သူတို့ခေါ်တော့ ဒုက္ခသည်၊ ကိုယ့်ကိုယ် ကိုတော့ တော်လှန်ရေးသမား (၁၉)

“မင်းက ဘယ်ကလဲ”
“ ဗမာပြည်က”
“မင်းက သူခိုးပဲ”
“ကျနော်သူခိုးမဟုတ်ဖူး၊ တော်လှန်ရေးသမား”
“ မင်းဟာ ငါတို့နိုင်ငံကို ခိုးပြီးဝင်လာတာဖြစ်တယ်၊ အဲဒီတော့သူခိုးပဲ”
“ ခိုးဝင်လာတာမဟုတ်ဖူး၊ ရာဂျစ်ဂန္ဒီဖိတ်ခေါ်လို့လာတာ၊ ဒုက္ခသည်စခန်းမှာ နေတာပဲ တနှစ်လောက်ရှိပြီ”
အင်ဖားထောင်ဗူးဝက ကုလားထိုင်မှာထိုင်နေတဲ့ အသက်၅၀ကျော် အသားညိုညို တုတ်တုတ်ခိုင်ခိုင် ထောင်မှုးကြီးနဲ့ ငုတ်တုတ်ထိုင်နေတဲ့ အကျဉ်းသားတွေထိတ်ကကျနော် တို့ အင်္ဂလိပ်လို အချီအချပြောကြတာပါ။ ထောင်မှုးကြီးရုပ်က ငယ်ငယ်တုံးက ကြည့်ဖူးတဲ့ ဂျပန်အက်ရှင်ကားတွေထဲက မင်းသား ဆန်နီချေးဗား လိုမျက်ခုံးထူထူ မေးရိုးကားကား ယောကျာင်္းပီသတဲ့ရုပ်ရည်မျိုးပါ။ ကျနော်က ထောင်မှုးကို နှုတ်လန်ထိုးနေတာ ထောင်မှုးက ခတ်ပြုံးပြုံးပေမဲ့ ကျနော့်ရှေ့နားက မဏိပူရရဲက သိတ်ကြိုက်ဟန်မတူဘူး။ တချက်မာန်ပြီး စကားဆက်မပြောဖို့ လှမ်းဟောက်လိုက်ပါတယ်။ အဲဒီထောင်မှုး နောက်ပိုင်းမှာ ထောင်ထဲဝင်ရင် “ ဟေ့ဗမာ..နေကောင်းလား” ဆိုပြီး နှုတ်ဆက်တတ်ပါတယ်။

ကျနော်နဲ့ညီညီလွင် Kakching ရဲစခန်းမှာ ၁၀ရက်လောက် နေခဲ့ရာက ဒုက္ခသည်စခန်းက ပြန်လည် လက်မခံတဲ့အတွက်(အမှန်တော့ စခန်းကိုထိမ်းချုပ်တဲ့ အမှတ်၈ ရိုင်ဖယ်တပ်ရင်းက တပ်ရင်းမှုးကလက်မခံတာဖြစ်တယ်) နောက်ဆုံး အင်ဖားမြို့မှာရှိတဲ့ မဏိပူရ ဗဟို အကျဉ်းထောင်(MCJ- Manipur Central Jall) ကို ပို့လိုက်တာဖြစ်တယ်။ ထောင်ထဲမထည့်ခင် Thoubal မြို့နယ် တရားရုံးမှာ ကျနော်တို့ကိုခေါ်လာတဲ့ရဲတွေက တရားစွဲပါတယ်။ ပုဒ်မ ၁၄(စ) တရားမ၀င်နယ်စပ်ဖြတ်ကျော်မှုပါ။ အမှန်တော့ ကျနော်တို့ တရားဝင် ဒုက္ခသည်စခန်းမှာနေတာပဲ တနှစ်လောက်ရှိနေပါပြီ။ ထောင်ဗူးဝမရောက်ခင် တကြိမ်၊ ထောင်ဗူးဝမှာတကြိမ်၊ နောက်ထပ်တံခါးတဆင်ပကျော်ပြီး ရုံးခမ်းထဲမှာတကြိမ် နာမည်နဲ့ အဖနာမည်ပြန်စစ်ဆေး၊ ခန္ဒာကိုယ်လည်း အထပ်ထပ်စစ်ဆေးခဲ့တယ်။ ဓာတ်ပုံရိုက် အရပ်တိုင်းပြီး ဆံပင်၊ မျက်လုံး၊ ခန္ဒာကိုယ်က အမှတ်အသား၊ သေချာစစ်ပါတယ်။ ဖိနပ်ကြိုးနဲ့ ခါးပတ်တွေလည်းသိမ်းပါတယ်။ ထောင်ထဲ ကြိုးဆွဲချ လုပ်ကြံမှုကို ကာကွယ်တာပါ။ ပိုက်ဆံပါရင် ပိုက်ဆံအပ်ထားရပါတယ်။ ကိုယ်လိုအပ်ရင် (တပတ်တခါ)ထောင် ကင်တင်းအရောင်းဆိုင်က ဆပ်ပြာ၊ သွားတိုက်ဆေး၊ သွားပွတ်တံ၊ ဘီစကစ်မုန့် စတာတွေ ၀ယ်လို့ရပါတယ်။ ပြီးတော့မှ ရဲက ကျနော်နဲ့ ညီညီလွင်ကို အကျဉ်းသားအဆောင်တွေဘက် ခေါ်သွားပါတယ်။ အကျဥ်းဆောင်ကကိုက်၁၀၀ကျော် အကျယ်အ၀န်းရှိတဲ့ ပစောက်ပုံ တထပ်ဆောင်တွေပါ။ အဆောင်၂ခုကိုအလယ်မှာ သွပ်ပြားတွေနဲ့ကာပြီး ၃ပိုင်း ပိုင်းထားတယ်။ အရှေ့ဆုံးအပိုင်းမှာ အဆောင်တခုပဲရှိတယ်။ အသက်အရွယ်ကြီးသူတွေများတယ်။ ယာဘက်အခြမ်း အဆောင်၂မှာတော့ တိုက်ခန်း၂ခန်းရှိတယ်။ အလယ်မှာ လူသွားလမ်းနဲ့ ရေအမြဲပြည့်နေတဲ့ ရေချိုးကန်ကြီးရှိတယ်။ သွပ်ပြားကာထားတဲ့ ၀ဲဘက်အခြမ်းမှာ လည်း ယာဘက်အခြမ်းလိုပဲ ရေချိုးကန်နဲ့ တိုက်ခန်း၃ခန်းရှိတယ်။

ကျနော်တို့နှစ်ယောက်ကို အဆောင် ၁အခန်းထဲခေါ်သွားတယ်။ အခန်းက ပေ၂၀× ပေ၃၀ ကျယ်မယ်ခန့်မှန်းတယ်။ အသက်အရွယ်ကြီးသူတချို့လည်းပါတယ်။ ကျနော်တို့ အခန်းရှေ့ သံတိုင်တံခါးဝ ရောက်တာနဲ့ “ ဟေ့ မောင်ညို လား..မောင်ညိုမို့လား” ဆိုပြီး ဗမာလို ခေါ်တဲ့အသံကြားလိုက်တော့ ရုတ်တရက် အံ့သြသွားတယ်။ ဟုတ်တယ်..ဦးဇင်း ဦးနန္ဒာသီရိပါ။ ဦးအောင်ချမ်း ခေါ် ဦးနန္ဒာသီရိပါ။ ဦးဇင်း ဆိုပေမဲ့ သင်္ကန်းတော့ မ၀တ်ပါဘူး။ အသားဖြူဖြူ၊ အရပ်ပြတ်ပြတ်၊ ဥပဓိကောင်းကောင်း ဂတုံး နဲ့မျက်မှန်တပ်ထားတယ်။ကျနော်တို့ ၀င်လာတာနဲ့ အထဲက ကသဲအကျဉ်းသားတွေ အနားကို ၀ိုင်းလာတယ်။ တယောက်တပေါက် ဟိုမေးဒီမေး၊ စလိုက် ပြောင်လိုက် ရယ်မောလိုက်နဲ့ တချို့က တွန့်လိမ်ခွေကောက်ပြီး ဂုတ်ပေါ်ဝဲနေတဲ့ ကျနော့ ဆံပင်ရှည်ကို ဆွဲလိုက် ကိုင်လိုက်လုပ်နေတယ်။ ကျနော်တို့နှစ်ယောက်ကတော့ ဟိုကြည့် ဒီကြည့် မျက်လုံးလေးကလယ်။ အမဇုံတောထဲက လူရိုင်းတွေအကြား မျက်စေ့လည်ပြီး