့်ရင် ပြန်လာပါ့မယ်ဆိုတဲ့ကတိပေါ့။ အင်း... ဒါကြောင့် ခုတစ်လောကျောက်ဂူကြီးတစ်ခုထဲ ရောက်ရောက်သွားတယ်လို့ အိပ်မက်မက်တာ ထင်ပါရဲ့။ အဲဒါ ကျွန်မကို သိုက်ကိုပြန်ခေါ်ဖို့ ကြိုတင်သတိပေးတာလား မသိဘူး"
လှထုံက ခံစားချက်အပြည့်နှင့်ပြောနေသည်။ ကျော်ကွန့်ပင်လျှင် သိသိကြီးနှင့်ရောယောင်ပြီး ငေးကြည့်နေမိ၏။
"အဘဆရာကြီးကတော့ သိပ်စိတ်မပူပါနဲ့လို့ပြောတယ်။ သိုက်ကြိုးကို သူဖြတ်ပေးနိုင်ပါတယ်တဲ့။ အဲဒါ ပွဲထိုးဖို့ရယ်၊ ဆေးဖယောင်းတိုင်ရယ်၊ အင်းချဖို့ရယ်... ကျွန်မ ကိုယ်ပွားရုပ်တုလုပ်ဖို့ရယ် ငွေနှစ်သောင်းလောက် ကုန်မယ်လို့ပြောတယ်"
"နှစ်သောင်း...."
ဒီတော့မှ ကျော်ကွန့်ဆီက အသံခုန်ထွက်လာသည်။ သူ့မှာ ငွေနှစ်သောင်းကို လုံးခနဲ ခဲခနဲထုတ်ဖို့ ဘယ်ရှိပါ့မလဲ။ ကြံဖန်ရှာလို့ရတယ်ထားဦး။ ဒါဟာ သက်သက်လိမ်ညာပြီး အကြံအဖန်လုပ်တာပဲ။ အလကားပါဟာ ယုံမနေပါနဲ့လို့ပြောလို့လည်း လှထုံက လက်ခံမှာမဟုတ်။ ထို့ကြောင့်
"လောလောဆယ် ငွေနှစ်သောင်းရှာဖို့က မလွယ်ဘူးလေ။ နင် အသက်၃၀ပြည့်ဖို့ကလည်း ၆လလောက် လိုသေးတာပဲ ဒီကြားထဲမှာ ကြည့်လုပ်ကြတာပေါ့"
ဟု မရေမရာပြောပြီး အချိန်ဆွဲဖို့ ကြိုးစားကြည့်သည်။ လှထုံ သွေးအေးသွားမှ ဖျောင်းဖျကြည့်မယ် စိတ်ကူးသည်။ သို့ရာတွင် လှထုံက
"ဒီလို ပေါ့ပေါ့ပြောလို့မရဘူးနော်။ သူတို့က မစောင့်နိုင်တော့လို့ အသက်၃၀မပြည့်ခင် စောစောစီးစီးအရင် ဦးအောင် လိပ်ပြာလာနုတ်သွားရင် ဘယ်လိုလုပ်မလဲ"
ဒီနောက်မှာတော့ လှထုံသည် အိပ်မက် မကြာခဏမက်တော့သည်။ ရှေးခေတ်မင်းသမီးတွေလို နန်းဝတ်နန်းစားတွေ ဆင်မြန်းရတာမျိုး၊ မိန်းမတစ်ယောက်က သူ့လက်ကိုဆွဲပြီး အတင်းခေါ်နေသဖြင့် လွတ်အောင်ရုန်းပြီး ထွက်ပြေးရတာမျိုး၊ ကျောက်ဂူကြီးထဲမှာ ရွှေ၊ ငွေ လက်ဝတ်လက်စားတွေ၊ ရတနာသေတ္တာကြီးမြင်ရတယ်ဆိုတာမျိုး။
ကျော်ကွန့်မှာလည်း အတော်ဦးနှောက်စားနေရ၏။ လှထုံကလည်း ပြက္ခဒိန်ကို မကြာခဏလှန်လှန်ကြည့်နေသည်။ တစ်ရက် ကျော်ကွန့်က အလုပ်ကအပြန် လမ်းမှာ ဦးဖိုးဗြော့နှင့်သွားဆုံသည်။
"ဟေ့ကောင် ကျော်ကွန့်... ၀ါကျွတ်တော့မယ်နော်။ ဆွမ်းတင်ဖို့မမေ့ကြနဲ့ဦး"
ဟု ဦးဖိုးဗြော့က သတိပေးသည်။ သူက ဦးရှင်ကြီးတင်တဲ့ကိစ္စလည်း လုပ်တတ်တာကိုး။ ဒီမှာတင် ကျော်ကွန့် စိတ်ကူးတစ်ခုရသည်။ လှထုံကိစ္စအတွက် ဦးဖိုးဗြော့ကို အကူအညီတောင်းဖို့ပင်ဖြစ်၏။ ဒီအဘိုးကြီးနဲ့ဆိုရင်တော့ ငါးရာ တစ်ထောင်လောက်နဲ့ ကိစ္စပြီးနိုင်သည်။ သို့ရာတွင်
"ဒီကိစ္စမျိုးက မလွယ်ဘူးကွ။ သူ့ဘက်ကိုယ့်ဘက် ပညာပြိုင်ရတာ။ နောက်ဆုံးအချိန်မှာ သူနိုင် ကိုယ်နိုင် အကြိတ်အနယ် လုရတဲ့အခါ ကာယကံရှင်အတွက် အန္တရာယ်ကြီးတယ်။ အခန့်မသင့်ရင် ဆောင်ရွက်စီမံပေးတဲ့လူကိုပါ ထိခိုက်တတ်တယ်။ ငါ အာမ မခံရဘူး"
ဟု ဦးဖိုးဗြော့က အင်တင်တင်လုပ်နေသည်။ ပြီးတော့ လှထုံကလည်း သူ့ကို အထင်မကြီးလှ။
"ဦးလေးဗြော့က သိပ်မစွမ်းလှပါဘူး။ သူ ကူညီနိုင်မှာမဟုတ်ဘူး။ ဒေါ်ပွင့်ကြီးကိစ္စတုန်းကတောင် ဘာမှ မတတ်နိုင်ဘဲနဲ့"
ဟု ထောက်ပြသည်။ ထိုစကားသည် ကျော်ကွန့်အတွက် အကြံကောင်းတစ်ခုရရှိသွားစေသည်။
တစ်ခါတုန်းက အပျိုကြီးဒေါ်ပွင့်သည် စိတ်ကယောင်ချောက်ချားဖြစ်ရာမှ သရဲပူးသလိုလို ဘာလိုလိုနှင့် "ငါ့ကို ဘာမှတ်လဲ"ဟု အော်ဟစ်ပြီး ဆူပူသောင်းကျန်းနေခဲ့ဖူးသည်။ ဘယ်လိုမှ ထိန်းသိမ်းဖျောင်းဖျလို့မရ။ ဦးဖိုးဗြော့တော့ နားလည်မှာပဲ ဆိုပြီး သွားခေါ်သည်။
ဦးဖိုးဗြော့က ဒေါ်ပွင့်ရှေ့မှာ ဟန်နဲ့ပန်နဲ့ထိုင်ပြီး ဟိန်းလိုက်ဟောက်လိုက်လုပ်သည်။ ဒေါ်ပွင့်က ဖြုံတောင်မဖြုံဘဲ
"သေချင်းဆိုးကြီး...ရှူနာရှိုက်ကုန်းကြီး...ငါ့ကို ဘာမှတ်သလဲ"
ဟု ပြန်အော်သည်။ ဦးဖိုးဗြော့က ရေမန်းတစ်ခွက်တိုက်သည်။ ဒေါ်ပွင့်က ဖန်ခွက်ကိုယူ၍ သောက်မလို့ဟန်ပြပြီးမှ ဦးဖိုးဗြော့မျက်နှာကို ရေမန်းတွေနဲ့ ပက်ထည့်လိုက်လေ၏။
ထိုစဉ်မှာ ဒေါက်တာတုတ်ခိုင်ရောက်လာသည်။ သူလည်း ဘာလုပ်ရမှန်းမသိ။ အပျိုကြီးတွေ ဒီအရွယ်ရောက်လျှင် တစ်ခါတလေ စိတ်ကယောက်ကယက်ဖြစ်တတ်ကြောင်းကိုတော့ သဘောပေါက်သည်။ စိတ်ငြိမ်ဆေးလေး၊ အားဆေးလေး ပေးလိုက်လျှင်ပြီးသည်။ သို့ရာတွင် ခုလောလောဆယ်ကြမ်းနေတာကို ထိန်းချုပ်ဖို့ကျတော့ သိပ်မလွယ်လှ။ လူတွေကလည်း သူ့ကို အားကိုးတကြီးကြည့်နေကြသည်။ အကြံအိုက်နေရာမှ တစ်စုံတစ်ခုကို ဖျတ်ခနဲသတိရလိုက်သည်။
ဒေါ်ပွင့်သည် ဆေးထိုးခံရမှာကို သေမလောက်ကြောက်သည်။ နာမှာစိုးသောကြောင့်တော့မဟုတ်။ ရှက်လို့ဖြစ်၏။ ဆေးခန်းမှာတောင် ရှက်နေတာ။ လူကြားထဲမှာဆိုလျှင် ပိုဆိုးတော့မှာပေါ့ဟု တွေးမိပြီး
"ကိုင်း... ဒါလောက်တောင်ဖြစ်လှတာ သူ့ကို ၀ိုင်းချုပ်ထားလိုက်ကြစမ်း...ဆေးမန်းထိုးရမယ်"
ပြောရင်း နှစ်ဆယ်စီစီဆေးထိုးပိုက်ကို ဆွဲထုတ်လိုက်သည်။ ထိုအခါ ဒေါ်ပွင့်က
"မလိုဘူး၊ ဆေးမန်းမထိုးဘူး"
ဟု အကျောက်အကန်ငြင်းသည်။
"မထိုးချင်ရင် အခု ထွက်သွားစမ်း"
ဒေါက်တာတုတ်ခိုင်က ခပ်ငေါက်ငေါက်အမိန့်ပေးလိုက်တော့မှ ဒေါ်ပွင့်လည်း ၀ါးခနဲ သမ်းလိုက်ပြီး
