ယခုတပတ်အတွင်း သျှမ်းပြည် တိုးတက်ရေးပါတီ/သျှမ်းပြည်တပ်မတော် SSPP/SSA ဌာနချုပ် ဝမ့်ဟိုင်းဘက်သို့ အစိုးရတပ်များ ဦးတည် နေပြီးနောက်ပိုင်း ယမန်နေ့နှင့် ယနေ့အတွင်း ဖြစ်ပွားသည့် တိုက်ပွဲများကြောင့် ငြိမ်းချမ်းရေး ထိခိုက် လာနိုင်သည်ဟု SSPP/SSA ပြောခွင့်ရ ဗိုလ်မှူးစိုင်းလ က ပြော ပါသည်။
“တန့်ယန်း- မိုင်ကောင်ဝ်ကြားက ကျနော်တို့ လှုပ်ရှားတဲ့ဘက်ကို မြန်မာအစိုးရ စစ်ကြောင်းတွေ ဝင်လာပြီး ကျနော်တို့ကို ပစ်ခတ်တယ်။ မနေ့ညနေ ၃ နာရီကနေ ၅ နာရီအထိ မိုင်းကောင်ဝ် အရှေ့ဘက် ၆ မိုင်အကွာမှာ တကြိမ်၊ ဒီနေ့မနက် ၁၀ နာရီ ခွဲကနေ နေ့ခင်း ထမင်းစားချိန်အထိ လွယ်လန်းမှာ ပစ်ခတ်နေတုန်းဘဲ” ဟု SSPP/SSA ပြောခွင့်ရ ဗိုလ်မှူးစိုင်းလ က သျှမ်းသံတော်ဆင့်အား ပြောပါသည်။
ယနေ့ မနက်ပိုင်းက မွန်းတည့်ချိန်အထိ သျှမ်းပြည်မြောက်ပိုင်း တန့်ယန်းမြို့နယ် နမ့်လောင်းဝ် ကျေးရွာအုပ်စု လွယ်လန်းအခြေ စိုက် SSPP/SSA ၏ တပ်မဟာ ၃၆ ထိန်းချုပ် နယ်မြေအတွင်း မိုင်းကောင်ဝ် အခြေစိုက် အစိုးရတပ် ခလရ ၃၃ နှင့် လောက်ကိုင် အခြေစိုက် ခမရ ၃၂၂ တို့ ဝင်ရောက်ကာ နမ့်တောင်စင် ရွာအနီး၌ တိုက်ခိုက်ခဲ့ကြောင်း၊ အသေအပျောက် စာရင်း မသိရသေး ကြောင်း ဗိုလ်မှူးစိုင်းလ က ပြောသည်။
ပြီးခဲ့သည့် အပတ်တည်းက ရလခတိုင်းအောက်မှ ခမရ ၅၂၅ တပ်ရင်း၊ ရပခတိုင်းအောက်မှ တပ်ရင်းတချို့တို့ ယာဉ်တန်း ၁၅ စီး မိုင်းနောင်ဘက်တက်သွားပြီး ယမန်နေ့က ၁၃ စီးပြန်ဆင်းလာကြောင်း၊ ရမခတိုင်းအောက်မှ ယာဉ်တန်း ၇၀ ကျော် သီပေါသို့ ဆင်းလာရာ ၅၁ စီးမှာ ခိုင်းဆင်(ယခင် SSNA ဌာနချုပ်ဟောင်း) ၌ ခရီးတထောက် နားခဲ့သေးကြောင်း၊ ဒေသခံများ ပြောသော်လည်း အဆိုပါအစိုးရ စစ်ယာဉ်တန်းများမှာ ကိုးကန့်ဘက်သို့ တက်သွားကြောင်း SSPP/SSA ကပြောပါသည်။
“အစိုးရရဲ့ တပ်မတော်က ငြိမ်းချမ်းရေးအပေါ်မှာ သစ္စာမရှိဘူး။ ကချင်ဘက်မှာ တိုက်ပွဲက ငြိမ်ခါစဘဲရှိသေးတယ်။ ကျနော် တို့ကို လာပြီးတိုက်နေပြန်ပြီ။ သူတို့ ဒီတိုင်းဆက်လုပ်သွားမယ်ဆိုရင်တော့ ကျနော်တို့အားလုံးက တည်ဆောက်နေဆဲဖြစ်တဲ့ ငြိမ်းချမ်းရေးကို ထိခိုက်မှာ အမှန်ဘဲ” ဟု ဗိုလ်မှူးစိုင်းလက သုံးသပ်ပြောဆိုသည်။
အဆိုပါတိုက်ခိုက်မှုဖြစ်ပေါ်နေသည့်အပေါ် ရမခတိုင်းရုံးသို့ SSPP/SSA က ဆက်သွယ်မေးမြန်းရာ မိမိတို့ ရမခ(အရှေ့မြောက် တိုင်းစစ်ဌာနချုပ်) တိုင်းအောက်မှ တပ်ရင်းများမဟုတ် ရလခ(အရှေ့အလယ်ပိုင်းတိုင်း တိုင်းစစ်ဌာနချုပ်)အောက်မှ တပ် များဖြစ်ကြောင်း၊ ရလခတိုင်းကလည်း မိမိတို့ညွှန်ကြားချက် မဟုတ်ကြောင်း ငြင်းနေကြသည်ဟု ဆိုပါသည်။
ယမန်နေ့က ထိုင်းနိုင်ငံ၌ RCSS/SSA သျှမ်းပြည် တပ်မတော်အား တွေ့ဆုံစဉ် အစိုးရ၏ ငြိမ်းချမ်းရေး ကိုယ်စားလှယ် ခေါင်း ဆောင် ဦးအောင်မင်းက စစ်ဘက်နှင့်အစိုးရဘက် ဆွေးနွေး ဖြေရှင်းခဲ့ကြပြီး ဖြစ်သဖြင့် အပစ်ရပ် တပ်ဖွဲ့နှင့် အစိုးရ တပ်မတော်ကြား ရှေ့ဆက်တိုက်ပွဲ ဖြစ်ဖို့အလားအလာ မရှိတော့ကြောင်း ပြောကြားခဲ့သည်။
သျှမ်းပြည်တပ်မတော် SSPP/SSA သည် အစိုးရကိုယ်စားလှယ်နှင့် ၂၀၁၂ ဂျန္နဝါရီ ၂၈ ရက်က ပဏာမ အဆင့်၊ ပြည်ထောင်စု အဆင့်တို့ဖြင့် ဆွေးနွေးခဲ့သည့် အဖွဲ့ဖြစ်သည်။
သတင်း သျှမ်းသံတော်ဆင့်
No comments:
Post a Comment