ရောက်သွားသလိုမျိုး။ ဦးဇင်းကြီးကတော့ “ Thay are my party”(သူတို့ငါ့အဖွဲ့တွေ) လို့ရှင်းပြနေတယ်။ တကယ်တော့ ဦးဇင်း ဦးနန္ဒာသီရိ က ဖဆပလခေတ် က နိုင်ငံရေးသမားဟောင်းကြီး။ ဆိုရှယ်လစ် ပါတီကပါ။ ၈၈ အရေးတော်ပုံအပြီး အိန္ဒိယဘက် က ကူညီနေတယ်ဆိုတဲ့ သတင်းတွေကြားပြီး သင်္ကန်းဝတ်ကြီးနဲ့ စွန့်စားထွက်လာခဲ့တာပါ။ မိုးရေးရောက်တော့ မိုးရေးဘုန်းကြီးကျောင်းမှာသီတင်းသုံးရင်း အခြေအနေကို အကဲခတ်လေ့လာနေခဲ့တယ်။ ဆရာမန်းမြင့်ဆိုင်နဲ့ တွေ့တယ်။ ဦးဇင်းနဲ့ နိုင်ငံရေးအယူအဆတွေက မတူဖူး။ သဘောထားမတိုက်ဆိုင်ဘူး။ ပြီးတော့ မိုးရေး ဘုန်းကြီးကျောင်းကိုရောက်လာတဲ့ ရှမ်းပြည်က နီပေါလူမျိုး ဘုန်းကြီးတပါး( နောက်ပိုင်း လူထွက်သွားတော့ ပေါပေါကြီးလို့ လူသိများတယ်) လည်းရောက်လာတော့ ဦးဇင်း၂ပါးက နယူးဒေလီထိ ရောက်သွားတယ်။ ဒေလီမှာ ဦးမောသီရိ (အော်လ် အင်ဒီးယား ရေဒီယို) ဒေါ်သန်းသန်းနု( ၀န်ကြီးချုပ်ဟောင်း ဦးနုသမီး) တို့နဲ့တောင်တွေ့ခဲ့သတဲ့။ နောက်တော့ ဘုန်းကြီး၂ပါး ငွေရေးကြေးရေးကိစ္စတွေနဲ့ ကတောက်ကဆဖြစ်တယ်။ ဒေလီကလူကြီးတွေနဲ့ အဆင်မပြေဖြစ်တယ်။ နောက်ဆုံးလူဝတ်လဲသွားကြတယ်။ ပြီးတော့ နယူးဒေလီကနေ နယ်စပ် ပြန်ရောက်လာတယ်။ သူတို့ဇာတ်လမ်းတွေကလည်း ခတ်ရူပ်ရှုပ်ပဲ။ ဗမာပြည်ပြန်မယ်လုပ်တော့ ဆရာမန်းက ဘုန်းကြီးလူထွက် ဦးအောင်ချမ်းကို မသင်္ကာံဖြစ်ပြီး ရဲကိုတဖက်လှည့်နဲ့ဖမ်းခိုင်းတယ်။ ဦးဇင်း ဦးအောင်ချမ်းက ကျနော်တို့ ရှိနေစဉ် စခန်းကို ရောက်လာတယ်။ ရက်အနည်းငယ်ကြာတော့ စခန်းကနေ (ဆရာမန်းနဲ့ ဒေါက်တာအောင်ကျော်ဦးတို့ အစီအစဉ်နဲ့) ချန်ဒယ်ရဲတွေ လာခေါ်သွားတယ်။ အဲဒီနောက် အင်ဖားထောင်ကို ရောက်သွားတာပါ။

ထောင်ထဲရောက်တော့ ကျနော်တို့ပိုင်ဆိုင်တာက မဲညစ်ညစ် စောင်ပါး ၃ထည်၊ ပုံစံခွက်ဒါန်ထမင်းပန်းဂံတချပ်၊ ဟင်းထည့်တဲ့ စတီးပုဂံလုံးတခွက်၊ ရေခွက်တခွက် ပဲဖြစ်ပါတယ်။ ပြန်ထွက်ရင် အတိအကျပြန်အပ်ရမယ်လို့ ရဲကမှာထားပါတယ်။ ကျနော်တို့ ထောင်ထဲဝင်တဲ့နေ့က