"စောစောက ဘာဖြစ်သွားတာလဲ။ ဟင်... လူတွေလည်း အများကြီးပဲ"
ဟု ဘာမှမသိခဲ့ဟန်ဖြင့်ပြောပြီး အကောင်းပကတိဖြစ်သွား၏။ ထိုကိစ္စကြောင့် ဒေါက်တာတုတ်ခိုင်မှာ ပယောဂလည်း နိုင်တယ်ဆိုပြီး နာမည်ကြီးခဲ့သေးသည်။
အခုလှထုံကိစ္စမှာလည်း ဒါမျိုးလုပ်လျှင် ဖြစ်နိုင်သည်ဟု ကျော်ကွန့်တွေးမိသည်။ ထို့ကြောင့် ဒေါက်တာတုတ်ခိုင်ဆီမှာ သိုက်ကြိုးဖြတ်ဆေးရှိကြောင်း၊ အဲဒီဆေးထိုးလိုက်လျှင် ကောင်းသွားမှာဖြစ်ကြောင်းပြောတော့ လှထုံက
"ဟုတ်လား... စွမ်းကောစွမ်းပါ့မလား ကိုကျော်ကွန့်ရယ်"
ဟု မယုံမရဲမေးသည်။
"မစွမ်းဘဲနေပါ့မလား၊ နင် မှတ်မိတယ်မဟုတ်လား။ ဟိုတစ်ခါ ဒေါ်ပွင့်ကြီး သရဲဝင်ပူးတုန်းကလေ။ ဆရာက ဆေးမန်းနဲ့ထိုးမယ်ပြောတော့ တစ်ခါတည်း လန့်ပြေးတာလေ။ ဒါတောင် တကယ်မထိုးရသေးဘူး။ ဆရာရဲ့ အဟိတ်အဟန့်နဲ့ သီလသမာဓိကလည်း ရှိသေးတာကိုးဟ။ အမယ် အခု ငါပြောတဲ့ သိုက်ဖြတ်ဆေးကလည်း လွယ်လွယ်ရတယ်မထင်နဲ့။ ထိုးဆေးပုလင်းကို ကန်တော့ပွဲထဲမှာထားပြီး ၇ရက်တိတိသက်သတ်လွတ်စား၊ ဥပုသ်စောင့်ပြီး အဓိဌာန်ဝင်ထားရတာသိလား"
လှထုံစိတ်ထဲ ပိုပြီးအထင်ကြီးသွားအောင် ဆင်လုံးတွေထည့်ပြောရသည်။ ပတေးတို့ ဖိုးနီတို့ကိုလည်း ၀ိုင်းကူပြီး လှော်ခိုင်းရသည်။ မောင်ဝကိုလည်း ကူညီပြီး လှိပ်ပေးဖို့ပြောကြည့်သေးသည်။ မောင်ဝက
"ဒီကိစ္စလောက်ကတော့ ဒေါက်တာတုတ်ခိုင်ကို အပူကပ်မနေစမ်းပါနဲ့ကွာ။ ငါ့တာဝန်ထား၊ အဲဒီ ဥစ္စာစောင့်မတွေ ငါ နားရင်းတစ်ချက်စီလောက် အုပ်ထည့်လိုက်တာနဲ့ တန်းနေအောင်ပြေးမှာပါ"
ဆိုသဖြင့် သူ့ကို တာဝန်မပေးရဲတော့။
ဒေါက်တာတုတ်ခိုင်သည် အစပိုင်းမှာတော့
"ဟာကွာ ဆရာဝန်ဆိုတာ လူနာကိုလိမ်ညာပြီး ဆေးမထိုးကောင်းဘူးကွ"
ဟု ပြောသေးသည်။
"ဆရာကလည်း ဒေါ်ပွင့်ကြီးကိစ္စတုန်းကကျတော့ကော"
"ဒါက အရေးပေါ်မို့မဖြစ်မနေလုပ်လိုက်ရတာကိုး။ ပြီးတော့ တကယ်လည်း ဆေးထိုးဖြစ်တာမှ မဟုတ်ဘဲ"
"ဆရာပဲ တစ်ခါက ပြောဖူးတယ်လေ၊ ဆရာဝန်တစ်ယောက်အတွက် လူနာရောဂါပျောက်အောင် ကုဖို့က အဓိကတာဝန်ပဲဆို"
ဟု အကြောင်းပြတော့မှ (အန္တရာယ်ရှိသောကိစ္စလည်း မဟုတ်သဖြင့်) သဘောတူလိုက်ရသည်။
လှထုံကို ဘားပလက်နှင့်ဘီတွဲနှစ်မျိုးစပ်ပြီး ၃ရက်ဆက်တိုက်ထိုးပေးလိုက်သည်။ အမယ် လှထုံက ပြောသေးသည်။
"သိုက်ကြိုးက တော်တော်ခိုင်တယ် ထင်တယ်နော်။ သိုက်ဖြတ်ဆေး ထိုးတော့ တအားနာတာပဲ"
********************************
လှထုံနှင့် နိမိတ်ပုံ
-----------------
ကျော်ကွန့်သည် ဖိနပ်စက်ရုံမှာ အလုပ်လုပ်သည်။ သူ့ဆရာဦးကြည့်ဝမ်းက စာဖတ်ဝါသနာပါသည်။ ဂျာနယ်တွေ ၀ယ်ဖတ်၊ မဂ္ဂဇင်းများကို ကျော်ကွန့်အား ပေးဖတ်သည်။ ကျော်ကွန့်က အိမ်ကိုယူလာပြီး ဖတ်သည်။
လှထုံကတော့ စာဖတ်တာ သိပ်ဝါသနာမပါ။ ဗီဒီယိုကြည့်ရတာကိုပဲ သဘောကျသည်။ သူ့အကြောင်းပြချက် ကတော့ စာဖတ်ရတာ သိပ်ပင်ပန်းတယ်၊ စာလုံးတွေပေါင်းပြီး အဓိပ္ပာယ်ဖော်ရတယ်။ ဘာပြောလဲဆိုတာလည်း စဉ်းစားရသေးတယ်။ တော်တော် အလုပ်ရှုပ်တာပဲ။ ဗီဒီယိုကြည့်ရတာပဲ ကောင်းတယ်။ အရုပ်လည်းမြင်ရ၊ အသံလည်း ကြားရ၊ သီချင်းလည်းပါတယ်။ နောက်ခံတီလုံးတွေကလည်း နားထောင်လို့ကောင်းတယ်။ ကြောက်စရာအခန်းတွေမှာ ဆိုရင် ဒန် ဒန့် ဒန် ဆိုပြီးကြားလိုက်တာနဲ့ ကြက်သီးတောင်ထတယ်။
ကျော်ကွန့်တောင်မှ စာဖတ်ဝါသနာပါတယ် ဆိုသော်လည်း လုံးစေ့ပတ်စေ့ နားလည်တာမဟုတ်။ တချို့ စကားလုံးတွေက ဘာကိုဆိုလိုမှန်းမသိ။ တချို့ဟာတွေကျတော့ ၀တ္ထုသာဆိုတယ်။ ဇာတ်လမ်းလည်းမပါ။ ဇာတ်သိမ်းခန်းလည်းမပါ။ ဇာတ်သိမ်းခန်းလည်းမရှိဘဲ တိုးလိုးတန်းလန်းကြီး။ သူက ဇာတ်သိမ်းခန်းမှာ ဘာဖြစ်သွားသလဲဆိုတာ သိချင်လို့ဖတ်တာလေ။
ကဗျာတွေဆိုလျှင် ပိုတောင်ဆိုးသေးသည်။ စာတစ်ကြောင်းကိုတောင် နားလည်အောင် အဓိပ္ပာယ်ဖော်ဖို့ မလွယ်။ သူက ကဗျာဆိုလျှင် ချိုးနှစ်ကောင်၊ ထနောင်းပင်ညီနောင်က လွမ်းအောင်ကူချွဲဆိုတာမျိုးပဲ ကြိုက်သည်။
ပြီးတော့ နိမိတ်ပုံဆိုတာရှိသေးသည်။ သူသိတဲ့နိမိတ်ဆိုတာက ရှေ့မှာ ဘာဖြစ်မလဲလို့ ကြိုပြီး သတိပေးတာပဲ။ မနက် အိမ်ကအထွက် ခလုတ်တိုက်မိရင် အလုပ်ထဲမှာ အဆင်မပြေဖြစ်တတ်တယ်။ ကျီးသာရင် ဧည့်သည်လာမယ်။ တောက်တဲ့အော်ရင် လာဘ်ကောင်းတယ်။ ဒါပဲ။
ထို့ကြောင့် ကျော်ကွန့်သည် မဂ္ဂဇင်းဖတ်လျှင် ကမ္ဘာကျော်တို့၏ အတွင်းရေးများ၊ ထူးခြားဆန်းကြယ် ဖြစ်ရပ်များ ဆိုတာတွေကို ရွေးဖတ်သည်။ ၀တ္ထုဆိုလျှင်လည်း ဖတ်ရတာ နားလည်သလား၊ ဇာတ်သိမ်းခန်း ပါသလားဆိုတာကို အရင်ကြည့်ပြီးမှ ဖတ်သည်။ များသောအားဖြင့်တော့ ဂျာနယ်တွေသာ အဖတ်များသည်။
အထူးသဖြင့် ဘောလုံးဂျာနယ်ပေါ့။ ဒါကတော့ ရှင်းသည်။ ဘယ်အသင်း နိုင်တယ်၊ ဘယ်အသင်း ရှုံးတယ်။ ဘယ်အသင်းက အခြေအနေကောင်းတယ်။ ဘယ်အသင်းက တန်းဆင်းဇုန်ထဲက မလွတ်သေးဘူး။ ဘယ်သူတွေ ဒဏ်ရာရနေတယ်။ ဘယ်သူက ဘယ်အသင်းကိုပြောင်းတော့မယ်။ ဖတ်ရတာ အကုန်နားလည်သည်။ ဒါတောင်မှ
"စူပါဆန်းဒေးဒါဘီညနေခင်းမှာ အသည်းဟက်တက်ကွဲခဲ့ရတဲ့ ဖာဂီရဲ့သရဲနီများ..."