ခရစ်စမတ်နေ့မို့ စပယ်ရှယ်ညစာနဲ့တိုးပါတယ်။ ငါးဟင်းကြော်ချက်၊ ပဲဟင်း၊ အသီးအရွက်ပေါင်းကြော် နဲ့ အီဒွန်းဗတ် လို့ခေါ်တဲ့ ကသဲဟင်း တို့ဖြစ်တယ်။ ပန်းသီးတလုံးလည်း ပေးပါတယ်။ ည၉နာရီဆို အိပ်ချိန်ဖြစ်ပါတယ်။ အခန်းက ပေ၂၀×၃၀ ဆိုပေမဲ့ ဘေးပတ်ပတ်လည်နဲ့ အလယ်နေရာတွေအားလုံး လူတွေပြည့်နေပြီ။ အခန်း ဒေါင့်လေးမှာ ရေလောင်းအိမ်သာရှိတယ်။ အုတ်ခုံလှေခါးနှစ်ထစ် နဲ့ အပေါ်ဘက်ကျတယ်။ အိမ်သာသွားတဲ့လမ်းနားမှာ လွတ်နေတယ်။ ညီညီနဲ့ ကျနော့ ကို အဲဒီမှာပဲ ကသဲတန်းစီးက နေရာချပေးတယ်။ အိမ်သာက သန့်ရှင်းပြီး အနံ့အသက်မရပေမဲ့ တပိုတပါးသွားချင်သူတွေက ခေါင်းရင်းကနေ ဖြတ်ဖြတ်နေတာရယ်၊ အိမ်သာတံခါးအဖွင့်အပိတ်၊ အတက်အဆင်း အသံတွေကြောင့် အိပ်ရေးပျက်တယ်။ ဘာပဲဖြစ်ဖြစ် ဘ၀မှာ အချုပ်ထဲ၊ ထောင်ထဲ ပထမဆုံးအတွေ့အကြုံတခုတော့ ဖြတ်သန်းရပြီမို့ ဖြစ်သမျှအကြောင်း အကောင်းလို့ပဲတွေးလိုက်တာက စိတ်သက်သာရရပါတယ်။

ဦးအောင်ချမ်း ရဲ့ ပြောပြချက်အရ ဒီထောင်ထဲမှာ ကျနော်တို့စခန်းက ရဲဘော်တွေ နဲ့ ကိုမြင့်ဆန်းတို့ ရောက်နေတယ်ဆိုတာ တိတိကျကျသိလိုက်ရတယ်။ စခန်းက ရဲဘော်တွေက ၁၉၈၉ အစောပိုင်းလတွေမှာ မဏိပူရကနေ မီဇိုရမ်စခန်းကို အသွား ရဲက လမ်းမှာဖမ်းဆီးမိပြီး နယ်ခြားဖြတ်ကျော်မှုနဲ့ပဲ တရားစွဲပြီး ထောင်ကို ပို့လိုက်တာဖြစ်တယ်။ သူတို့က အောင်သန့်မင်း( မန္တလေးကနေ ကျနော်တို့နဲ့ တလှေထဲစီးလာသူ) ကိုထွန်းထွန်း၊ ကိုခိုင်ထွန်း၊ ကိုနေမျိုးအောင်( ကျနော်တို့ရောက်တော့ ကိုနေမျိုးအောင်ကထောင်က လွတ်ပြီး ဒေလီရောက်သွားတယ်) ကိုဇော်မြင့် တို့ဖြစ်တယ်။ မနက် ၆နာရီထိုးတော့ ကျနော်တို့ ကို ထောင်တံခါးဖွင့်ပေးတယ်။ သွပ်ပြားကာထားတဲ့ တဖက်ကအဆောင်၂ က ရေကန်ကိုသွားတယ်။ အဲဒီမှာစခန်းက သူငယ်ချင်းတွေနဲ့ ကိုမြင့်ဆန်းတို့ရယ်၊ တခြား ဘိန်းဖြူရောင်းဝယ်မှု၊ မူးယစ်ဆေးမှု နဲ့ ဗမာတော်တော်များများကို တွေ့လိုက်ရတယ်။ ကျနော်တို့ ရှစ်လေးလုံးအုပ်စုတွေက အခန်းတွေပြန့်ကြဲ ရောက်နေကြတာပါ။ တချို့က ဆောင် ၃ ခန်းမှာ ကျနော်တို့ကို လွှတ်ပေးရင် သူတို့ကတိုက်ခန်းထဲဝင်နေရတာ။ သူတို့ကိုလွှတ်ချိန် ကျနော်တို့ဝင်ရတယ်။ ကျနော်ကတော့ ကိုယ့်လူတွေတွေ့တော့ အားအတော်ရှိသွားတယ်။ ဒါနဲ့ တနေရာမှာ ကိုလင်္ကျာဝင်း နဲ့ ကိုစိန်ဝင်း ကို မြင်တော့ ၀မ်းသာအားရ သွားနှုတ်ဆက်မိတယ်။ ဒါပေမဲ့ သူတို့က အေးစက်စက်ပဲ။ ကိုလင်္ကျာဝင်းက “ ခင်ဗျား
ကျနော်တို့ကို လာစကားမပြောနဲ့ဗျာ ၊ ဒီမှာ ဗမာအချင်းချင်း ပြဿနာ မတက်ချင်ဘူး” လို့ မကြေမနပ်ပြောပါတယ်။ ကျနော်လည်း စိတ်မကောင်းဖြစ်ပြီး ကိုယ့်အခန်းဘက် ပြန်လှည့်လာခဲ့တယ်။ အတူနေ ကိုညီညီလွင်နဲ့ ဦးဇင်းကို ပြန်ပြောပြတော့ သူတို့က ဖျောင့်ဖျတယ်။ ဦးဇင်းက “ သူတို့ဘက်က ခံစားကြည့်အုံးလေ၊ စခန်းက လူတွေက ထိုးကြိတ်ပြီးထောင်ထဲထည့်လိုက်တော့ စိတ်နာမှာပေါ့၊ မင်းတို့လည်း ဓါးဆာခံတွေပေါ့၊ ငါရှင်းပြပေးပါ့မယ်၊ ဒီထဲမှာတော့ တယောက်နဲ့တယောက် ခင်ခင်မင်မင်နေတာ ကောင်းပါတယ်” လို့ပြောတယ်။ကျနော်တို့ရောက်ပြီး နောက်တလလောက်ကြာတော့ ကိုမြင့်စန်းတုိ့လည်းလွတ်တယ်။ အမှန်တော့ နိုင်ငံခြားသားအက်ဥပဒေ ၁၄(စ)ဟာ အလွန်ဆုံး ၆လပဲ ထောင်ချလို့ရတယ်။ ဒါပေမဲ့ အမှုပြတ်ပြီး ထောင်ကလွတ်တယ်ဆိုရင်တောင် မိုးရေးနယ်စပ်ကို ရဲကားကြုံရှိရသေးတယ်။ ကားကြုံမရှိရင် လွတ်ရက်စေ့ပေမဲ့ ထောင်ထဲမှာ ဆက်နေရသေးတယ်။ ကိုမြင့်ဆန်းတို့က တလလောက် ပိုနေရမယ်လို့ထင်တယ်။ သူတို့ လွတ်တဲ့နေ့မှာတော့ ကျနော့်နဲ့ညီညီကို လာနှုတ်ဆက်တယ်။ ကျနော်က “ နယ်စပ်ရောက်ရင် ဟိုဖက်က ရဲတွေဆီလွှဲမှာမို့ ခင်ဗျားတို့ ထပ်ပြီး အရေးယူခံရနိုင်တယ်၊ မဏိပူရ ရဲတွေကို လဂ်ထိုးပြီး ကိုယ့်အစီအစဉ်နဲ့ကိုယ် ၀င်ဗျာ” လို့ ပြောတယ်။ ကိုမြင့်ဆန်းက “ ဒီနံရံကြီး ဟိုဖက်ရောက်ရင် ဘာမှ မစိုးရိမ်တော့ပါဖူး” လို့ ပြန်ပြောတယ်။ နောက်ပိုင်းမှာ ကိုမြင့်ဆန်းတို့အုပ်စုကို စစ်အစိုးရ ပြန်ပြီးဖမ်းထားလိုက်တယ် ဆိုတဲ့ သတင်းပြန်ကြားပါတယ်။ အဲဒီနောက်ပိုင်း ကျနော်တို့ ရှစ်လေးလုံးအဖွဲ့တွေကို အမှုပြတ်ပေမဲ့ ထောင်ကနေ လွှတ်ပေးဖို့ အစီအစဉ်မရှိတော့ဖူးဆိုတာ နောက်မှ သိလိုက်ရပါတယ်။ ဘာလို့လည်းဆိုတော့ နယူးဒေလီမှာနေထိုင်တဲ့ ဗဟိုတရားရုံးရှေ့နေတယောက်လည်းဖြစ်၊ လူ့အခွင့်အရေး ရှေ့နေတဦးလည်းဖြစ်တဲ့ နန်ဒီတာ ဟတ်က်ဆာ (Nandita Haksar ) လို့ခေါ်တဲ့ အမျိုးသမီးကြီးတယောက်က အင်ဖားထောင်ထဲမှာ ရှိနေတဲ့ နိုင်ငံရေးလှုပ်ရှားတဲ့ မြန်မာကျောင်းသားတွေ တယောက်မှကို မြန်မာပြည်ပြန်မပို့ဖို့၊ ထောင်အာဏာပိုင်တွေကို မေတ္တာရပ်ခံထားလို့ဖြစ်ပါတယ်။ သူဟာ ကိုမြင့်စန်းတို့ ကို မြန်မာ အာဏာပိုင်တွေ ထပ်ပြီးထောင်ချတယ်ဆိုတဲ့ သတင်းကြားတာနဲ့ တုန်လှုတ်သွားတဲ့အကြောင်း၊ ဒါကြောင့် အင်ဖား ထောင်ထဲက ကျောင်းသားတွေ နောက်ထပ် အန္တရာယ်ထပ်မကျအောင် မြန်မာပြည်ပြန်မပို့ဖို့ မဏိပူရ ထောင်ရဲ့ အကြီးအကဲကို တွေ့ဆုံ မေတ္တာရပ်ခံခဲ့တယ်လို့ အန်တီ နန်ဒီတာက နောက်ပိုင်းမှာ ကျနော့ကို ပြောဖူးပါတယ်။ ဒီနေရာမှာ ထောင်ထဲကကျနော်တို့ တတွေနဲ့ အန်တီ နန်ဒီတာ ဆုံခဲ့ပုံကလည်း စိတ်ဝင်စားစရာ ရုပ်ရှင်ဇာတ်လမ်းဆန်ဆန်လေးမို့ ပြန်ပြီးပြောပြချင်တယ်။

ဆောင်းပါးအမှတ်(၁၀)မှာ ရူပါကောင်းကောင်း ကသဲစစ်ဗိုလ် တယောက်နဲ့ ကျနော်တို့စခန်းက မအိ ဆိုတဲ့ အမျိုသမီးတို့ရဲ့ အချစ်ဇာတ်လမ်းလေးကို ရေးခဲ့ဘူးတာမှတ်မိမယ်ထင်တယ်။ ၁၉၈၉ မတ်လထဲမှာ ကျနော်တို့ အပေါ် အကျဉ်းသားတွေလို ဆက်ဆံတာကြောင့် ကသဲအရာရှိတွေကို ဆန္ဒပြ သပိတ်မှောက်ရာကနေ နောက်ဆုံး နယ်စပ်တောထဲပို့ခံရ တဲ့ အဖြစ်အပျက်ပါ။ အဲဒီတုံးက စခန်းမှာရှိတဲ့ အမျိုးသမီး(၃) ယောက်လုံး( မအိ၊ မစန်းပွီး၊ မနီနီသိန်း) တို့ကို တောင်ပေါ် ရွာလေးမှာ ထားပြီး ကျနော်တို့က တောထဲမှာနေကြပါတယ်။ မအိနဲ့ တရားဝင်လက်မထပ်ပေမဲ့ အတူပေါင်းသင်းနေထိုင်တဲ့ ကသဲစစ်ဗိုလ် ချောင်ဗား က ဗမာဒုက္ခသည်အမျိုးသမီး