ဆိုတာမျိုး တစ်ခါတစ်ခါပါလာလျှင် မျက်မှောင်ကုတ်ပြီး စဉ်းစားရသေးသည်။ ဒီကြားထဲမှာ လှထုံက လာလာမေးတတ်သေးသည်။
"ကိုကျော်ကွန့်... ဒီဝတ္ထုထဲမှာ ပါလာတယ်။ ကောင်မလေးက ခံစားချက်တွေကို အန်ထုတ်ပစ်လိုက်တယ် ဆိုတာလေ။ သူက ဘာဖြစ်လို့အန်ရတာလဲ..ကိုယ်ဝန်ရှိနေလား"
ဆိုတာမျိုးဖြစ်၏။ တစ်ခါကလည်း
"ဒီထဲမှာ ဒေါသကို မျိုချပစ်လိုက်တယ်လို့ ရေးထားတယ်။ ဒေါသက စားလို့ ၀ါးလို့ရတာမှမဟုတ်တာ။ ဘယ်လိုလုပ် မျိုချမလဲ။ ယုတ္တိလည်း မရှိဘူး" ဟု စောဒကတက်သည်။ ကျော်ကွန့်က
"တကယ်မျိုချတာတော့မဟုတ်ဘူးပေါ့ဟာ။ ဥပမာအနေနဲ့ပြောတာပေါ့"
ဟု တတ်သလောက် မှတ်သလောက် ရှင်းပြရသည်။
နောက်တစ်နေ့ မနက်ကျတော့ ကျော်ကွန့် ၀မ်းလျှောသည်။ ညတုန်းက ချဉ်ပေါင်နှင့် မျှစ်ဟင်းရည်တွေ ပိုနေတာ နှမြောသဖြင့် အကုန်သောက်ပစ်ခဲ့မိသောကြောင့်ဖြစ်၏။ အိမ်သာထဲမှာ တဘူဘူ တဘွမ်ဘွမ် သံစုံမြည်နေတုန်း လှထုံက အပြင်မှာလာရပ်ရင်း လှမ်းအော်သည်။
"ကိုကျော်ကွန့်.. ကိုကျော်ကွန့်.."
"ဘာလဲ နေဦး မပြီးသေးဘူး"
ပြောရင်းမှာပင် မထိန်းနိုင်ဘဲ အောက်က အသံတစ်ချက်ထွက်သွားသေးသည်။
"အိမ်သာဝင်မလို့မဟုတ်ပါဘူး၊ မေးစရာရှိလို့"
"ဟာ.. အရေးထဲမှာ ဘာလဲ"
"ရှင် မနေ့က စက်ရုံထဲမှာ ဘာမကျေနပ်စရာတွေ့ခဲ့လို့လဲ"
"ဘာမှ မတွေ့ပါဘူးဟ၊ ဘာကြေင့် လာမေးနေရတာလဲ"
"မနေ့တုန်းက ဒေါသတွေကို ၀မ်းထဲမျိုချခဲ့ရလို့ အခုမှ အောက်ကနေ ပြန်ထွက်လာတာမဟုတ်လား"
ကျော်ကွန့်မှာ ၀မ်းထဲလည်း ရစ်ပြီး နာလာ၊ ရယ်လည်း ရယ်ချင်လာသဖြင့် ရှုံ့မဲ့မဲ့ကြီး ပြုံးလိုက်မိ၏။ ရသစာပေ ဆိုသည်မှာ အစွမ်းထက်လှချေ၏တကား လို့ပဲ ပြောရပေတော့မည်။
***************
လှထုံနှင့် တို့ဆေး
-------------------
လှထုံသည် ဈေးသွားဖြစ်စေ၊ ဈေးပြန်ဖြစ်စေ မပွေးဆိုင်ကို ၀င်တတ်သည်။ ဒီနေ့တော့ ဗိုက်ဆာနေသဖြင့် ဈေးအသွားမှာဝင်မည်ဟု စိတ်ကူးထားသည်။ ကျောင်းပိတ်ရင်ဖြစ်သောကြောင့် မောင်ကျော်လှက သူလည်း လိုက်ချင်တယ် ပြောသည်။
"လိုက်ချင်ရင် မြန်မြန်လုပ်၊ အီလေးဆွဲမနေနဲ့"
လှထုံက စိတ်မြန်လက်မြန်ရှိသော်လည်း ကျော်ကွန့်က လှုပ်ရှားသွားလာရာမှာ နှေးကွေးလေးလံသည်။ အပြင်တစ်ခါထွက်ဖို့ကို အထဲဝင် အပြင်ထွက် တော်တော်နှင့်မပြီးနိုင်။ မောင်ကျော်လှလည်း သူ့အဖေအတိုင်းပဲ မနက် အိပ်ရာက မြန်မြန်မထချင်။ မျက်နှာသစ် သွားတိုက်တာကိုက အတော်ကြာသည်။ ဆောင်းတွင်းဆို ပိုဆိုးသည်။ အေးစက်နေသော ညသိပ်ရေကို ထိရကိုင်ရမှာ ရွံပြီး နှောင့်နှေးနေတတ်သည်။ ဒီလိုနဲ့ကျောင်းနောက်ကျခဲ့ပေါင်းလည်း မနည်းတော့။
ခုလည်း သွားပွတ်တံကြီး ပါးစပ်ထဲထိုးထည့်ထားရင်းက စာကလေးတွေ အစာကောက်တာကို ငေးကြည့်နေသည်။
"ဟဲ့...မြန်မြန်...မြန်မြန်"
ဟု လှထုံက သတိပေးမှ သွားဆက်တိုက်သည်။ မျက်နှာသစ်ပြီးတော့ လဲစရာ ဘောင်းဘီ ရှာနေတာကလည်း စိတ်မရှည်ချင်စရာ။ သွားကြတော့မယ်လို့ထွက်လာပြီးမှ အိမ်ပေါက်ဝရောက်တော့
"ဟာ.. ဗိုက်နာလာပြီ အမေရာ၊ အိမ်သာတက်လိုက်ဦးမယ်၊ ခဏလေးစောင့်နော်"
ဆိုပြီး နောက်ဖေးဘက် ပြန်ဝင်ပြေးသည်။
"နင်တို့သားအဖနှစ်ယောက်ဟာ အဲဒီအတိုင်းပဲ အရေးထဲဆို ဗိုက်နာပြီး ချေးပါတာကို တော်တော်ဝါသနာပါတယ်"
မောင်ကျော်လှသည်
"အမေ မသွားနဲ့ဦးနော်"
ဟု အိမ်သာထဲက လှမ်းအော်သည်။ လှထုံ စိတ်တိုလာပြီး
"ငါ သွားနှင့်တော့မယ်။ နင့်ဘာသာ ၀အောင်ပါပြီးမှလိုက်ခဲ့တော့။ တကယ်လို့ ဆိုင်မှာ ငါမရှိတော့ရင်လည်း အသုပ်တစ်ပွဲ မှာစားလိုက်။ ငါ နင့်အတွက်ပါ ပိုက်ဆံပေးခဲ့မယ်"
"ပဲကြော်ဖိုးပါ ပေးခဲ့နော် အမေ"
"မရဘူး...ပိုက်ဆံနည်းနေတယ်။ အကြော်မပါဘဲစား"
ဟုပြောပြီး တစ်ယောက်တည်း ထွက်လာခဲ့သည်။ နှုတ်ကလည်း
"တကတဲတော်.. ခပ်ကွင်းပြင်နေတာနဲ့ ရွာသာကြီးရောက်တော့မယ်"
လှထုံကတော့ ဒီအတိုင်းပဲ။ စကားပုံတွေ၊ ဆိုရိုးစကားတွေဟာ သူ့ပါးစပ်ထဲရောက်ရင် တလွဲတွေ ဖြစ်ကုန်တတ်သည်။ သူပြောလေ့ရှိတာတွေကတော့
"လှထုံတို့ကို အထင်မသေးပါနဲ့၊ မြွေမသေ ငွေမရှားပါဘူး"
"သတိထားပါ ကိုကျော်ကွန့်ရယ်၊ လူမသေ တုတ်မကျိုးဆိုတဲ့စကားလည်း ရှိသားပဲ"
"ရှင်နည်းရာ အနဂ္ဂလူထွက်ဆိုတာမျိုး ဖြစ်နေပြီ"
"ဆန်စင်ရာ ကျည်ပွေ့အတက်ပေါက်လို့ ဘယ်ဖြစ်မလဲ"
တစ်ခါကလည်း ကျော်ကွန့်ကို သူ အနိုင်ယူခဲ့ပုံအကြောင်း လူတွေကြားမှာ အားရပါးရ ပြောခဲ့တာကတော့..
ကျော်ကွန်သည် စက်ရုံမှပေးသော ဘောနပ်စ်ငွေကို အကုန်မအပ်ဘဲ လျှိုထားခဲ့သည်။ ပတေးတို့၊ မောင်ဝတို့၊ ဖိုးနီတို့နှင့်အတူ စားကြ သောက်ကြဖို့ ဖယ်ထားခြင်းဖြစ်၏။ ဒါကို လှထုံက ရိပ်မိပြီး ပြဿနာရှာသည်။
"အစပိုင်းမှာတော့ သူက ဘူးခံပြီး ငြင်းသေးတယ်လေ။ ဟင် ဘယ်ရမလဲ၊ ကျွန်မက သူ့ရဲ့ငယ်ပါကို ဖမ်းကိုင်လိုက်တော့ ၀န်ခံရတော့တာပေါ့"
နားထောင်နေကြသူတွေ ဟယ်ခနဲဖြစ်ကုန်ကြသည်။
"လှထုံရယ်...ဘယ်လိုပြောလိုက်တာလဲ"
မလုံးက သတိပေးတော့
"ဟုတ်တယ်လေ၊ ငယ်ပါကိုကိုင်လိုက်တော့ ဘာတတ်နိုင်သေးလဲ"
"ငယ်နိုင်ကို ကိုင်တယ်လို့ပြောရတယ်ဟဲ့၊ နင်နဲ့တော့ ခက်နေပြီ"
ဟု ၀မ်းဆွဲသည်ဒေါ်အေးကြွယ်က ၀င်ပြင်ပေးတော့မှ
"ဟုတ်လား..သိပါဘူး" ဟု စပ်ဖြဲဖြဲ ပြန်ပြောသည်။
ဒီနေ့ အသုပ်ဆိုင်မှာတင်ထားတဲ့တော့ပစ်ကတော့ မှုခင်းဂျာနယ်ထဲမှာပါသောသတင်းနှင့် ပတ်သက်သည်
ခရီးသွားရင်း ခင်မင်သွားသော လူတစ်ယောက် တိုက်တဲ့အအေးပုလင်းကိုသောက်ပြီး အိပ်ပျော်သွား၊ အိပ်ရာကနိုးတော့ အိတ်ထဲက ပိုက်ဆံ၊ နာရီ၊ ဆွဲကြိုး စသည်တို့ မရှိတော့တဲ့အကြောင်း၊
တက္ကစီသမားတစ်ယောက် ခရီးသည်ကျွေးတဲ့ကွမ်းယာကို စားမိရာက မူးနောက်နောက်ဖြစ်လာပြီး ကားကို လမ်းဘေး ထိုးရပ်၊ တစ်ချက်မေ့ခနဲဖြစ်သွားပြီး သတိပြန်ရတော့မှ ကားဆွဲလို့ရတဲ့ငွေတွေပါသွားတာ သိလိုက်ရကြောင်း၊
"အင်း... လူတွေကလည်း စားဝတ်နေရေး ကျပ်တည်းတော့ ကြံမိကြံရာတွေ လုပ်ကြတော့တာပဲနော်"
ဟု မပွေးက မှတ်ချက်ပြုတော့ အပျိုကြီးဒေါ်ပွင့်က
"ဒါကြောင့် ငါတို့တော့ သူများကျွေးတာဆို ဘယ်တော့မှမစားဘူး။ ဟိုတစ်ပတ်က ဂျာနယ်ထဲပါတဲ့သတင်းကို ကြည့်ပါလား၊ တူအရင်းဆိုပြီး စိတ်ချက်လက်ချ ယုံမိတာ၊ အဆိပ်ခတ်သတ်ပြီး ပစ္စည်းတွေ ယူသွားပါရောလား"
"ဒေါ်ပွင့်ကြီးလည်း သတိထားဦးနော်။ အတွင်းပစ္စည်းတွေ ပါသွားဦးမယ်"
မလုံးက ချွန်ပေးလိုက်သည်။
"အမယ်လေး..အတွင်းပစ္စည်းတွေ ဘာတွေလည်းမရှိပါဘူးအေ။ ဟောဒါလေးတောင် အိုစာမင်းစာအတွက် ကုတ်ကတ် ချန်ထားရတာပါ။ အရောင်လက်ရင် အန္တရာယ်ရှိမှာစိုးလို့ သနပ်ခါးနဲ့ပွတ်ပြီး ဖုံးထားရတယ်" ဆိုပြီး ပန်ထားသောစိန်ခြယ်နားကပ်ကလေးကို ကိုင်ပြသည်။
"ကိုယ့်ဟာကိုယ် အိမ်ထဲမှာနေတာပဲဆိုပြီးတော့လည်း စိတ်ချလို့မရဘူး။ ညဘက်ကျတော့ အိပ်မွေ့ချပြီး ၀င်ခိုးချင် ခိုးတတ်တာ"
"အင်း...ဟုတ်မယ်။ တရုတ်သိုင်းကားတွေထဲမှာကြည့်ပါလား၊ ထရံပေါက်ကနေ ၀ါးပိုက်ကလေးထိုးထည့်ပြီး အိပ်ငွေ့တွေ မှုတ်ထည့်လိုက်တာလေ။ တစ်ခါတည်းမူးမေ့ပြီး အိပ်မောကျသွားတော့မှ လိုချင်တာတွေ စိတ်ကြိုက်ရွေးခိုးလို့ရသွားတာပေါ့"
"ဒါကိုကာကွယ်ဖို့က လွယ်ပါတယ်အေ..သံပုရာသီးတစ်လုံးကို ခေါင်းရင်းမှာထားပြီး အိပ်လိုက်၊ အိပ်မွေ့ချလို့ မရတော့ဘူး။ အိပ်ခါနီးရင် ဘုရားရှိခိုးဖို့လည်း မမေ့နဲ့" ဟု ဒေါ်အေးကြွယ်က ၀င်၍ပညာပေးသည်။
"ကျွန်မကတော့ တို့ဆေးပဲကြောက်တယ်"
ရွှေကြည်က ခေါင်းစဉ်တစ်ခုထပ်တင်လိုက်၏။
"ဟုတ်တယ်၊ အဲဒါက ကြောက်စရာအကောင်းဆုံးပဲ၊ တို့ဆေးမိပြီဆိုရင် ဘာမှ မတတ်နိုင်တော့ဘူး"
"တချို့တွေက ဆေးမှုန့်ကို ဆေးပေါ့လိပ်ထဲထည့်ပြီး ဖွာတာ၊ ဆေးလိပ်သောက်သလိုလို ဘာလိုလိုနဲ့ မီးခိုးငွေ့တွေနဲ့ မှုတ်တတ်တယ်။ တချို့ကျတော့ ဆေးကို လက်မှာသုတ်ထားတယ်။ လူကိုတို့လိုက်တာနဲ့ ကြောင်ပြီး သတိလက်လွတ်ဖြစ်သွားတာပဲ။ အဲဒီအခါကျမှ လူပြတ်တဲ့နေရာကိုခေါ်သွားပြီး ပစ္စည်းတွေ ချွတ်ယူတာ၊ တကယ်စွမ်းတဲ့တို့ဆေးမျိုးကျတော့ တကူးတက ချွတ်ယူနေစရာတောင် မလိုဘူး။ အမိန့်ပေးလိုက်တာနဲ့ ကိုယ်ကိုယ်တိုင်က လက်ကောက်တွေ၊ ဆွဲကြိုးတွေ ဖြုတ်ပေးမိတော့တာပဲတဲ့"
ဒေါ်အေးကြွယ်က
"ဒါမျိုးမဖြစ်အောင် ကိုယ်က အမြဲသတိထားနေရတယ်။ သွားတဲ့ လာတဲ့အခါ ဘုရားတရားကို အာရုံပြု၊ တကယ်လို့ တစ်ယောက်ယောက်က ကိုယ့်နားမှာကပ်လာမယ်၊ ဆေးနဲ့လုပ်မယ်လို့ မသင်္ကာရင် ဖုဌဿ လောကဓမ္မေဟိ၊ စိတ္တံ ယသံ နကမ္မတိ၊ အသောကံ ၀ိရဇံ ခေမံ ဆိုတဲ့ ဂါထာကို ရွတ်လိုက်"
လှထုံက ငေးပြီး နားထောင်နေစဉ် သူ့ကို နောက်ကျောကလာတို့သဖြင့်
"အမယ်လေး ဗုဒ္ဓေါ"
ဟု လန့်ပြီးလှည့်ကြည့်တော့ မောင်ကျော်လှဖြစ်နေသည်။
"ကဲ..နင် စားပြီးအိမ်ပြန်တော့။ လျှောက်လည်း ဆော့မနေနဲ့ဦးနော်"
ဟု မှာထားခဲ့ပြီး ဈေးသို့ ဆက်ထွက်လာခဲ့သည်။ လမ်းရောက်တော့မှ မောင်ကျော်လှကိုပါ စောင့်ခေါ်ခဲ့ရကောင်းသားဟု တွေးမိ၏။ ခုချိန်မှာ အဖော်လေးပါမှ သွားလို့လာလို့ သင့်တော်မယ်။ မသမာသူတွေက ယုံရတာမဟုတ်ဘူး။ ဈေးကိုသွားတဲ့လမ်းမှာ ညောင်ပင်ကြီးနားက လူပြတ်တယ် စသဖြင့် လျှောက်စဉ်းစားနေတုန်း မျက်နှာချင်းဆိုင်ဘက်မှ လူကြီးတစ်ယောက် လာနေတာ တွေ့လိုက်ရသည်။
အသားမည်းမည်း တုတ်တုတ်ခိုင်ခိုင် မျက်နှာက အဆီတွေပြန်လို့။ ပြီးတော့ ဆေးပေါ့လိပ်ကို မီးခိုးထောင်းထောင်း ထအောင် ဖွာလာသည်။ လှထုံ လန့်သွား၏။ အနားရောက်လာသောအခါ မီးခိုးငွေ့တွေကို မရှူမိအောင် အသက်အောင့်ထားလိုက် ရသည်။
လူကြီး ဖြတ်ကျော်သွားပြီး ခပ်လှမ်းလှမ်းရောက်သွားတော့မှ အသက်ကို ၀အောင်ပြန်ရှူရဲသည်။ တော်ပါသေးရဲ့...။ ဒါတောင် ဘေးကဖြတ်အလျှောက်မှာ လူကြီးကတစ်ချက်စိုက်ကြည့်တာ ကြောက်စရာကြီး။ မဖြစ်သေးဘူး၊ မဖြစ်သေးဘူး။ နေ့လယ်ကျရင် ဒေါ်အေးကြွယ်ဆီသွားပြီး ဟိုဂါထာကို သင်ခိုင်းရမယ်။ ဈေးရောက်ရင် သံပရာသီးဝယ်ဖို့မမေ့နဲ့။ ပြီးတော့ အိပ်ငွေ့တွေ မှုတ်ထည့်လို့မရအောင် အိပ်ခန်းဘေးက ထရံအပေါက်တွေကို ဖာခိုင်းရဦးမယ်။
ထိုအခိုက်မှာပင် သူ့ဘေးကို လူတစ်ယောက်ကပ်လာပြီး လက်မောင်းကိုတို့လိုက်သည်။ သူ အငိုက်မိသွား၏။ ကြက်သီးတွေ ဖျန်းခနဲထသွားသည်။ ထို့နောက် တစ်ကိုယ်လုံးထူပူပြီး မျက်လုံးတွေ ပြာသွားသည်။ ပိုက်ဆံအိတ်ထည့်ထားသော ဈေးခြင်းတောင်းကို အလိုအလျောက် ကမ်းပေးလိုက်မိ၏။ ထိုသူသည် ခြင်းတောင်းကို ဆွဲယူပြီးသည့်တိုင် ထွက်မသွားသေးဘဲ ဘေးမှ ကပ်လိုက်လာနေဆဲ။ နားကပ်ကျန်သေးတယ်.. ဖြုတ်ပေးလိုက် ဖြုတ်ပေးလိုက်။
လှထုံသည် နားကပ်ဆီသို့ လက်လှမ်းလိုက်စဉ် ရှေ့မှမိန်းမတစ်ယောက်လျှောက်လာတာကို တွေ့ရသည်။ ထိုမိန်းမကို မြင်ဖူးသည်။ သို့ရာတွင် ဘယ်သူရယ် စဉ်းစားလို့မရ။ ထိုမိန်းမက လှမ်းနှုတ်ဆက်သည်။
"လှထုံ...ဈေးသွားမလို့လား"
လှထုံသည် အာစေးထည့်ထားသလို ဘာမှပြန်ပြောလို့မရ။ ကြောင်ငေးငေးကြီးသာ စိုက်ကြည့်နေမိ၏။
"ဟိုမှာ မေးနေတယ်လေ"
ဘေးမှလူက ပြောသည်။ ကိုကျော်ကွန့်ရဲ့အသံနဲ့တူလိုက်တာ။ ဧကန္တ ကိုကျော်ကွန့်ရဲ့အသံကိုတုပပြီး ဖြားယောင်းသွေးဆောင်....
"ဟဲ့..."
ဘေးမှလူက လှထုံ၏ပခုံးကို ကိုင်လှုပ်လိုက်သည်။ ဒီတော့မှ ရုတ်တရက်သတိပြန်ဝင်လာပြီး လှည့်ကြည့်လိုက်တော့
"ဟင် ကိုကျော်ကွန့်"
ကျော်ကွန့်က လှထုံကို အကဲခတ်ကြည့်လိုက်ပြီး
"နင် ဘာဖြစ်နေတာလဲ... ကြောင်တောင်တောင်နဲ့"
လှထုံက ရင်ဘတ်ကိုဖိလိုက်ပြီး
"အမယ်လေး တော်သေးတာပေါ့။ ဒါနဲ့ စောစောက ကျွန်မလက်မောင်းကို လာတို့တာ ဘယ်သူလဲ"
"ဟ...ဘယ်သူရှိရမှာလဲ၊ ငါပဲပေါ့။ နင့်ကို လှမ်းမြင်လို့ လိုက်လာတာ"
လှထုံ တုံ့ခနဲရပ်လိုက်သည်။ ကျော်ကွန့်လည်း ယောင်တောင်တောင်လိုက်ရပ်သည်။ လှထုံက ခါးထောက်ပြီး
"ဒီမှာ ကိုကျော်ကွန့်၊ ရှင် အဲဒီအောက်လမ်းပညာတွေ ဘယ်တုန်းက တတ်ထားသလဲ ဟင်" ဟု မေးလိုက်လေ၏။
(၃)
လှထုံနှင့် စာရေးဆရာ
------------------------
တစ်ရက်မှာ ကျော်ကွန့် စက်ရုံမှသူ့ဆရာငှားလိုက်သောစာအုပ်တစ်အုပ် ယူလာသည်။ "မင်း ဒီလိုစာအုပ်မျိုးတွေလည်း ဖတ်ကြည့်သင့်တယ်"ဆိုပြီး ပေးလိုက်ခြင်းဖြစ်၏။ "သိပ္ပံမောင်ဝ၏ ၀တ္ထုဆောင်းပါးများ"အမည်ရှိစာအုပ်ဖြစ်၏။ ကျော်ကွန့်သည် ထိုစာအုပ်ကို သဘောကျသွားပြီး လက်ကမချနိုင်အောင် သဲကြီးမဲကြီးဖတ်တော့သည်။ လှထုံက ထမင်းစားဖို့လာခေါ်တာကိုတောင်
"ပြီးမှစားမယ်"
ဟု ပြောလိုက်သည်။ လှထုံက
"ဘာစာအုပ်မို့ ဒီလောက်တောင် စိတ်ဝင်စားနေရတာလဲ"
ပြောရင်း စာအုပ်အဖုံးကို ငဲ့ကြည့်ပြီး
"သိပ္ပံမောင်ဝ.. ဟယ် ကြည့်စမ်း... မောင်ဝတောင် စာရေးဆရာဖြစ်နေပြီ။ ဒါ မောင်ဝရေးတဲ့ စာအုပ်လားဟင် ကိုကျော်ကွန့်"
ကျော်ကွန့်မှာ စာအုပ်ထဲမှာပါသော အာမိတ်နှင့် လွေဇောခွေးနှစ်ကောင်အကြောင်းကို အလွန်ဖတ်ကောင်းနေသဖြင့် အာရုံပျက်သွားမှာစိုးလို့ပဲလား၊ လှထုံမေးတာကို သေသေချာချာ နားမထောင်ဘဲ ပြီးပြီးရော လုပ်လိုက်တာလားတော့မသိ။
"အေး..ဟုတ်တယ်"
ဟု ပြောလိုက်သည်။
ကျော်ကွန့်က အမှတ်တမဲ့နေလိုက်သော်လည်း လှထုံကတော့ တကယ်ယုံသွားသည်။ နောက်တစ်နေ့ ကျော်ကွန့် အလုပ်သွားနေချိန်တွင် စာအုပ်ကိုယူပြီး ရွှေကြည့်ဆီ သွားသည်။