ကို ခိုးပြေးလို့ ရာထူးချခံနေရတဲ့အချိန်ပါ။ ကျနော်တို့ကို နယ်စပ်မောင်းထုတ်တော့ ချောင်ဗားက ခရီးလွန်နေတယ်။ သူပြန်လာတော့ မအိက မရှိတော့ဖူး။ သူလည်းမိုးရေးနယ်စပ်ထိ သွားရှာတယ်။ အမှန်တော့ ရွာမှာခိုလှုံနေတဲ့ မစန်းပွီး၊ မအိနဲ့ နီနီသိန်း တို့ကို ကသဲစစ်တပ်က ရိုက်နှက် ဖမ်းဆီးပြီး အင်ဖားထောင်ကို ပို့လိုက်တယ်။ နောက်ဆုံးတော့ ချောင်ဗားလည်း သတင်းရသွားတယ်။ ဒါနဲ့ ကသဲရှေ့နေတွေကို ငှားပြီး မအိကို ထောင်က ထုတ်ဖို့ကျိုးစားတယ်။ ဒါပေမဲ့ အဆင်မပြေဖူး။ သူတို့နှစ်ယောက်က မဏိပူရထုံးတမ်းအရ တရားဝင်လက်ထပ်ထားသူတွေမဟုတ်တော့ ထင်သလိုမလွယ်ကူဖူး။ မအိက ဒုက္ခသည် အစ္စလမ်ဘာဝင်၊ ချောင်ဗားက ဟိန္ဒူပုဏ္ဍားမျိုးတွေဆိုတော့ ချောင်ဗား ရဲ့ မိဘဆွေမျိုးတွေကလည်း သဘောမတူဘူး။ မျိုးနွယ်တူ ကသဲဆရာဝန်မလေးနဲ့တောင် စေ့စပ်ဖို့ ကမ်းလှမ်းတဲ့ကြားကခုလိုဖြစ်သွားတာဆိုတော့ မကြည်ဖြူဖူး။ ကန့်ကွက်ကြတယ်။ ချောင်ဗားကလည်း ကြားလူဘယ်လိုဖျက်ပစေ၊ မအိမှမအိ။ နောက်ဆုံး မဏိပူရက နာမည်ကြီး လူငယ် လူ့အခွင့်အရေးရှေ့နေ တီးရှိုဝါး( နောက်ပိုင်းမှာ ကျနော်တို့အမှုပါလိုက်ပေးသူ) နဲ့တွေ့တယ်။ သူကတဆင့် အန်တီနန်ဒီတာနဲ့ ဆုံပြီး အမှုလိုက်တယ်။ ဖြစ်ချင်တော့ မအိက ကသဲစကားရော၊ အင်္ဂလိပ်စကားရောမတတ်ဘူး။ သူတို့ချစ်ကြွမ်းဝင်ခဲ့တာကိုက လက်ဟန်ခြေဟန်တွေစတာ။ ထောင်ထဲရောက်တာလဲ တလကျော်ပဲရှိသေးတယ်။ ဒီတော့ ဘာသာပြန်လိုတာနဲ့ အစောပိုင်းကတည်းက ထောင်ထဲရောက်နေတဲ့ ၈လေးလုံးကျောင်းသား ကိုနေမျိုးအောင်က အကူအညီပေးတယ်။ အဲဒီမှာ အန်တီနန်ဒီတာက ထောင်ထဲက ဗမာကျောင်းသားတွေရဲ့ အကြောင်းစုံကို သိလိုက်ရတယ်။ ဒါနဲ့ မအိတို့အမှုကို ဖြတ်နိုင်ပြီး ရုပ်ရှင်ဆန်တဲ့ သူတို့အချစ်ဇာတ်လမ်းဖြောင့်ဖြူးသွားတယ်။(ဒီဆောင်းပါးရေးဖို့ မအိကို ဆက်သွယ်တော့ သူတို့ဇနီးမောင်နှံ သားသမီး သုံးယောက်နဲ့ အင်ဖားမြို့မှာပျော်ပျော်ရွှင်ရွှင်နေထိုင်နေပြီး သူ့ခင်ပွန်းချောင်ဗားလည်း မဏိပူရ စစ်တပ်အရာရှိကြီးဖြစ်နေပြီတဲ့)။