"ရွှေကြည်ရေ...၀မ်းသာစရာပြောရဦးမယ်။ မောင်ဝက စာရေးဆရာဖြစ်နေပြီတဲ့ သိလား"
ဆိုပြီး စာအုပ်ကိုပြသည်။
"ဟုတ်ပါ့မလား လှထုံရယ်..ကိုမောင်ဝက စိတ်ကြမ်းကိုယ်ကြမ်းနဲ့ဟာ စိတ်ကူးယဉ်တတ်တဲ့လူလည်း မဟုတ်ဘူး"
"ဘာလို့မဟုတ်ရမှာလဲ..ကိုကျော်ကွန့်ကိုယ်တိုင် ပြောတာ"
"ငါ့ကိုတော့ ကိုမောင်ဝက ဘာမှမပြောပါလား"
"တမင် အသိမပေးတာနေမှာပေါ့။ ငါ ထင်တာကတော့ စာရေးလို့ရတဲ့ ပိုက်ဆံတွေကို ကျိတ်ပြီးစုနေတာဖြစ်မယ်။ ပြီးမှ နင် ရုတ်တရက်ဝမ်းသာသွားအောင် ဖွင့်ပြောပြီး အသိပေးမယ်။ ရွှေကြည်...နင်တို့ လက်ထပ်ဖို့တော့နီးပြီလို့ ငါထင်တယ်ဟ"
ဟု လှထုံက ၀မ်းသာအားရပြောသည်။
တကယ်တော့ ရွှေကြည်သည် ဒီလောက်တုံးတဲ့သူတစ်ယောက်မဟုတ်ပါ။ သို့ရာတွင် လူဆိုတာက မျှော်လင့်ချက်နှင့် မျှားလျှင်ေ၀၀ါးသွားတတ်သည်။ ယုံလောက်အောင်ပြောလျှင် ဟုတ်နိုးနိုးထင်လာတတ်သည်။ အလိုဆန္ဒပြင်းပြနေသောအချိန်ဆိုလျှင် ပိုဆိုးသည်။ လူပေါင်း သန်းနဲ့ချီရှိတဲ့အထဲက သိန်းတစ်ထောင်ဆု ပေါက်မယ့်လူဟာ ငါပဲလို့ ထင်နေတဲ့သူကို အရူးလို့ ပြောမလား။ ဖယောင်းတိုင်တစ်တိုင်၊ သစ်ရွက်တစ်ရွက်၊ ပန်းတစ်ပွင့်၊ သစ်သီးတစ်လုံးကို ပါရဂူဘွဲ့ထက် ပိုပြီးအားကိုးချင်နေသူတွေနှင့်ယှဉ်လျှင် ရွှေကြည် ဇဝေဇ၀ါဖြစ်သွားတာ ဘာဆန်းလို့လဲ။ ပြီးတော့ သူက မောင်ဝဆိုလျှင် ဇွတ်မှိတ်ပြီး လွှတ်အထင်ကြီးတတ်တာ မဟုတ်လား။
ရွှေကြည်သည် လှထုံဆီက သိပ္ပံမောင်ဝစာအုပ်ကို ခဏငှားသွားသည်။ မောင်ဝက သူ့သူငယ်ချင်းတွေဆိုရင်တော့ အသိပေးမှာပဲဟု တွေးသည်။ ကျော်ကွန့်က အလုပ်သွားနေသည်။ ထို့ကြောင့် ပတေးဆီသို့ ထွက်လာခဲ့၏။
ပတေးက ပစ္စည်းအ၀ယ်ထွက်နေသဖြင့် ဆိုင်မှာမရှိ။ ဘာနူးကလည်း အလုပ်များနေသည်။ ဒါမျိုးက လူကြားထဲမှာ ပြောလို့ကောင်းတာလည်းမဟုတ်။ ဒါနဲ့ ဖိုးနီအလုပ်လုပ်ရာ ဦးကုလားခေါက်ဆွဲစက်သို့ သွားပြန်သည်။ ဖိုးနီကိုတွေ့လျှင်လည်း ဦးကုလားကိုမေးမည်ဟု စိတ်ကူးသည်။ တွေ့မယ့်တွေ့တော့လည်း တကယ့်ကောင်နဲ့မှသွားဆုံသည်။
"ဓာတ်ခဲ...ကိုဖိုးနီ ဘယ်သွားလဲဟင်"
"ဂျုံအိတ်တွေ သွားသယ်မလို့တဲ့၊ အဖေနဲ့အတူ ပါသွားတယ်။ အစ်မရွှေကြည် ဘာကိစ္စရှိလို့လဲ"
"ဟို...အဲ....ဒီကိစ္စ"
ရွှေကြည်က လက်ထဲမှစာအုပ်ကို ယောင်ပြီး မြှောက်ပြမိ၏။ ဓာတ်ခဲက စာအုပ်ကိုကြည့်ပြီး..
"ဟာ ကျွန်တော်အရမ်းဖတ်ချင်နေတဲ့စာအုပ်ပဲ။ ခဏငှားခဲ့ပါလား"
"ဟင်...နင်လည်း ဒီစာအုပ်အကြောင်း သိတယ်ပေါ့ ဟုတ်လား"
ရွှေကြည်က သူ့ဇောနှင့်သူမို့ ဓာတ်ခဲကိုတောင် အားကိုးချင်စိတ်ဝင်လာသငည်။ ဓာတ်ခဲဆိုတာကလည်း သိပ်အကင်းပါးတဲ့ ကောင်ပဲ။ ရေးကြီးသုတ်ပျာရောက်လာတဲ့ ရွှေကြည်ရယ်၊ သိပ္ပံမောင်ဝစာအုပ်ရယ် တစ်ခုခုတော့ အဆက်အစပ်ရှိနေပြီဆိုတာ ရိပ်မိတာပေါ့။ ထို့ကြောင့်...
"သိတာပေါ့ဗျ.. အစ်မကကော ဘယ်လို ထင်လို့လဲ"
ဟု စကားပြန်တောက်လိုက်သည်။ ရွှေကြည်က ဟိုဒီကြည့်ပြီး အသံ ခပ်အုပ်အုပ်ဖြင့်
"ဓာတ်ခဲ... ငါ့ကို မှန်မှန်ပြောစမ်းပါ။ ဒီစာအုပ်ဟာ ကိုမောင်ဝရေးတဲ့စာအုပ်ဆိုတာ တကယ်ပဲလား"
ဒီလောက်ဆိုလျှင် ဓာတ်ခဲလိုကောင်အတွက် ချွန်တွန်းလုပ်ဖို့ လုံလောက်ရုံမက စိတ်ကူးသစ်တွေတောင် ထပ်ရသွားပြီ။
"သိပ်ဟုတ်တာပေါ့...တချို့နေရာတွေမှာ ဘယ်လိုတွေးရင်ကောင်းမလဲလို့ ကိုမောင်ဝက ကိုဖိုးနီနဲ့တိုင်ပင်နေတာ ကြားဖူးတယ်။ ဒါကြောင့် ဒီစာအုပ်ကို ကျွန်တော် သိပ်ဖတ်ချင်နေတာပေါ့"
"ကိုမောင်ဝက ၀တ္ထုရေးတတ်လို့လား"
"အစပိုင်းတော့ သိပ်မကျွမ်းကျင်ဘူးပေါ့၊ အဲ့ဒါ ကျွန်တော်တို့အဖေက ၀တ္ထုရေးနည်းသင်ပေးတယ်။ ပြင်သင့်တာတွေလည်း ပြင်ပေးတယ်။ တကယ်တော့ ကျွန်တော်တို့အဖေကလည်းဟိုတုန်းက စာရေးဆရာကြီးတစ်ယောက်ပဲကိုး"
"ဦးလေးဦးကုလားကလည်း စာရေးဆရာပဲ...ဟုတ်လား"
"ဟုတ်တယ်...တစ်ချိန်က နာမည်ကြီးပေါ့ ခဏနေဦး"
ဆိုပြီး အိမ်ရှေ့ဧည့်ခန်းထဲက မှန်ဗီရိုကိုဖွင့်ပြီး စာအုပ်ကြီးတစ်အုပ်ယူလာသည်။
"ဒါ ကျွန်တော်တို့အဖေရေးခဲ့တဲ့စာအုပ်ပေါ့"
ဟုပြောပြီး ရွှေကြည်ကိုပြသည်။
စာအုပ်က အကြီးကြီး၊ အထူကြီး၊ အနက်ရောင်သားရေဖုံးနှင့် ခံ့ညားစွာ ချုပ်ထားသည်။ အဖုံးပေါ်မှာ စာအုပ်အမည်ကို ရွှေရောင်စာလုံးဖြင့် ခတ်နှိပ်ထားသည်။
"ဦးကုလားရာဇ၀င်..."
*********************************************
လှထုံနှင့် အတိတ်စိမ်း
--------------------------
ကျော်ကွန့်မျက်နှာသစ်နေစဉ် လှထုံက ကိုကျော်ကွန့်ဟု လာခေါ်သည်။ ကောက်ညင်းပေါင်းဝယ်ထားတယ်လို့များ ပြောမလားလို့
“ အေး အေး စားမယ်"
ဟု ပြန်ပြောလိုက်မိ၏။
"ဘာစားမှာလဲ"
"မသိဘူးလေ ကောက်ညင်းပေါင်းများ ၀ယ်ထားသလားလို့လို"
"အို..အဲဒါမဟုတ်ပါဘူး။ ကိုကျော်ကွန့် ညက အိပ်မက်များ မက်သေးသလားလို့"
"ဘာ...ဘာဖြစ်လို့ မက်ရမှာလဲ မမက်ပါဘူး"
"ဟင်း တော်တော်အားကိုးရတယ်"
ကျော်ကွန့် ကြောင်သွား၏။
"ဟ အိပ်မက်မက်တာနဲ့ အားကိုးရတာနဲ့ ဘာဆိုင်လို့လဲ"
"ဆိုင်တယ် ဆိုင်တယ် ကိုရှိန်ဆိုရင် ခဏခဏ မက်တာပဲ သူမက်ရင် မှန်တာများတယ်"
"ဘာမှန်တာလဲဟ"
"အိပ်မက်ကို အတိတ်ကောက်လို့ရတာပြောတာ။ မပွေးက သိပ်မကောက်တတ်လို့သာ နို့မို့ဆို တီဗီတောင်ဝယ်နိုင်နေပြီ"
"အို..ဒါတွေက တိုက်ဆိုင်မှုတွေပါဟာ"
"တိုက်ဆိုင်မှုမဟုတ်ဘူး။ ဆိုင်ရာ ပိုင်ရာက အိပ်မက်ပေးတာ"
"အဲဒါဆိုလည်း တစ်ခါတည်းသာကို နံပါတ်ပြောလိုက်ပေါ့။ ဘာလို့ အတိတ်တွေ၊ နိမိတ်တွေပေးနေရတာလဲ"
"သူတော်ကောင်းဆိုတော့ ဒါမျိုးတည်တည့်မပြောကောင်းဘူး"
"သူတော်ကောင်းတွေကတော့ ဒါမျိုးလုပ်မယ်မထင်ပါဘူး။ ကဲ...အိပ်မက်ပေးတယ်ပဲထားပါတော့။ ဒီလောက်လူတွေ အများကြီး ဘယ်သူ့ကို ဘယ်လိုအိပ်မက်ပေးရပါ့မလဲလို့ ဇာတ်လမ်းဆင်နေရတာနဲ့ပဲ သူတို့မှာ တခြားအလုပ်လုပ်ရမှာ မဟုတ်တော့ဘူး"
"ရှင် ကပ်သပ်ပြီးတော့မပြောနဲ့။ တန်ခိုးရှိတဲ့လူအဖို့ ဒီလောက်က အသေးအဖွဲပဲ။ ကဲပါ... သိပ်အရစ်ရှည်မနေနဲ့။ ဒီနေ့ည အိပ်မက်မက်အောင်ကြိုးစား ဒါပဲ"
"ဟာ အိပ်မက်ဆိုတာ ကိုယ်မက်ချင်တိုင်း မက်လို့ရတဲ့အရာမဟုတ်ဘူးလေ။ နင်ကော မက်လို့လား"
"အမယ်၊ ကျွန်မက နေ့တိုင်းလိုလိုမက်တာ။ မနက်ကျတော့ ပြန်စဉ်းစားလို့မရလို့ပေါ့"
ထိုအခိုက်မှာ မောင်ကျော်လှ အနားရောက်လာပြီး
"အမေ မုန့်ဖိုးပေးဦးလေ"
ဟု ပြောသည်။ လှထုံက ဆယ်တန်တစ်ရွက်ပေးလိုက်ပြီး
"ဟဲ့ သားရော အိပ်မက်မက်သေးလား"
"ခင်ဗျာ"
"အိပ်မက်မက်သေးလားလို့ မေးနေတာ"
"မသိဘူးအမေ"
"ဘာ ကိုယ်အိပ်မက်မက်လား၊ မမက်ဘူးလားဆိုတာတောင် မသိဘူးလား။ နင်လည်း နင့်အဖေလိုပဲ ကြောင်တောင်တောင်နဲ့။ ဒါပဲနော် နောက်နေ့ အိပ်မက်မမက်ရင် မုန့်ဖိုးမပေးဘူး"
မောင်ကျော်လှမှာ မျက်လုံးလေး ကလယ်ကလယ်လုပ်ရင်း ခေါင်းကုတ်ပြီး ထွက်သွားသည်။ လှထုံက ကျော်ကွန့်ဘက်လှည့်ပြီး
"ရှင်လည်း အိပ်မက်မက်ဖို့သာပြင်ထား"
ဟု ကြိမ်းလိုက်လေသည်။
ကျော်ကွန့်သည် သူ့မိန်းမအကြောင်း သိသည်။ လှထုံက တချို့ကိစ္စတွေမှာ ဘယ်လိုရှင်းပြလို့မှ နားမလည်။ တစ်ခါတလေ ကျတော့ မဟုတ်ကဟုတ်က ယုတ္တိမတတ်တာတွေ ပြောလည်း ယုံချင်မှယုံတတ်သည်။ ခုလည်း အိပ်မက်မမက် မနေရဟု ရာဇသံပေးထားသည်။ ဒါကို ဘယ်လိုဖြေရှင်းရပါ့မလဲတွေးရင်း ပတေးတို့ဆိုင်ဘက်သို့ လျှောက်လာ၏။ ကိုရှိန်တို့အိမ်ရှေ့ ရောက်သောအခါ စိတ်ကူးတစ်ခုရသဖြင့်...
"ဗျို့ ကိုရှိန်၊ ကိုရှိန်"
ဟု အော်သည်။ ကိုရှိန် ထွက်ကြည့်သည်။
"လက်ဖက်ရည်ဆိုင် လိုက်ဦးမလား"
"အေးကွ၊ ငါလည်း ခုပဲ ထွက်တော့မလို့"
ဆိုပြီး ထွက်လိုက်လာသည်။ လမ်းမှာ ကျော်ကွန့်က သူ့ပြဿနာကို ပြောပြပြီး
"အဲဒါ ကျွန်တော့်မှာလည်း ဒုက္ခပဲ။ ကျွန်တော်ကလည်း အလုပ်ပင်ပန်းတော့ အိပ်လိုက်ရင် တုံးခနဲ့ပဲ။ အိပ်မက်မက်ဖို့တောင် အချိန်မရဘူးလား မသိပါဘူးဗျာ။ လှထုံအကြောင်းလည်း ခင်ဗျားသိသားပဲ။ စွဲမိစွဲရာဗျ။ ကိုရှိန်ကတော့ အိပ်မက် ခဏခဏမက်တယ်ဆိုတော့ တော်သေးတာပေါ့"
ကိုရှိန် တဟားဟားရယ်သည်။
"ဘာရယ်တာလဲဗျ။ ခင်ဗျားက ဒီမှာ ဦးနှောက်ခြောက်ရတဲ့ကြားထဲ"
"ကျော်ကွန့်ရာ မင်းလည်း လှထုံယောကျာ်းလို့ မပြောရဘူး။ တော်တော်နသေးတာပဲ။ ဘယ်သူက နေ့တိုင်းအိပ်မက်မက်ပါ့မလဲကွ"
"ဟင် ဒါနဲ့ လှထုံပြောတော့"
ကိုရှိန်က လက်ကာလိုက်ပြီး
"ဒီမှာကွ ကျော်ကွန့်ရ။ အိပ်မက်ဆိုတာ ကိုယ်တစ်ယောက်တည်းကြိတ်ပြီးမက်တာလေကွာ။ တကယ်မက် မမက် လိုက်စစ်ဆေးလို့ရတာလိုက်လို့"
"ဒါဆို"
"အေးပေါ့ကွ၊ မမက်ဘဲနဲ့မက်တယ်ဆိုပြီး စိတ်ကူးတည့်ရာတွေ လျှောက်ပြောတာပေါ့။ အမယ် တစ်ခါတစ်ခါ ရမ်းတုတ်တာက မှန်ချင် မှန်နေတာကွ"
"မမှန်တာရော"
"ဒီတော့လည်း ကောက်တာ နည်းလမ်းမကျလို့ပေါ့ကွာ။ တကယ်က ပြောင်းပြန်ယူရမှာတို့ ဘာတို့ လျှောက်ဖြီးတာပေါ့"
"အေးဗျာ။ ဟုတ်သားပဲ ခင်ဗျားနည်း မဆိုးဘူး"
နောက်တစ်နေ့မနက်ကျတော့ ကျော်ကွန့်က လှထုံကို
"ငါ ညက အိပ်မက်မက်တယ်"
ဟု ပြောသည်။
"ဘယ်လိုမက်တာလဲ"
"ကြက်သားဟင်းနဲ့ ထမင်းစားရတယ်လို့ မက်တာ"