အဲဒီနောက် ထောင်ထဲက မစန်းပွီးကို အရင်ဆုံးထုတ်တယ်။ ပြီးတော့ ကိုနေမျိုးအောင်။ နယူးဒေလီလို ဆွေမျိုး အသိအကြွမ်းမရှိတဲ့နေရာမှာ ရေရှည် ရှင်သန်ရပ်တည်ဖို့ခက်ခဲပါတယ်။ ဥပဒေရဲ့အကာအကွယ်၊ လုံခြုံရေး၊ အလုပ်အကိုင်၊ စားဝတ်နေရေး ကိုပါ ထည့်သွင်းစဉ်းစားရတာဆိုတော့ ရှေ့နေအန်တီကြီးဟာ အရင်ဆုံး အကူအညီပေးနိုင်သူကို အရင်ရှာရပါတယ်။ မြန်မာ့အရေးတက်ကြွတဲ့ အော်လ်အင်ဒီးယားရေဒီယိုက ဦးမောသီရိ ဆီကို ရော ၀န်ကြီးချုပ်ဟောင်း ဦးနုရဲ့သမီး ဒေါ်သန်းသန်းနုကိုရော ဆက်သွယ်ပြီး မစန်းပွီးနဲ့ ကိုနေမျိုးအောင်တို့ နေထိုင်ရေးကို အကူအညီယူတယ်။ နှစ်ယောက်စလုံးက တတ်နိုင်သလောက်အကူအညီပေးပါတယ်။ နောက်ထပ်လည်း ထောင်ထဲမှာ ကျန်နေသေးလို့ အားလုံးရဲ့ အနာဂတ်အတွက် အန်တီနန်ဒီတာက UNHCR ကိုချည်းကပ်တယ်။ UNကလည်း အိန္ဒိယ အစိုးရနဲ့ နားလည်မှုယူ ရုံးဖွင့်ထားတာ၊ အိမ်နီးချင်း နိုင်ငံတွေက ဒုက္ခသည်တွေကို အိန္ဒိယက နယူးဒေလီမှာလက်မခံဘူး။ အဲဒီတုံးက UNHCR အစောင့်အရှောက်ခံဒုက္ခသည်ဆိုလို့ အာဖဂန်နစ္စတန်နဲ့ အီရန် တွေပဲရှိတယ်။ ဒါပေမဲ့ အန်တီနန်ဒီတာရဲ့ ဥပယ်တမျှင်နဲ့ မစန်းပွီးကို UNHCR က အသိအမှတ်ပြုအောင်လုပ်နိုင်ခဲ့တယ်။ အိန္ဒိယမှာ မြန်မာဒုက္ခသည်အဖြစ် မစန်းပွီးက အရင်ဆုံးအသိအမှတ်ပြုခံရတယ်။ သူ့ ဒုက္ခသည် မှတ်ပုံတင်နံပါတ်က (၀၀၀၁) ဖြစ်တယ်။

အဲဒီအချိန် ထောင်ထဲက ကျနော်တို့အားလုံး အပြင်ကအခြေအနေတွေဘာမှ မသိတော့ မျော်လင့်ချက်မဲ့နေသလိုခံစားနေရတယ်။ စကားလည်းမတတ်၊ စရိုက်လည်းမတူ တပါးနိုင်ငံအကျဉ်းထောင်မှာ အနှိမ်ခံ၊ အရိုက်ခံပြီး စိတ်ကျဉ်းကြပ်နေတယ်။ တနေ့တနေ့ ထောင်နံရံအပြင်က လေတိုက်ပြီးယိမ်းနွဲ့နေတဲ့ ယူကလစ်ပင်ကြီးကို အားကျနေတယ်။ ထောင်အပြင်က ဓာတ်တိုင်ကြီးတွေဖြစ်ချင်နေတယ်။ နေ့စဉ် ပေါ်ကပျံသန်းသွားတဲ့ လေယာဉ်ပျံ
ကြီးကိုငေးမောစိတ်ကူးယဉ်နေတယ်။ အုတ်နံရံကြီးအပြင်ကို အုပ်စုလိုက်ပျံတက်သွားတဲ့ ခိုငှက်တွေဖြစ်ချင်နေတယ်။ စိတ်မွန်းကြပ်မှုတွေနဲ့ ရူးသလို ကြောင်သလို ဖြစ်နေတယ်။ ထောင်ထဲနေရမှ လွတ်လပ်မှုရဲ့ အရသာကို ပိုခံစားသဘောပေါက်လာတယ်။ ဒါပေမဲ့ ကိုယ် မသိမမြင်နိုင်တဲ့ ဘ၀အဆက်ဆက်က ၀ဋ်ကြွေးတွေကို ဆပ်နေရတုံးပါ။

ကိုညို ။