အမှန်တော့ ကျော်ကွန့်သည် ကြက်သားနှင့်မစားရတာကြာလို့ သူစားချင်တာကို ပြောခြင်းဖြစ်သည်။ လှထုံကတော့ ကျေနပ်သွားသည်။ ဒီနည်းမှာ ဆိုးတော့မဆိုး။ ဘာအိပ်မက်မက်တယ်ဆိုတာ စဉ်းစားရတာပဲ အလုပ်ပိုသည်။ သို့သော် သူ့အတွက် နားအေးသွားသော်လည်း မောင်ကျော်လှကတော့ မစားသာလှ။
"နင်ဟာ စားဖို့၊ မုန့်ဖိုးတောင်းဖို့ပဲ တတ်တယ်။ မိဘကို ကူညီဖော်မရဘူး။ အိပ်လိုက်ရင် ကုလားသေ၊ ကုလားမော၊ အိပ်မက်ကလေး ဘာလေးမက်ဖို့ စိတ်မကူးဘူး"
ဟု လှထုံက ဆူလေသည်။ မောင်ကျော်လှမှာ အတော်ခွကျနေ၏။ ထိုအခါ ကျော်ကွန့်က သူ့နည်းကိုသုံးဖို့ တိုးတိုးတိတ်တိတ် မှာသည်။ မောင်ကျော်လှမှာ လှထုံသားပီပီ အတီးအတဖြစ်၏။ မနက် အိပ်ရာကနိုးလို့ လှထုံက ညက ဘာမက်သလဲမေး။ ကျော်ကွန့်က စိတ်ကူးထားသည့်အတိုင်း ဖြေ။ နင်ကော ဆိုပြီး မောင်ကျော်လှကို မေးသောအခါ
"အဲ..သားလည်း အဖေမက်တဲ့အတိုင်းပဲ"
ဟု သံယောင်လိုက်လေ၏။ "ဟိုက် သွားပြီ"ဟု ကျော်ကွန့်စိတ်ထဲ လန့်သွားသော်လည်း လှထုံက
"ဟင် အိပ်မက်တစ်ခုထဲကို နှစ်ယောက်ပြိုင်တူမက်တယ်ဟုတ်လား။ ထူးခြားလိုက်တာ။ ပြီးတော့ အင်း..အခု ရုံတင်ပြနေတဲ့ ဇာတ်ကားနာမည်ကလည်း နှစ်ယောက်တစ်အိပ်မက်ဆိုတော့ ဟာ.. ဟုတ်ပြီ။ ဒီလောက်တိုက်ဆိုင်တာ ကျိန်းသေပြီ"
ဆိုပြီး ၀မ်းသာအားရဖြစ်သွားလေ၏။
ကျော်ကွန့်တိုသားအဖလည်း စိတ်သက်သာရာရသွား၏။ သို့ရာတွင် နေ့တိုင်း နှစ်ယောက်တစ်အိပ်မက်လုပ်လို့မရသဖြင့်..
"ဟေ့ကောင်၊ ငါ့အိပ်မက်အတိုင်းချည်း လိုက်လုပ်လို့မရဘူးကွ။ ကိုယ့်ဘာသာလည်း စဉ်းစားဦး"
ဟု ကျော်ကွန့်ကပြောတော့..
"သား..မစဉ်းစားတတ်ဘူး။ အဖေပဲ သားအတွက်ပါ စဉ်းစားပေးပါနော်"
ဆိုသဖြင့် ကျော်ကွန့်မှာ တစ်ယောက်နှစ်အိပ်မက် စဉ်းစားနေရသည်။ ဒီကြားထဲမှာ လှထုံက နောက်တစ်ဆင့်တက်ပြီး အိပ်မက်တွေကို အတိတ်ပါ တစ်ပါတည်းကောက်ခိုင်းနေပြန်သဖြင့် ကျော်ကွန့်ခမျာ အတော်ဦးနှောက်စားနေရရှာလေသည်။ နောက်ဆုံး မတတ်သာသဖြင့် အတိတ်ကောက်ကောက်ပုံနည်း။ တနင်္လာ၊ အင်္ဂါ စသော နေ့သင့်နံသင့်ဂဏန်းများ ယူနည်းတွေကို သင်ပေးရ၏။ ဒါတောင် မကြာခဏဆိုသလို တလွဲတချော်ဖြစ်သေးသည်။
တနင်္ဂနွေသည် ပထမဦးဆုံးနေ့ဖြစ်သောကြောင့် ဂဏန်းအားဖြင့် "တစ်"ဖြစ်သော်လည်း အက္ခရာမှာ နောက်ဆုံးဖြစ်သော "အ"ဖြစ်နေတာကို သူ နားမလည်။ ထို့ကြောင့် တနင်္ဂနွေ(၁)၊ တနင်္လာ(၂)၊ က ခ ဂ ဃ င ဆိုပြီး ဇယားချပေးထားရသည်။ ဒါတောင် "၉"နဲ့ "၀"ကျတော့ ဘယ်လိုယူမလဲဆိုတာ ပြဿနာဖြစ်သေးသည်။ ဒါကျတော့ ကျော်ကွန့်လည်း မသိ။ ဦးဖိုးဗြော့ကိုမေးတော့ စနေနံ ဆိုလျှင် "၉"ယူလို့ရကြောင်း၊ "၀"လည်း ယူနိုင်ကြောင်း၊ "၇"ကတော့ အဓိကဖြစ်ကြောင်း သိရ၏။
သူတို့ရပ်ကွက်ထဲမှာ သင်္ချာစွမ်းရည်တော့ အတော်မြင့်လာသည်။ ဟိုအရင်က တစ်ခုခုတွက်ချက်လျှင် လက်ချောင်းတွေ ချိုးရင်း ပါးစပ်က တတွတ်တွတ်ရွတ်ရင်း ရေတွက်ကြရသောသူအချို့မှာ ခုကျတော့ "ကိုးနဲ့ ရှစ်ပေါင်း ဆယ့်ခုနစ်ပေါ့"ဟု ဒက်ခနဲ ပြောနိုင်လောက်အောင် တိုးတက်လာကြသည်။
နောက်တစ်ခုကတော့ အရင်ကထက်ပိုပြီး ဘုရား၊ တရားကိုပိုပြီးဂရုစိုက်လာကြခြင်းပင်ဖြစ်၏။ တချို့တွေက ဘုရားစင်ကို ဗုဒ္ဓဘာသာမှန်းသိရုံလောက်သာ ထားသလို ဖြစ်နေခဲ့၏။ ခုကျတော့ ဘုရားစင်ကို သန့်သန့်ရှင်းရှင်း သပ်သပ်ရပ်ရပ်ဖြစ်အောင် သတိတရ လုပ်လာကြ၏။ သောက်တော်ရေလဲခြင်း၊ ပန်းကပ်ခြင်း၊ မီးပူဇော်ခြင်း၊ အမွှေးတိုင်ထွန်းခြင်း၊ ဆွမ်းတော်တင်ခြင်းတို့ကို ဂရုတစိုက် အချိန်မှန်ပြုလုပ်လာကြသည်။ ဒါတစ်ခုတော့ အမြတ်ထွက်သည်ဟု ဆိုနိုင်သည်။
ဘာသာရေးနှင့်တိုက်ရိုက်မပတ်သက်သော်လည်း အဆောင်ယတြာတွေ၊ ဓာတ်ဆင်၊ ဓာတ်ရိုက်ခြင်းတွေလည်း လုပ်လာကြသည်။ ပေါက်အားကောင်းအောင် ပေါက်စီစားခြင်း၊ ပေါက်ပန်းဖြူရွက်ချက်စားခြင်း၊ ပေါက်ပေါက်ဆုပ်ဖြင့် ဆွမ်းတော်တင်ခြင်း၊ ဘုရားပန်းကပ်ဖို့ ပေါက်ပန်းပွင့်ကို မရမက လိုက်ရှာခြင်းတို့ ပြုလုပ်လာကြ၏။ ဘာနူးဆိုလျှင် မနက် ၉နာရီတိတိမှာ သူ့ဆိုင်က ကက်ဆက်ဖြင့် "ပေါက်နေပြီ၊ ပေါက်နေပြီ"ဆိုသောသီချင်းကို ဖွင့်တတ်၏။
ခုချိန်မှာ ကိုပေါက်၊ မိပေါက် စသည်ဖြင့် မှည့်ထားသောကလေးများမှာ အလွန်စန်းပွင့်သည်။ ဟိုက မုန့်ဝယ်ကျွေး၊ ဒီလူက အအေးဝယ်တိုက် တော်တော်စားသာ၏။ တချို့ကျတော့ လာဘ်ကောင်းတဲ့ကလေးဆိုပြီး အ၀တ်အစားတွေ၊ ကစားစရာတွေဝယ်ပေး။ တစ်နေကုန်အိမ်ခေါ်ထားပြီး ကောင်းကောင်းပြုစုတာမျိုးတောင်ရှိလေသည်။
************************************************
မင်းလူ
(ခိုးခိုးခစ်ခစ်) နှင့် (သဘာဝကျကျ ဟာသရသ) လုံးချင်းဝတ္ထုများထဲမှ
No comments:
Post a Comment